Hebreos 2
2
Chojoca il che ri uk'alajisam ri Dios chike
1Ri Jesús e más c'o uwach chiquiwa ri ángeles; ruma c'u ri', lic chirajawaxic e más cojoc il che utakexic ri Utzilaj Tzij katom chwi Rire, cha' jela' na cakesaj ta kib chirij ri K'ijsak. 2Ma lic jiquil uwach Rutzij ri Dios, ri xtzijox ojertan cuma ri ángeles; conoje c'u ri xemacun chirij y xquipalajij wa' wa Tzij, lic takal chique janipa ri k'atbal tzij xquic'ulu. 3We ec'u xquic'ulumaj wa' rique, ¿su'anic c'u ri' cojcolobetaj ri'oj we na cojoc ta il che wa unimal colobetajic? Ma nabe na e ri Kanimajawal Jesucristo ri xtzijon puwi wa colobetajic; tec'uchiri' ri xetaw re, lic xquijiquiba' can uwach wa' chike ri'oj. 4Ec'u ri Dios lic ujiquibam can uwach wa' ruc' nimak tak c'utubal re ruchuk'ab, ruc' uq'uiyal uwach milagros y ruc' tak ri to'bal ya'tal chikajujunal ruma ri Ruxlabixel ri Dios, yey puk'ab c'u ri Dios c'o wi china chique cuya tak wi wa'.#Ro. 12:4-11
Ri Jesús xu'an ticawex cha' cojucolobej
5Puwi c'u wa cojtajin che ubi'xiquil, ri Dios uch'obom chic na cuya ta paquik'ab ri ángeles quetakan chwi ri c'ac' uwachulew chikawach apanok. 6C'o c'u jun jewa' xubi'ij chupa Ruch'a'tem ri Dios:
¿Sa' ruwach rachi cha' Rilal cacuxtaj la?
¿Sa' ruwach ri ralc'o'al ri ticawex cha' lic coc la il chique?
7X'an la che rachi xa jubik' chi xraj
cajunimax uwach cuc' ri ángeles.
Lic xyac la uk'ij,
xya la che lic c'o uwach
y xya la puk'ab catakan
puwi janipa ri x'an la che ruwachulew.
8E tak c'u ri' ri c'olic,
xya la ronoje puk'ab Sal. 8:4-6
xcha'.
Ronoje c'u ri c'olic cac'oji' puk'ab, ma e xraj ri' ri Dios; na jinta ne c'o xuya can ri Dios we na caya'i' ta puk'ab. Na ruc' ta c'u ri', cakilo c'amaja' ne cac'oji' ronoje puk'ab. 9Yey echiri' ri Jesús xu'an ticawex, e xkaj uwach uk'ij chiquiwa ri ángeles. Ec'u ri Dios ruma ri unimal rutzil uc'u'x, xuya luwar che ri Jesús xic'ow chupa ri camic paquic'axel conoje ri ticawex. Ruma c'u wa c'axc'obic xric'owibej, wo'ora más c'o uwach y más yacom uk'ij. 10Ri Dios e 'anayom re y e chapayom re ronoje ri c'olic. Yey lic xajawax c'u ri c'axc'olil xric'owibej ri Jesús, ri caya'w re ri colobetajic, ma ruma wa' ri Dios xutz'akatisaj uwach ruchac ri Jesús cha' jela' quebuc'am bi uq'uiyal ralc'o'al ri Dios chila' chicaj. 11Ri Dios e Ukaw ri Kanimajawal Jesucristo, ri caya'w ri santowilaj binic; yey e mismo Kakaw ri'oj, ri oj c'o chi che ri santowilaj binic. Ruma c'u la', ri Jesús na caq'uix taj cubi'ij chike ri'oj, oj uchak' Rire. 12Ma jewa' cubi'ij chupa Ruch'a'tem ri Dios:
Cantzijoj ri bi' la chiquiwach ri e watz-nuchak',
Cambixoj ri bi' la chiquixo'l ri tinamit la
echiri' quimolom quib. Sal. 22:22
13Je tanchi wa' cubi'ij:
Ri'in lic cancuba' nuc'u'x ruc' ri Dios. Is. 8:17
Yey je tanchi wa' cubi'ij:
Ri'in in c'o cuc' ri e ralc'o'al ri Dios,
ri ebuya'om Rire chwe Is. 8:18
cacha'.
14Konoje ri oj ticawex kekam kulewal kapoklajil. Ec'u ri Jesús xu'an ticawex pacha' ri'oj, cha' jela' quic'ow chupa ri camic pakac'axel ri'oj y ruc' wa' e xuch'ij uchuk'ab ri jun xc'oji' uchuk'ab re cacamisanic, wa' e ritzel winak. 15Xc'un c'u ri Cristo cha' queberesaj lo conoje ri chwi calaxic lok e c'o puk'ab ri xi'in ib ruma ri camic. 16Ma pakatzij wi Rire na xc'un ta che quito'ic ri ángeles, ma e xc'un che kato'ic ri oj ralc'o'al can ri Abraham. 17Jec'ula' lic xajawaxic ri Jesús xu'ana junam uwach kuc' ri'oj, ri kachak' kib ruc' Rire, cha' jela' e cu'ana Kajawal, ri cu'an jusuc' ruchac chwach ri Dios, yey ruc' c'axna'bal uc'u'x cach'aw pakawi' y ruma c'u Rire, ri Dios cucuy ri kamac konoje ri oj utinamit.#2:17 Pa ri ch'a'tem griego cubi'ij ri Jesús e ri ka “Sumo Sacerdote”. Rojertan wa' e ri cajawal raj chacunel pa Rocho Dios, ri cach'aw paquiwi ri tinamit y cuya chwach ri Dios ri kasa'n re awaj ecamisam re cuybal quimac. 18Ruma c'u xic'ow Rire pa c'ax y xc'am upa, jec'ula' wo'ora lic c'o uchuk'ab re cojuto'o echiri' cac'am kapa ri'oj.
Currently Selected:
Hebreos 2: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.