Hechos 4
4
Ri Pedro y ri Juan quec'am bi pa k'atbal tzij
1C'a quech'a't ne ri Pedro y ri Juan cuc' ri winak, echiri' xec'un lo raj chacunel re ri Rocho Dios, ri aj wach que ri e chajinel re ri Rocho Dios y jujun saduceos. 2Rique lic c'o coyowal chiquij ri Pedro y ri Juan ma quec'utun chiquiwach ri ticawex puwi ruc'astajibal lo ri Jesús chiquixo'l ri ecaminak,#4:2 Ri saduceos y jujun chique raj chacunel re ri Rocho Dios, na caquicoj taj we ri ticawex quec'astaj tanchi lo chiquixo'l ri ecaminak. jec'uwa' caquibi'ij: «Ruc'astajibal ri Jesús e c'utubal re, chikawach apanok ri ticawex quec'astaj lo chiquixo'l ri ecaminak» quecha'.
3Ec'u ri e aj wach re ri Rocho Dios xetakan che quechap bi ri Pedro y ri Juan. Yey ruma c'u lic benak k'ij chic, xebe'quiya'a pa cárcel cha' cata' quichi' c'a chuca'm k'ij. 4Pero chique ri xetaw re ri xubi'ij ri Pedro, lic e q'ui ri xcubi' quic'u'x ruc' ri Jesús; yey we quebajilax xew ri achijab, laj e wo'ob mil xecojow re Rire.
5Chuca'm k'ij c'ut xquimol quib pa ri tinamit Jerusalem raj wach que raj judi'ab cuc' ri nimak winak re ri tinamit y raj c'utunel re ri tzijpixab. 6C'o chiri' ri Anás ri cajawal raj chacunel pa Rocho Dios; yey e c'o ri Caifás, ri Juan, ri Alejandro y jujun chic c'o chux chique ri cajawal raj chacunel pa Rocho Dios.#4:6 Conoje wa' e cuq'uil ri uchapom wi rib ri k'atbal tzij. Quil nota Jn. 18:19 paquiwi ri Anás y ri Caifás. 7Xequiya c'u ri Pedro y ri Juan chiquinic'ajal y xquitz'onoj chique:
—¿China xya'w pik'ab o china pubi' xi'an ri'ix wa'? —xecha chique.
8Ec'u ri Pedro, ruc' ruchuk'ab ri Santowilaj Ruxlabixel ri Dios, xubi'ij chique:
—Tape alak, alak aj wach re ri tinamit y alak nimak winak re Israel, 9ma e wak'ij cata' kachi' puwi ri utz x'an che wa jun achi yewa' cha' queta'maxic su'anic xcunutajic. 10Ec'u ri' wo'ora cakak'alajisaj chiwach onoje alak y chiquiwach conoje ri tinamit Israel: Wa' wa'chi c'o chiwach alak xcunutaj chupa rubi' ri Kanimajawal Jesucristo re Nazaret, ri xcamisaj alak chwa cruz yey ri Dios xuc'astajisaj lo chiquixo'l ri ecaminak.
11»E pacha' ri cubi'ij Ruch'a'tem ri Dios:
E rabaj c'akital can cuma raj yacal ja,
e abaj wa' lic xajawaxic cha' catiqui' lo ri ja Sal. 118:22
cacha'.
Ralak e alak pacha' wa e aj yacal ja yey ri Jesús e ri Abaj. 12Xew c'u ruc' ri Jesús carikitaj colobetajic, ma na jinta chi juna bi'aj che ruwachulew ya'tal lo chique ri ticawex cha' ruma ri' cojcolobetajic —xcha'.
13Ec'u raj wach re ri tinamit xquilo ri Pedro y ri Juan na caquixi'ij ta c'ana quib quetzijon puwi ri Utzilaj Tzij, tob wa' wa'chijab na e ta tijotal pacha' rique yey xa ne e cuq'uil rachijab e aj chac re ri tinamit. Lic xcam c'u canima' ri' chique y xquimaj usuc' e janipa tak ri caqui'ano y ri quimajom ri Pedro y ri Juan, e ruma ri xec'oji' ruc' ri Jesús, ri quitijonel. 14Yey na utz tane c'u ri' caquibi'ij na cunutajinak ta ri sic, ma wa' wa'chi tac'al chiri' chiquiwach cuc' ri Pedro y ri Juan.
15Ec'u ri xqui'ano e xetakan che cha' ri Pedro y ri Juan quebel bi jok'otaj pa ri luwar re ri k'atbal tzij, y xew c'u xecanaj raj k'atal tzij cha' quech'a't chiquiwach. 16Jec'uwa' xquibi'ij chiquiwach: «¿Sa' ri caka'an chique wa'chijab? Ma ri c'utubal re cunanic 'anatal cuma rique,#Hch. 3:1-10 lic k'alajininak chiquiwach conoje ri ejekel Jerusalem yey lic na utz taj cakewaj. 17Ri ka'ana' e kaxibij quipa cha' na quetzijon ta chi c'ana chwach junok chupa rubi' wa jun achi, y jela' na que'ec ta chi utzijoxic wa'» xecha'.
18Xequisiq'uij c'u ri Pedro y ri Juan y lic xequitak che na quetzijon taj y na quec'utun ta chi ne c'ana pa rubi' ri Jesús.
19Pero ri Pedro y ri Juan xquic'ul uwach:
—Ch'obo pe ralak: ¿Usuc' nawi chwach ri Dios e cakacoj tzij ralak chwa ri cakacoj utzij Rire? 20Ma ri'oj, na utz taj cakok'otaj ubi'xiquil janipa ri kilom y ri katom —xecha'.
21Ec'u ri e aj wach lic xquixibij quipa. Tec'uchiri', xequiyolopij bi ma na xquirik taj su'anic quequiya pa c'axc'obic ruma caquixi'ij quib chiquiwach ri winak re ri tinamit. Ma conoje lic caquiyac uk'ij ri Dios ruma ri xquilo. 22Yey lic k'alaj e ruc' ruchuk'ab ri Dios x'ani' wi ri c'utubal re cunanic, ma wa'chi xcunutajic, ralaxibem sic yey ic'owinak chi pa cuarenta rujunab.
Ri quicojom rubi' ri Cristo caquitz'onoj quichuk'ab che ri Dios
23Echiri' xeyolopix bi, ri Pedro y ri Juan xebec cuc' ri cachbi'il y xquitzijoj chique janipa ri bi'tal bi chique cuma ri nimak e aj chacunel pa Rocho Dios y ri nimak winak re ri tinamit. 24Echiri' rique xquita wa', conoje xa jun quic'u'x xquijek caqui'an orar chwach ri Dios, jewa' caquibi'ij:
«¡Lal Dios Kajawxel, Lal 'anayom la ruwa caj, ruwachulew, ri mar y ronoje ri c'o che tak wa'! 25Yey ruma ri David ri aj chac la, jewa' xbi'ij la ojertan:
¿Su'chac lic quetucuc tak ri winak
yey tak ri tinamit xew caquino'jij ri na jinta uchac?
26Ma xquimol quib ri takanelab y ri e aj wach che ruwachulew,
xqui'an c'u xa jun che quib
y xebec chirij ri Dios Kajawxel
y chirij ri Cristo, Rucha'o'n lo Rire. Sal. 2:1-2
27Wa' lic katzij, ma chupa wa tinamit oj c'o wi, ri Herodes ruc' ri Poncio Pilato xquimol quib cuc' ri winak e aj Israel y cuc' ri na e ta aj Israel; yey junam c'u xeyactaj chirij ri Jesús, ri Santowilaj Aj Chac la, ri Jun xcha' lo la. 28Jec'ula', e xqui'ano janipa ri ch'obom lo la ojertan cha' e cu'ana na ri'.
29»Ec'u wo'ora, Kakaw, quil la ri xibibal quipa raj chaquib la qui'anom; ya'a c'u la ri chuk'ab la chique rique cha' na caquixi'ij ta c'ana quib caquitzijoj ri Ch'a'tem la. 30Ya'a ri k'ab la paquiwi' cha' chupa rubi' ri Jesús, ri Santowilaj Aj Chac la, quecunutaj ri yewa'ib y ca'ani' tak c'utubal re ri chuk'ab la» xecha'.
31Echiri' xquiq'uis u'anic orar, ri luwar pa quimolom wi quib xbarbatic y conoje xquic'ul ruchuk'ab ri Santowilaj Ruxlabixel ri Dios y jec'ula' na caquixi'ij ta c'ana quib caquitzijoj Ruch'a'tem ri Dios chiquiwach conoje ri winak.
Ri quicojom rubi' ri Cristo caquito' quib ruc' rubitak que
32Conoje c'u ruq'uiyal hermanos, ri xquicoj rubi' ri Cristo, lic u'anom xa jun canima' y xa jun quina'oj; y na jinta junok chique cu'an re che ri c'o ruc', ma rubitak que xu'an re chinima ronoje. 33Jec'ula' ri', ri e tako'n re ri Cristo ruc' unimal quichuk'ab quetzijon chwi ruc'astajibal ri Kanimajawal Jesús, yey ri to'bal re ri Dios c'o paquiwi conoje rique.
34Na jinta c'u junok cutij niba'il chiquixo'l, ma janipa ri c'o tak culew o c'o tak ja cuc', we c'o xquic'ayij, caquic'am lo ri rajil 35y caquiya c'u paquik'ab ri e tako'n re ri Jesús cha' rique caquijach chiquiwach ri hermanos e chirij tak ri cajawax wi chique chiquijujunal.
36C'o c'u jun achi José rubi', yey ri e tako'n caquibi'ij Bernabé che. (Wa' wa bi'aj que'elawi “bochi'inel”.)#4:36 “Bochi'inel”: Xcoj wa bi'aj che ri Bernabé, ma rire lic to'bel che unimarisaxic quic'u'x ri hermanos. Rire aj Chipre y e cuq'uil ri ralc'o'al can ri Leví. 37Wa' wa'chi xuc'ayij ch'akap rulew; tec'uchiri', xuc'am lo ri rajil y xuya paquik'ab ri e tako'n.
Currently Selected:
Hechos 4: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.