Hechos 3
3
Jun achi sic cacunutajic
1Xu'ana c'u chupa jun k'ij, ri Pedro y ri Juan junam xebec pa ri Rocho Dios che ri urox ora#3:1 “Ri urox ora”: Quil “hora” pa vocabulario. benak k'ij, ma e ora ri' re oración.
2Ronoje k'ij c'ut cac'am lo jun achi ralaxibem sic y caya' chwach ri Rocho Dios pa ri oquibal cabi'x che “Lic Chom” cha' cutz'onoj ulimoxna chique ri winak queboc bi. 3Ec'u rachi sic, echiri' xeril ri Pedro y ri Juan e ri' queboc bi chupa ri Rocho Dios, xujek quelaj chique cha' caquiya can ulimoxna.
4Ec'u ri Pedro junam ruc' ri Juan lic xquich'iquiba' ri quiwach puwi rachi, yey ri Pedro xubi'ij che:
—Chojtzu'u pe la —xcha che.
5Ewi ri sic xebutzu'u ma roye'em we c'o caquiya che.
6Pero ri Pedro xubi'ij che:
—Na jinta sakil puak wuc' y na jinta ne k'ana puak wuc'; no'j c'u ri c'o wuc' canya che'la. Chupa rubi' ri Kanimajawal Jesucristo ri aj Nazaret, yactaj la y bina la —xcha che.
7Ec'u ri Pedro xuchap che ruk'ab uwiquik'ab, xuyaco y chupa la' la jok'otaj xcowir ri rakan y rukul rakan. 8Y rachi xch'oplin chicaj, xtaq'ui'ic y xujeko cabinic. Junam c'ut cuc' ri Pedro y ri Juan, xoc bi pa ri Rocho Dios, cabinic, cach'oplanic y cuyac uk'ij ri Dios.
9Conoje c'u ri winak re ri tinamit xquilo rachi cabinic y lic cuyac uk'ij ri Dios. 10Y xqueta'maj e achi catz'uyi'ic y cutz'onoj ulimoxna chwach ri Rocho Dios pa ri oquibal cabi'x che “Lic Chom”. Lic c'u xcam canima' che ri x'ani' che rachi y na xquimaj ta c'ana usuc' cha'taj xcunutajic.
11Rachi xcunutajic na caresaj ta chi rib chiquij ri Pedro y ri Juan. Yey conoje ri winak caminak canima' che, xemoc ca'n pa ri luwar cabi'x che “Ruchi' Ja re Salomón”.
12Ec'uchiri' xril wa' ri Pedro, xubi'ij chique ri tinamit:
«Achijab alak aj Israel, ¿su'chac lic caminak anima' alak che wa xil alak? ¿Yey su'chac e cojtzutza' alak ri'oj pacha' oj ri xojbinisan re wa'chi ruc' ri kachuk'ab o ruma lic oj jusuc' ri'oj chwach ri Dios? Na e ta ri'. 13Ma e ri Dios que ri kamam ojertan, wa' e ri Abraham, ri Isaac y ri Jacob, ec'u Rire ri lic xuyac uk'ij ri Jesús ri Raj Chac Rire. No'j ralak xya alak ri Jesús puk'ab ri Pilato. Y na xew ta la', ma xc'ak bi alak uk'ij chwach ri Pilato y na xya ta alak luwar che rire cuyolopij bi ri Jesús echiri' xraj cuyolopij bi ruma na jinta mac xurik che. 14Ec'u ri' ralak na x'aj ta alak cayolopix bi wa' wa Jun lic nim uk'ij Santo y Jusuc'; ma e xtz'onoj alak cayolopix bi ri jun camisanel.#Lc. 23:17-20 15Xcamisaj c'u alak ri' ri aj ya'l c'aslemal, ri Jun xc'astajisax lo chiquixo'l ri ecaminak ruma ri Dios. Puwi c'u ri' wa c'astajibal cojtzijon wi ri'oj ma lic oj xojilow re.
16»E ruma ri cubulibal c'u'xaj ruc' ri Jesús, xcowir ri rakan wa' wa'chi quil alak y eta'am ne alak uwach. Yey ruma wa cubulibal c'u'xaj ruc' ri Jesús xcunutaj wa'chi pa sakil wi jela' pacha' catajin onoje alak che rilic.
17»Weta'am c'ut, alak katz-kachak', ri x'an alak e ruma na xmaj ta alak usuc', y jenela' ri' xqui'an raj wach re ri tinamit alak. 18Pero ruma ri x'an alak che ri Jesús, ri Dios xu'ana janipa rubi'im lo ojertan cuma ri k'alajisanelab echiri' xubi'ij Rucha'o'n lo Rire cutij c'ax.
19»E uwari'che tzelej tzij alak chwach ri Dios y ya'a c'u ib alak puk'ab cha' cacuytaj ri mac alak y cha' ri Kajawal Dios cuya uxlanem y utzil chomal chupa ri anima' alak. 20Jec'ula' ri Dios cutak na lo uc' alak ri Jesús, Rucha'o'n lo Rire, ri bi'tisim chi lo che alak ojertan. 21Tob c'u wo'ora lic chirajawaxic wi ri Jesús c'o chila' chicaj, copon na ri k'ij echiri' ri Dios cu'an tanchi c'ac' che ronoje jela' pacha' ri xubi'ij lo ojertan cuma ri k'alajisanelab ri xetak lo ruma Rire.
22»Ma ri Moisés xubi'ij chique ri kati'-kamam ojertan:
E ri Dios Kajawxel cuyac na lo chiquixo'libal ri katinamit Israel
jun K'alajisanel jela' pacha' ri'in.
Ec'u chita janipa ri cubi'ij Rire chiwe.
23Ec'u ri ticawex na cucoj ta utzij wa jun K'alajisanel, Dt. 18:15, 19
ri' quesax bi y na jinta chi re cuc' rutinamit ri Dios Lv. 23:29
xcha ri Moisés.
24»Conoje c'u ri k'alajisanelab quipetebem lo chwi ri Samuel, lic etzijoninak lo chwi tak wa' wa k'ij. 25Alak c'u ri cac'uluw re ri xubi'tisij ri Dios cuma ri k'alajisanelab y ruma ri tzij xu'an cuc' ri kati'-kamam ojertan, echiri' xubi'ij che ri Abraham:
Ruma c'u Jun chique rawalc'o'al,
quebenu'an bendecir conoje ruq'uiyal quiwach tak ri ticawex che ruwachulew Gn. 12:18
xcha'.
26»Ec'u ri Dios, echiri' xuc'astajisaj lo ri Raj Chac chiquixo'l ri ecaminak, xutak lo nabe uc' ralak re to'bel e alak cha' jela' chijujunal alak cajalc'atitaj ri binic silabic alak che ri na utz taj» xcha ri Pedro chique.
Currently Selected:
Hechos 3: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.