Hebreos 1
1
Ri Dios xuk'alajisaj rib ruma Ruc'ajol
1Rojertan ri Dios uq'uiyal laj xuk'alajisaj Rutzij chique ri kati'-kamam cuma ri k'alajisanelab, yey ri k'alajisanelab uq'uiyal uwach ri k'alajisanic xqui'an chiquiwach ri tinamit.#1:1 Ri k'alajisanelab xquiya Rutzij ri Dios ruma ri tzijonic xqui'ano, ruma ri xquitz'ibaj canok y ruma tak ri xqui'ano. 2Chupa c'u wa q'uisbal k'ij oj c'o wi, ri Dios xuk'alajisaj rib ruma Ruc'ajol. Yey ruma Ruc'ajol xu'an ronoje tak ri c'olic, puk'ab Ruc'ajol uya'om wi ronoje 3y che Ruc'ajol quilitaj wi runimal uwach uk'ij ri Dios. Jec'uri'la', ruc'u'x ri Dios e junam ruc' ruc'u'x Ruc'ajol, ri Jun chapayom re ronoje tak ri c'olic ruc' ruchuk'ab Ruch'a'tem. Ec'uchiri' uch'ajom chi ri kamac, xe'tz'ula puwiquik'ab ri Dios chila' chicaj.
Ruc'ajol ri Dios más c'o uwach chiquiwa ri ángeles
4Ruc'ajol ri Dios más c'o uwach chiquiwa ri ángeles, ma che Rire xya'i' wi jun bi'aj más c'o uwach chwa ri bi'aj que ri ángeles. 5Yey ri Dios na xubi'ij ta c'ana wa' che juna ángel:
Ri'at at Nuc'ajol yey Ri'in in Akaw;
wak'ij c'u ri' cank'alajisaj wa'. Sal. 2:7
Yey na jewa' tane xubi'ij puwi juna ángel:
Ri'in quinu'an in Ukaw Rire
yey Rire cu'an Nuc'ajol Ri'in. 2 S. 7:14; 1 Cr. 17:13
6Yey ri Dios echiri' xutak lo Ruc'ajol che ruwachulew, jewa' xubi'ij: «Conoje ri ángeles re ri Dios quilok'nimaj uk'ij Rire» xcha'.
7Pakatzij wi ri Dios jewa' cubi'ij paquiwi ri ángeles:
Rire cu'an chique ru ángeles e aj chaquib re Rire,
e pacha' tew cawelelic y pacha' urepebal ak' Sal. 104:4
cacha'.
8No'j c'u chwi Ruc'ajol jewa' cubi'ij:
Rilal, Lal Dios yey ri takanic la na jinta utakexic
y ri k'atbal tzij e la, lic jusuc'.
9E lic cuc'ul c'u'x la ri lic jusuc' yey lic tzel quil la ri mac.
E uwari'che ri Dios, ri Dios e la, xucha' lo la
y xuya unimal qui'cotemal che'la;
ec'u más nim ri qui'cotemal xya' che'la
chwa ri qui'cotemal xya' chique ri jujun chic Sal. 45:6-7
cacha'.
10Yey je tanchi wa' cubi'ij:
Rilal, Lal Kajawal,
che ri jekebal lok Lal xyijban re ruwachulew;
y Lal 'anayom re ruwa caj ruc' ri k'ab la.
11Ronoje wa', xa caq'uisic,
no'j Rilal na jinta uq'uisic ri c'aslemal la.
Ri caj y ruwachulew xa cajaric jela' pacha' cu'an ri kak'u'.
12Yey Rilal cajalc'atij la ri caj y ruwachulew,
jela' pacha' cu'an junok echiri' cujal ruk'u':
caresaj ruk'u' k'e'l, cubusu y cucoj ri c'asak.
No'j Rilal na cajalc'atitaj ta wach la
y na jinta utakexic ri k'ij la Sal. 102:25-27
cacha'.
13Ec'u ri Dios na xubi'ij ta c'ana wa' che juna ángel:
Chat-tz'ula pa nuwiquik'ab,
y chawoye'ej na ri k'ij
echiri' quebenuya ri tzel quebilow awe
chuxe' rawakan. Sal. 110:1
14¿Sa' c'u ri' ri quiwach tak ri ángeles? E aj chaquib caquilok'nimaj ri Dios yey etakom lo che quito'ic ri quec'uluw ri colobetajic re ri Dios.
Currently Selected:
Hebreos 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.