(Carta a los Hebreos) 1
1
Apajuí niina Uchijin awemauwai
1Apajuik yaunchuk iina muunji batsamajakajua nunak niina etsegtin aajakajua nuwi kuashtá au aujkawa inibiajui ni wajuk ausata tawa dutiksag. 2Tujash yamaik, ju tsawan inagnamunum batsatag ju tsawantaik niina Uchijin awetugma dui aujtamui, ashí wají aidauk ni najankamu asamtai ashí niinuk atí tusa idaitusua nuna. 3Niiyai Apajuí imanjiya nuna iwaina duka. Nigka Apajuí wajukuita niishkam imanke. Ni chichame senchigtina dui ashí wají aidaunak emetuk awai. Nuigtú iina tudaujinash nijatjamag pegkeg etami nayaimpinum Apajuí ekeemtaijin untsujin ekeemsauwai. 4Niiyai nayaimpinmaya aents aina nuna wagagkauk, nigki dekas Apu wagaaku ashí nayaimpinmaya aents aina nuna nagkaesau eme anentsá adaitaiya dushakam.
Apajuí Uchijiya nuuwai nayaimpinmaya aents aidaun nagkaesauk
5Apajuik makichkish ángel aina nunakesh:
“Amek mina Uchijuitme, wi yamai aentsnum akiinati tima akiinau asam”,#1.5 Sal. 2.7. tichauwai.
Nuigtush nayaimpinmaya aents aidaunak:
“Wi niina apají atajai, ni mina uchig atí”,#1.5 2 S. 7.14; 1 Cr. 17.13. tichauwai.
6Tikichnumshakam jutiksag, niina Uchijí makichkiuchia nuna pachis nugkanum awemak:
“Apajuí angelji aina duka ashí niinak ememattinme, tiuwai” tawai.
7Ángel aidaun pachisag:
“Apajuik niina angelji aidaunak tuke dasega nunin weu ainawai;
tuja takagtuinakush tuke jiiya nunin weu ainawai”,#1.7 Sal. 104.4. tawai.
8Tujash Apajuik niina Uchijin pachisag:
“Apajuiyah, ame ekeemsa inamtaigmek ajumaish tuke atinai pegkeg aina duke takau asam.
9Amek pegkeg aina nu aneakum, pegkegchau aina duka dakitjaume.
Nuadui Apajuí, amina Apajuigmea nu etegtama shiig aneemtijamsauwai
kumpajum aina nuna nagkaesau”,#1.9 Sal. 45.6-7. tiuwai.
10Junashkam Uchijin tiuwai:
“Apuh, amek yama nagkamtinish nugka najankum nayaimpishkam najankauwaitme.
11Nunú najankamujum aina duka megkaejatnai
jaanch mamujá megkagama numamtuk,
tujash amek tuke pujutnaitme.
12Jaanch ninutia numamtuk awajkattame.
Yapajiakmeshkam jaanch yapagmamtayama numamtuk yapajiattame.
Tujash amek imanismek atinaitme, amina pujutjumshakam nagkankashtinai”.#1.12 Sal. 102.25-27.
13Apajuik makichkish ángel aina nunak:
“Ekeemsata mina untsujui, nunikamin wi amina shiwajum aidaunak ashí depetuktajame,
dutikan ikaunmamtai dui ame diisminum”,#1.13 Sal. 110.1. tichauwai.
14Wagki, ashí ángel aina duka wakan Apajuin takajin ainawai, aents uwemjatin aina nuna yaigtí tusa ishimtai ditak ainawai.
Currently Selected:
(Carta a los Hebreos) 1: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.