El Apocalipsis 4
4
Attho Juanpaꞌ entan Yompor poꞌkonaño eꞌñe alla poeꞌntaño
1Allempoñapaꞌ alla gatyerrnerr poꞌpoñ. Nekwerrerr, allñapaꞌ nentos yetarr atorareth allchaꞌ nebeꞌthos oꞌch nexhap ento. Alla neꞌmoerrerr ñoñets ñeñth ateth eꞌmorrtetsa ñorraꞌ atarr womenk ateth ñerraꞌmrratheꞌ poktor atarr womenk eñen. Ñeñthña ñoñetspaꞌ ateth oten:
—Aphon arr, oꞌch pebeꞌthosampesna oꞌch negatyesaph allowen ñeñthchaꞌ ateth perrtsa tsapathoneth.
2Allempoña Yompor Poekamkëñ eꞌñe chorrenna, attho nexhap ento all nentos poesheñarr alla anen poꞌkonaño. 3Ñeñth anets all poꞌkonañopaꞌ atarr nanak kowen aspanamkokëno poptamkoꞌtena ateth ñerraꞌmrratheꞌ mapoeꞌ ñeñth atarr kowen poptetsa ñeñth otenet jaspe. Ellonethpaꞌ poꞌpoñontho atarr nanak kowen tsamkokëno poptamkoꞌtena ateth ñerraꞌmrratheꞌ mapoeꞌ ñeñth otenet cornalina. Ñamha allo arkaꞌtampenapaꞌ ñeñthpaꞌxhoꞌña ateth ñerraꞌmrratheꞌ ayon tharraña ñeñthpaꞌ atarr nanak kowen aspano shemashro poptena; eꞌñe ateth poptena ñerraꞌmrratheꞌ mapoeꞌ ñeñth otenet esmeralda. 4Ñamha tophñoꞌmar ñeñth rroxhtampeneꞌ all shonteꞌ poꞌpoñ konañexhno. Ñeñth konañexhno tophñoꞌtsaꞌyen ñeñth rroxhtampeneꞌ alloꞌtsen epoch xharraꞌ poechena paꞌtats. Ñamha ñeñth anorrxhets allowen konañexhno ñeñthpaꞌxhoꞌña alloꞌtsen epoch xharrasheña poechena paꞌtats ñeñth sherbeneꞌ Yompor all poeꞌntaño. Koxhneshareret paꞌshtam atarr wallamaꞌtharer, poꞌchoyoꞌmet oro ayexhkatareth ñeñth choyoꞌmhtenet. 5Eꞌñe rroxh konañothpaꞌ alloth wena meratsteꞌ, alloth wena ñamha tatsteꞌ. Allpaꞌ atarr womenk maꞌmoreten. Eꞌñe alla allameꞌtets poꞌkonaño ñewapoth alloꞌtsen kanxherr werare ñeñth woretyets all. Ñeñthpaꞌ ñeñth tomaꞌntenaya Yompor Poekamkëñ ñeñth kanxherr ñeñth sherbhaꞌyets eꞌñe poꞌpoñeꞌttsokma. 6Eꞌñe alla aꞌyeneth poꞌkonañoth all orrtena errakmañen ateth ñerraꞌmrratheꞌ ñeñth añekmoen rerpat ñeñth eꞌñe orrtatweneꞌ ora ñeñth allpon eñall all.
Alloꞌtsen poꞌkonañ eꞌñe paꞌtatsshemhtoꞌmaroth all thomxhen paꞌtats ñeñth berrmaꞌthtetsa. Ñeñthñapaꞌ shonteꞌ paꞌklloꞌyexhno emota kowaꞌyen. Paꞌchkoꞌtagothpaꞌxhoꞌ shonteꞌ paꞌklleꞌ alloth kowen. 7Ñeñth ñanom ñeñth berrmaꞌthtetsa all, ñeñthpaꞌ eꞌñe ateth ñerraꞌmrratheꞌ maꞌñor. Poꞌpoñpaꞌ alloꞌtsen ñamha ateth ñerraꞌmrratheꞌ toro, poꞌpoñ paꞌtsaꞌpoth paꞌklloyothpaꞌ eꞌñe ateth orrtena ñerraꞌmrratheꞌ acheñ. Poꞌpoñ all orrtena atthemaꞌth ñerraꞌmrratheꞌ ñeñth otenet águila esempo anena. 8Ñeñth paꞌtatsoꞌmar berrmaꞌthpaꞌ eꞌñe apaꞌpaꞌyetharerochet, patheꞌtetspaꞌ echenan pechapaꞌttsokmoet paꞌpoeꞌ penet. Paꞌpaꞌyoth enothpaꞌ eꞌñe aklloꞌyetharerochet, poellekaꞌnothpaꞌxhoꞌña aklloꞌyethareret emotoꞌmar alloth kowaꞌyenet. Eꞌñe ellapeneteꞌth arepeneteꞌth all axhoteñet Yompor, amaꞌt mameshapaꞌ ama ameseneto attho axhoteñet Yompor. Ñeñthpaꞌ ateth otenet:
Parets, parets, parets ñeñthara Yompor ñeñth atarr awamenkath nanak ñeñth Yepartseshar yepen ñeñth xhokma eñall. Amaꞌt awathotheñ eñall ñamha ñeñthara ñeñthchaꞌ ello werrtsa poꞌpocheño.
9Ñamha ñeñth berrmaꞌthtetsa allpaꞌ kowentateññañet Yompor ñeñth anets all poꞌkonaño, atarr amhchaꞌnaꞌtpoꞌ enteñet, ñamha xhokma poemaꞌyocheñothet parasyosoꞌteñet Parets ñeñth ama arromñatheshayaye amaꞌt awatha. 10Ñetpaꞌ ñerraꞌm esempo ayeꞌchoxhtateñet Parets, añña ñeñth epoch xharrasheña ñeñth poechetsa paꞌtats ñeñth sherbeneꞌ Yompor allpaꞌ ñetpaꞌxhoꞌña oꞌchxhoꞌ konkorpaꞌrrtenet eꞌñe all ñesho, oꞌchxhoꞌ maꞌyocheñet ñamet Yompor ñeñth ama arromñatheshayaye amaꞌt errponaña. Allothpaꞌ oꞌch aꞌmeyet poꞌchoyoꞌmh oꞌchxhoꞌ net eꞌñe Yomporeshoneth ñeñth anets all poꞌkonaño. Oꞌchxhoꞌ ayeꞌchoxhtateñet Yompor ñamet, ñeñthpaꞌ ateth otenet:
11Yompore, ñeñtheph Yepartseshareph, ñeñtheph nanak Partsoph, ya añ poktetsa oꞌch yekowentatonaph ñeñtheph amhchaꞌnaꞌtpaweph ñamha atarr awamenkatheph. Tharroꞌmar pha yexhkatyeneꞌ ora allpon ñeñth eñall, eꞌñe pha pemneññoth awoꞌt eñalletyesa, eꞌñe pha peñoñoth awoꞌt yexhkaꞌyena ñeñth allpon eñall.
Currently Selected:
El Apocalipsis 4: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.