(Evangelio según San Marcos) 2
2
Jesús aents wekaechau etsagagbau
(Mt. 9.1-8; Lc. 5.17-26)
1Ujumak tsawan pujus Jesús wakitki Capernaúm jegauwai; nunikmatai jega ni pujamujin dekajuawaju. 2Nunikag kuashat aents aidauk jeganmag pimuidiaju, waitinum nagkamnasag tikichish wayachmin awajsaju. Imanikagmatai niishkam Apajuí chichamen etseju. 3Nuniai cuatro aents aidau, aents wekaechaun jukiag itawaju. 4Dutikawag kuashat aents asamtai, Jesús wajamunum jegamainchau asag, Jesús wajamun mamikis jegá tuntupen wakag chigkaidiag, wekaechauwa nuna camillanum aepsag akakiaju. 5Dutikamtai Jesús niiní dekaskeapi tuidaun wainu asa, wekaechaun chichajak:
—Uchijuh, amina tudaujum aidauk tsagkugnaje, tau.
6Nuna tutai ujumak maestro chicham umiktinun jintinkagtin aidau nui pekajaidau ditá anentainig: 7“¿Wagka jusha tuush chichawa? ¡Apajuin pegkegchau chichajak tu wekagajama! Imá Apajuikeajama tudaun tsagkugkagtumainuk”, tuidau. 8Dita aatus anentaimainamujinak Jesús dekau asa:
—¿Wagka aannush anentaimainagme? 9¿Tuwaita imá yupichuch wekaechauwa ju tumainush, amina tudaujum aidauk tsagkugnaje taja dukaih, atsa nantakim tepetaijum jukim wetá tumainaitag dukaih? 10Tujash Aentsmaga akiinauwa nu, ju nugka juish tudau aidaunash tsagkugkagtumaina nu dekaatajum.
Tusa wekaechaun chichajak:
11—Amina tajame, nantakim ainká tepetaijum jukim jeemin wetá, tiuwai.
12Tamawaik nantakug tepetaijin juki ashí wainainamunum jiinkiu. Nunikmatai ashí ditak anentai jegagchajui, nunikag Apajuin emematuinak:
—Juninuk makichkish wainkachuitji, tuidau.
Jesús Levin mina jintintaig atá tibau
(Mt. 9.9-13; Lc. 5.27-32)
13Dutika Jesusak ataktú weuwai kuchá tugkitken; nunitai kuashat aents niina jegajuidau, dutikam niishkam jintinkagtau. 14Nui nagkaemakmá Leví#2.14 Diistá Mt. 9.9. Alfeo uchijin wainkauwai, apú kuichkiji atinun ijumin asa akikmagtai yajumak ekeemtatman, nunik:
—Wegajai mina jintintaig aminum, tiuwai.
Tama Levishkam wajakí Jesusjai weuwai.
15Nunik Jesusak Leví jeen jegaa mesanum ekeemsau, kuashat apu romanmaya kuichkiji atinun ijumin aidau nuigtú tudaugtin aidaush, jintintaiji aidaujai ijunag niijai ekeemsajui, kuashat niina saetus yujaidau asag. 16Nunittaman maestro chicham umiktinun jintinkagtin fariseo aina nu, Jesús ijunag yuwaun wainkag jintintaiji aidaun chichajuinak:
—¿Wajukeakua niish apú kuichkiji atinun ijumin nuigtú tudaugtin aina ibaujaish ijuntug yuwakush, umutnash umawa?, tuidau.
17Nu tabaun Jesús antuk ayaak:
—Jamamtuchu aidauk ampijatnunak atsumatsui, jau aidau atsumawai. Wika aents pegkejan takau aidau untsuktasan minichuitjai, aents tudaugtin aidaunum, tauwaitjai.
Ayuno pachisa iniimsamu
(Mt. 9.14-17; Lc. 5.33-39)
18Juagká jintintaiji aidau, fariseo aidaushkam ayuno takainak batsataidau, nuninai ujumak Jesusan jegantun iniinak:
—¿Wagka Juan Yamijatna nuna jintintaiji aidauk, fariseo aidaujai ayuno takainaish, ame jintintaijum aidaush ayunonash takainatsua?, tuidau.
19Tama Jesús ayaak:
—¿Ipaamu aidaush nuwena nu ditajai pujaigkish ayunaumainkaih? Nuwenu ditajai pujaigkik ayunaumaitsui. 20Tujash tsawan jegattawai nuwena nunú juwam atata nu, nunikmatai ipaamu aidaush wake besemag dekapenak ayunawagtatui.
21“Makichik aentskesh jaanch yamagman tsupikag jaanch mamujunmag adujtuchu ainawai, yamajam asa waketak jaanch mamujua nuna nuní nagkaemas ichiimain asamtai. 22Dutiksaik vino yamagmashkam duwap apagbau ajutnumag yajashtaiyai, dutikamak ichiimain asamtai, nunik vinok ukaegag, duwapshakam ichiinak ajapnamainai. Nuadui vino yamagmak duwap yamagmanum yajataiyai”.
Jesusa jintintaiji aidau tsawan ayamtai aig trigo jukí yuawagbau
(Mt. 12.1-8; Lc. 6.1-5)
23Tsawan ayamtai tsawaju ai, Jesús trigo ajakbaunum wegau, nuniamunum niina jintintaiji aidau trigon kupig juidau. 24Nuniagtai fariseo aidau wainkag:
—Nijah, ¿wagka tsawan ayamtai aig takantsashti tibauwa nuniaish aikainawa?, tuidau.
25Tusa tiagtai Jesús ayaak:
—¿Atumek tuke ausachuk ainajum, David niijai yujaamujai yapajuinak dutikawajua duka? 26Abiatar sumo sacerdote wajas pujai, jega Apajuí ememattainum wayauwai, nunik yuwauwai pag Apajuí anagkuamu imá sacerdotek yuwati tibauwa nuna, dutikak aents niijai yujaunash susauwai.
27Tsawan ayamtaiya duka aents atsumau asamtai aikamui. Untsu aentsuk tsawan ayamtaiya nuiya umimain aina nuna umiktinme tichamui. 28Nunin asamtai Aentsmaga akiinauwa duka, tsawan ayamtaiya nuna Apujiyai, tiuwai.
Currently Selected:
(Evangelio según San Marcos) 2: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.