1 Timoteo 1
1
Ri Pablo cuya pan rutzil uwach ri Timoteo
1Ri'in in Pablo, in tako'n re ri Kanimajawal Jesucristo, intakom lo ruma ri Dios Kacolobenel y ruma ri Kanimajawal Jesucristo, ri kacubam pana kac'u'x ruc'. 2Cantz'ibaj pan wa' wa carta chawe ri'at Timoteo, ri pakatzij wi at nuc'ajol chupa rubi' ri Cristo ma wuma ri'in xacoj rubi' Rire. Chac'ulu c'u ri unimal rutzil c'u'xaj, ri relej c'u'xaj y ri utzil chomal re ri Kakaw Dios y re ri Kanimajawal Jesucristo.
Pixabanic puwi tak ri c'utunic na ube taj
3C'una chac'u'x ri ximbi'ij can chawe echiri' e ri' quin'ec Macedonia: E catcanaj can chupa ri tinamit Éfeso ma chiri' e c'o jujun ticawex lic junwi ri caquic'utu chwa ri cakac'ut ri'oj. Ximbi'ij c'u can chawe quebatak che na caqui'an ta chi wa'. 4Yey ximbi'ij can chawe cabi'ij chique ri hermanos maquiya ne quina'oj puwi tak ojer tzijobal na petinak ta ruc' ri Dios y tak ri caquibololej quibi' cati'-quimam re ojertan, ma tak la' cuc'am lo sachibal na'oj y na cato'b ta che ri caraj cu'an ri Dios kuc', yey wa' cu'ana xew ruma ri cubulibal kac'u'x ruc' Rire.
5Ruc'u'xibal ri cojutak ri Dios che e wa': Lic c'ax cakana' kib chikawach.#Ro. 13:8-10; Gl. 5:14 Yey cha' caka'an wa' chirajawaxic lic calax pa kanima' caka'an ri utz, cakamaj usuc' sa' ri utz yey e caka'ano, y pakatzij wi cacubi' kac'u'x ruc' Rire.
6No'j e c'o jujun quiya'om can ri caraj ri Dios; xquijalc'atij c'u ri quina'oj y wo'ora xew quech'a't chwi ri na jinta uchac. 7Rique cacaj caqui'an e aj c'utunel che quib chwi Rutzij Upixab ri Dios, tob na caquimaj tane usuc' ri caquibi'ij y na caquimaj tane usuc' ri c'utunic lic caquijiquiba' uwach.
8Pero ri'oj lic keta'am lic c'o cutikoj Rutzij Upixab ri Dios we jusuc' cakachapabej. 9Keta'am c'ut ri Tzij Pixab na xya'i' taj re cuk'at tzij paquiwi ri jusuc' quibinic quisilabic; ma xya'ic re cuk'at tzij paquiwi ri e aj palajiy tzij y ri na e ta cojol tzij, ri na jinta xi'in ib cuc' chwach ri Dios y ri e aj maquib, ri na queboc ta il che caquilok'nimaj uk'ij ri Dios y ri caquic'ak bi uk'ij ri Dios; ri e camisay quichu-quikaw cuc' ri e camisanel, 10ri caquetz'abej uwa quik'ij cuc' jujun chic na quic'ulel taj, rachijab caqui'an quic'ulel chique cach achijab, ri quequichap winak y na quequitzokopij ta ulok we na caya'i' ta puak chique, raj rak'ul, ri c'o caquijiquiba' uwach chupa rubi' ri Dios yey xa rak'ubal ri caqui'ano, cuc' tak c'u conoje ri caquipalajij ri sakil c'utunic re ri Dios. 11E c'utunic wa' c'o chupa ri chomilaj Utzilaj Tzij re ri Dios. Yey ri Dios, ri lic nim uk'ij, e xya'w wa' panuk'ab ri'in cha' cantzijoj.
Ri Pablo cutioxij ri rutzil uc'u'x ri Dios
12Ri'in cantioxij che ri Kanimajawal Jesucristo ma uya'om nuchuk'ab cha' can'an ruchac y ma xcubi' uc'u'x wuc' echiri' xuya wa jun chac chwe, 13tob rojertan ri'in lic xinmacun chirij ri Kanimajawal Jesucristo ma xebenuternabej ri quicojom rubi' y lic xebenuya pa tak c'axc'obic. Na ruc' ta c'u ri', ri Dios xjuch' ca'n uc'u'x chwe; ma echiri' xin'an wa', c'amaja' cacubi' nuc'u'x ruc' ri Cristo y na xinmaj ta c'u usuc' we ri can'ano na utz taj. 14Yey ri Kanimajawal lic xuc'ut ri unimal rutzil uc'u'x chwe y xuya chwe cacubi' nuc'u'x ruc' y xuya chwe canc'ut ri rutzil uc'u'x Rire; y wa' xew ri Kanimajawal Jesucristo caya'w re.
15Ec'u wa cambi'ij lic katzij y lic takal che caquicoj conoje ri ticawex: Ri Kanimajawal Jesucristo xc'un che ruwachulew cha' quebolu'colobej conoje raj maquib. Ec'u ri'in in jun chique wa'; yey chinuwach ri'in, in ne ri más c'o numac chiquiwa rique. 16Ec'u ri Kanimajawal Jesucristo xuc'ut ri c'axna'bal uc'u'x chwe ri'in ma xucuy numac tob lic in aj mac. Jela' xu'ano cha' cak'alajin ri rutzil uc'u'x chique conoje ri quecojow rubi'. Ma ri xu'an wuc' ri'in e c'utubal re ri cu'an cuc' ri cacubi' quic'u'x ruc' Rire, cucuy c'u quimac y cuya quic'aslemal na jinta utakexic.
17Ruma c'u wa', kalok'nimaj uk'ij ri Dios wak'ij ora y chikawach apanok.
Ma ri Dios Kajawxel
na jinta utakexic rutakanic,
na jinta utakexic ruc'aslemal,
na quilitaj ta uwach,
xew Rire e Dios
y reta'am ronoje.
Lic c'o yacbal uk'ij y unimal uchomalil.
18Wo'ora Timoteo, canya wa takanic chawe ri'at at nuc'ajol chupa rubi' ri Cristo: Chachuk'ubej awib chupa ri chac ya'om pak'ab e chirij ri xk'alajisax pawi' ri'at chwi rachac chwach ri Dios.#1 Ti. 4:14 19Chatiquiba' c'u ri cubulibal ac'u'x ruc' ri Cristo y chamaja usuc' sa' ri utz y e cha'ana ri'. Ma e c'o jujun na xqui'an ta wa', y ruma c'u ri' xsach ri cubulibal quic'u'x ruc' ri Cristo y na caquicoj ta chi ne ri K'ijsak. 20Jenewa' xqui'an ri Himeneo y ri Alejandro. Ruma c'u ri', xebenuya puk'ab ri Satanás cha' caquitij c'ax y jela' caquimaj usuc' na utz taj quech'a't chirij ri K'ijsak re ri Dios.
Currently Selected:
1 Timoteo 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.