El Apocalipsis 5
5
Attho Juanpaꞌ entan Cristo ñeñth atmaꞌntatareth Carnero, eꞌñe ñaptha toran Yompor poꞌlibro
1Allempoñapaꞌ alla nekwererr ñeñth anets all poꞌkonaño. Pototh poꞌkowenrothpaꞌ all nent all orrenan libro apkoꞌnothtatareth, eꞌñe emotoꞌmar akellkaꞌwareth oꞌponoth ñamha enoth. Echenan kanxherr ñeñth allo ayomrrareth attho eꞌñe echarr aphareth. 2Ñamha all nent poesheñarr mellañotheñ ñeñth atarr awamenkath. Ñañapaꞌ rrana womenk, ñeñthpaꞌ ateth oten:
—Eseshaꞌwakaꞌ eꞌñe kowenareꞌ kothapeꞌchetsña Yomporekop ñeñthchaꞌ toreꞌ añ Yompor poꞌlibro allo echarr apharethtena.
3Tharraña amaꞌt poesheñarrapaꞌ ama eñalle ñeñthchaꞌ toreꞌ Yompor poꞌlibro. Amaꞌt poesheñarra ñeñth entoꞌtsen ñamha amaꞌt ñeñth patsoꞌtsen ñamha amaꞌt ñeñth oꞌponoꞌtsen patso, ama eñalle ñeñthchaꞌ moenatet ñeñthchaꞌ toreꞌ Yompor poꞌlibro atthoch eñorachet. 4Napaꞌ ñeñthña atarr neyarreꞌ attho amaꞌt poesheñarrapaꞌ ama neñche ñeñth eꞌñe kowenareꞌ es kothapeꞌchets Yomporekop ñeñthchaꞌ moenatet oꞌch toran Yompor poꞌlibro ñeñthchaꞌ eñorateꞌ. 5Allempoña ñeñth epoch xharrasheña ñeñth poechetsa paꞌtats ñeñth sherbeneꞌ Yompor, poesheñarrñapaꞌ oten:
—Amach peyawatsto, tharroꞌmar eñall poesheñarr ñeñth eꞌñe pokteꞌ ñeñthchaꞌ toreꞌ Yompor poꞌlibro ñeñth kanxherr allo echarr apharethtena, tharroꞌmar ñapaꞌ ñeñth metanaꞌtweꞌ allowen paꞌnamen topateñtsoxhno, ñeñthñapaꞌ añepaꞌt Cristo ñeñthara atmaꞌntatareth Maꞌñor. Ñeñthpaꞌ judámerenaꞌtar ñeñthara David poꞌmhreneñ.
6Nekwererr, allñapaꞌ nent Cristo ñeñth tomaꞌntenaya Carnero. All then eꞌñe rroxho alloꞌtsaꞌyen Parets poꞌkonañ ñamha añ paꞌtatsoꞌmar ñeñth berrmaꞌthtetsa ñamha eꞌñe alloꞌtsaꞌyen ñeñth sherbeneꞌ Yompor. Eꞌñe rroxho all then Cristo ñeñth atmaꞌntatareth Carnero. Orrtena ateth ñerraꞌmrratheꞌ carnero ñeñth amtsarethtetsa ochñartsokop. Ñeñth carneropaꞌ kanxherr poꞌwkor, echenan ñamha kanxherr paꞌklleꞌ. Ñeñth kanxherr paꞌklleꞌpaꞌ ñeñthpaꞌ añ Yompor Poekamkëñ ñeñthara kanxherr ñeñthchaꞌ sherbhaꞌyesets eꞌñe poꞌpoñeꞌttsokma ora errakmañen añe patsro allchaꞌ amñarethetyerret. 7Allempoña añ Carneropaꞌ oꞌ wapa oꞌ xhap alloꞌtsen Yompor ñeñth anets all poꞌkonaño. Ñañapaꞌ chetsosan Yompor poꞌlibro ñeñth orren poꞌkowenroth. 8Oꞌ chetan libropaꞌ allempoña añ ñeñth paꞌtatsoꞌmar berrmaꞌth ñamha ñeñth epoch xharrasheña ñeñth poechetsa paꞌtats ñeñth sherbeneꞌ Yompor, allowenetñapaꞌ konkorpaꞌrrteñet Cristo ñeñth atmaꞌntatareth Carnero. Poesheñaꞌttsetpaꞌ orrenet arpa ñamha pajoꞌ ñeñth orotaten all anareth ñeñth atarr eñmosathtetsa Yomporekop. Ñewa, añ ñeñth eñmosathtetsa añ tomaꞌntena ñeñth attho maꞌyochena ñeñth poeyochreshaꞌ pen Parets. 9Añña ñeñth konkorpaꞌrrtetsapaꞌ ñetñapaꞌ morrechenet ñeñth etserra morreñets ñeñthpaꞌ ateth axhoteñet Cristo ñeñth atmaꞌntatareth Carnero:
Phapaꞌ eꞌñe kowenareꞌ es pephaꞌyen ñeñthoꞌmar eꞌñe pokteꞌ phach cheteꞌ Yompor poꞌlibro, eꞌñe pokteꞌ phach toreꞌ allo echarr apharethtena tharroꞌmar phapaꞌ pha amtsarethtatsa, perrasoña phapaꞌ allo petsaꞌtwonaya yoꞌchñar allochñapaꞌ atthoch eꞌñe poechemer perrey Yompor amaꞌt alloweney ñeñthey paꞌnamen acheñey, amaꞌt erraꞌtsena mereñtsorey alloth yewena, amaꞌt ñamha erraꞌtsena ñoñtsor allo yeñosyen eꞌñe poꞌpoñeꞌttsokma, amaꞌt ñamha paꞌnamenanaꞌtarey allowen errowanen ñeñth eꞌñe yaꞌnetser yephaꞌyen.
10Ñeñthey alloweneypaꞌ pha yemnateneꞌ oꞌch yaꞌmhchaꞌtarethtapretapha atthochña yesherbhapreteneph Yompor ñeñth atarr Parets. Atthoña yekorneshaten Partsokop. Ñamha atthoch yaꞌmhchaꞌtarethterra añe patsro.
11Allempoña alla nekwererr oꞌ neꞌmoererr mellañotheñneshaꞌ ateth eñosyenet. Shontet nanak cheꞌmoechenet all rroxhtampeñet aꞌyowen errapharen. Ñamha ñeñth berrmaꞌthtetsa all ñamha ñeñth sherbeneꞌ Yompor ñeñth allowenet maꞌpotantoꞌmaretpaꞌ ñeñth eꞌñe rroxhtampeneꞌ Yompor ñeñth anets all poꞌkonaño. 12Ñeñth mellañotheñneshaꞌ ñetñapaꞌ eꞌmorrtenet womenk all axhoteñet Cristo ñeñth atmaꞌntatareth Carnero. Ñeñthpaꞌ ateth otenet:
Cristo ñeñth tomaꞌntenaya Carnero ñeñth amtsarethtatsa, ñapaꞌ eꞌñe kowenareꞌ es phaꞌyen ñeñthoꞌmarña ñapaꞌ eꞌñe pokteꞌ awamenkathtena, agapanepaꞌ shonteꞌ esokmañen ñamha eꞌñe pokteꞌ eñotañtepaꞌch, ñamha eꞌñe pokteꞌ partsotepaꞌch, ñamha eꞌñe pokteꞌ amhchaꞌnaꞌtpawotepaꞌch. Ñamha eꞌñe pokteꞌ ya yekowentateñoth yaꞌyeꞌchoxhtatoñepaꞌch.
13Allempoña neꞌmoerrerr ateth amaꞌt allowen ñeñth Yompor poeyexhkatar ayeꞌchoxhtateññañet Yompor amaꞌt ñeñth entoꞌtsaꞌyen ñamha amaꞌt allowen ñeñth patsoꞌtsaꞌyen, ñamha allowen ñeñth oꞌponoꞌtsen patso ñamha oño. Amaꞌt eꞌñe allowen poeyexhkatar ñeñth alloꞌtsaꞌyen allowenet ayeꞌchoxhtateññañet Yompor, ateth otenet:
Yaꞌyeꞌchoxhtatoñepaꞌch Yompor ñeñth anets poꞌkonaño ñamha Poechemer Cristo ñeñth atmaꞌntatareth Carnero. Amhchaꞌnaꞌtpawepaꞌch yenteñ, yekowentatoñepaꞌch tharroꞌmar ñetpaꞌ atarr awamenkathet thayotheñ amaꞌt errponañowen.
14Ñamha ñeñth berrmaꞌthtetsa paꞌtatsoꞌmar all ñetñapaꞌ otenet:
—Ñeñthpaꞌ atthetepaꞌch.
Ñamha añña ñeñth sherbeneꞌ Yompor ñeñth epoch xharrasheña ñeñth poechetsa paꞌtats oꞌ konkorpaꞌrrtet all maꞌyocheñet Yompor ñeñth ama arromñatheshayaye.
Currently Selected:
El Apocalipsis 5: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.