2 Tesalonicenses 3
3
1Q'uisbal c'u re, hermanos, 'ana alak orar chwach ri Dios pakawi ri'oj cha' lic que'ec tan rutzijoxic ri Utzilaj Tzij re ri Kanimajawal che ronoje luwar y cha' cac'ul wa' chi utz cuma ri quetaw re jela' pacha' x'an ralak. 2'Ana alak orar chwach ri Dios pakawi ri'oj cha' na cojtzak ta paquik'ab ri winak lic itzel quic'u'x y na jinta quisuc', ma na conoje taj cacaj caquicuba' quic'u'x ruc' ri Jesús. 3Na ruc' ta c'u ri', ri Kanimajawal lic jusuc' ma e cu'an na pacha' ri ubi'im, ma Rire cujiquiba' c'u'x alak y cuchajij c'u alak chwach ritzel winak. 4Cubul c'u kac'u'x che wa': Ruc' ruto'bal ri Kanimajawal, ralak catajin alak che u'anic ri xkatak alak che y jela' ca'an c'u alak chikawach apanok. 5Ec'u ri Kanimajawal Jesucristo cato'w e alak cha' ri rutzil c'u'x alak cu'ana jela' pacha' ri rutzil uc'u'x ri Dios y cha' cach'ij alak uchuk'ab tak ri c'axc'obic ruc' unimal c'u'xaj jela' pacha' xu'an ri Cristo.
Chirajawaxic wi cojchacunic
6Hermanos, chupa rubi' ri Kanimajawal Jesucristo cakatak alak che cha' quesaj ib alak chiquij tak ri hermanos lic e xepu'ab, ri na caquitakej ta ri c'utunic xmaj can alak chikij. 7Lic eta'am c'u alak sa' ri lic chirajawaxic cac'am alak re che ri kabinic kasilabic ri'oj, ma echiri' xojc'oji' uc' alak, lic xojchacunic. 8Na xkatz'onoj taj xa casipax ri kawa, ma ronoje ri xya' chike, xkatojo. Ri xka'ano e lic xojchacun chipak'ij chichak'ab cha' jela' na coju'an ta oj eka'n chukul junok che alak. 9Wa xka'ano na e ta que'elawi na takal ta chike cojto' alak; ri xka'an wi e cha' camaj e alak chikij. 10Ma echiri' c'a oj c'o ne chila' uc' alak, xkatak alak che wa': «We c'o junok na caraj taj cachacunic, na takal ta che catzukic.» 11Yey wo'ora katom, e c'o jujun chixo'l alak na quechacun tane q'uenok; ri caqui'ano e caquimin quib che tak ri na jinta que che. 12E tak c'u wa' wa ticawex quekatak che y quekapixabaj pa rubi' ri Kanimajawal Jesucristo: Chechacunok re ch'acabal re ri quiwa#3:12 “Quiwa”: Wa' e que'elawi e ronoje ri cajawax chique. y chec'ola jusuc'.
13Yey ec'u ralak hermanos, macos alak che u'anic ri utz. 14We c'o junok na cutakej ta wa cakatz'ibaj pana che alak, k'alajisaj alak chinok y majunimaj ib alak ruc', cha' jela' caq'uix che ri cu'ano y cutzelej utzij. 15Pero ma'an alak che tzel quil alak; ri 'ana alak e pixabaj alak ma rire e jun ka hermano.
Q'uisbal uch'a'tem ri Pablo che riglesia c'o Tesalónica
16Ec'u ri Kanimajawal, ri aj ya'l utzil chomal, xaki chuya'a pawi' alak ri utzil chomal chupa tak ri quic'ow wi alak. C'ola ri Kanimajawal uc' onoje alak.
17Ri'in in Pablo, ruc' ri nuk'ab cantz'ibaj wa rutzil wach alak. Jela' can'an che tak ri nucarta, c'utubal re in ri quintz'iban re.
18C'ulu c'u alak ri unimal rutzil uc'u'x ri Kanimajawal Jesucristo. Amén.
Currently Selected:
2 Tesalonicenses 3: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.