Efesios 6
6
Arrpaꞌ all kothapeꞌchatan cheshaneshaꞌ epoet pamoꞌmteꞌ
1Theꞌ cheshaneshachaꞌ oꞌch notas ñeñth poktetsa sokop ñeñthchaꞌ ateth sepha. Eꞌñe sameꞌñeñoth Yepartseshar Cristo xhokmoepaꞌch eꞌñe kowen sameꞌñeña sompor ñamha sachor, tharroꞌmar ñeñth poktetsa sokop. 2“Ñamha eꞌñe semorrenteñoth somporpaꞌ xhokmoepaꞌch semhchaꞌnaꞌch ñamha sachor” tharroꞌmar ñeñthpaꞌ ñeñth eꞌñe ñanom ateth ot Yompor ñeñthchaꞌ ateth yepeñ yamoꞌmteꞌ allochñapaꞌ atthoch eꞌñe kowen aꞌnatenya Yompor. 3“Atthoch paꞌnateñothes eꞌñe kowenpaꞌ atomatchaꞌ sokrrena arr patsro.”
4Theꞌpaꞌ oꞌch notas samha ñeñthes pamoꞌmteꞌ pen cheshaneshaꞌ, seꞌmoñeꞌteñothpaꞌ amach saꞌtsrreꞌmareꞌtatatsche sakñetharneshaꞌ. Eꞌñechña añethollotheñ eꞌñe sekwampeñoth kowenpaꞌ oꞌch seyxhatyenanet eꞌñe kowen atthoch ñetpaꞌxhoꞌña oꞌch ameꞌñeret ñamet Yepartseshar Cristo. Ñamha amach semnatatstaneto oꞌch attha atarr athpareꞌtaset.
Arrpaꞌ all kothapeꞌchatan atarwasañ epoet poꞌpatronar
5Theꞌpaꞌ oꞌch notas samha ñeñthes atarwasatarethes ñeñth poktetsa sokop. Xhokmach sameꞌñya ñeñth setarwasateneꞌ arr patsro. Amaꞌt erraꞌtsena apoenset ñeñthchaꞌ setarwas sephaꞌ eꞌñechña semhchaꞌnaꞌteñoth setarwasen eꞌñe kowen seyoxhrokmañen. Amaꞌt acheñekpa setarwasenpaꞌ atethchaꞌ setarwasen ñerraꞌmrratheꞌ Cristokop setarwasen.
6Amachña eꞌñe poekwampeñothesa semaꞌyoreꞌteno tarwasats atthoch eꞌñe kowen sokshach sepatronar atthoch eꞌñe pokteꞌ entenes. Añchaꞌña amaꞌt acheñekpa setarwasenpaꞌ eꞌñechña ateth sesherbeñ kowen ñerraꞌmrratheꞌ Cristo sesherben. Eꞌñechña seyoxhrokmañen sepena kowen ñeñth ateth moenen Yompor. 7Eꞌñe semneññothpaꞌ eꞌñech kowen soksheñeshokmañen setarwasen tharroꞌmar ama ñaptha acheñekop setarwaseno, Yomporekpaꞌnaña setarwasen. 8Theꞌ sapaꞌ eꞌñe señoteñ amaꞌt erraꞌtsentheꞌ kowen es yephaꞌyen, Yepartsesharñapaꞌ xhokmach alla apwerrey eꞌñe poesheñaꞌttsoy ñeñthchaꞌ atarr kowen yokshaterreꞌ amaꞌt añ acheñer ñeñth atarwasatareth amapaꞌ añ acheñer ñeñth eꞌñe kowenoꞌtsen, atthekmach apaꞌyeswerranet ñeñthchaꞌ atarr kowen koshaterrawet ñet.
9Ñamha theꞌpaꞌ oꞌch notas ñeñthes tarwasatets. Sapaꞌxhoꞌña atethchaꞌ sepoñ saꞌtarwasañer ñeñth ateth poktetsa, amachña xha sechemamaꞌtyenaneto. Señochepaꞌch sapaꞌxhoꞌña sechen Samoꞌmteꞌ Cristo ñeñth poeꞌntañoꞌtsen. Ñeñthara ñeñth Pamoꞌmteꞌ pen allowen saꞌtarwasañreneshaꞌ. Ñamha ñapaꞌ ama poesheñaꞌttsa morrenteno.
Ñeñth apoeney Yompor ñeñthchaꞌ yemoñenaya atthoch amach alla aꞌpoerrataterrye oneñeth
10Allowanen arr necartoth oꞌch masheñneshachaꞌ ñamha noxhaneshachaꞌ notas, awamenkathepaꞌch phas Yepartseshar tharroꞌmar ñapaꞌ ña atarr awamenkathtetsa. 11Ñeñthoꞌmarña añ poktetsa yokop oꞌch yagërrñañ ora allpon ñeñth apoeney Yompor allochñapaꞌ ñeñthchaꞌña yemoñenaya atthoch amach alla aꞌpoerrataterrye oneñeth. Tharroꞌmar yeñoteñ oneñethpaꞌ xhokma eꞌnenan atthoch shekareꞌteney. 12Tharroꞌmar poꞌñoxhpaꞌ ama acheñeyeꞌ yekhllareno ñeñth entpoꞌ poꞌchets. Yapaꞌ añña yekhllaren oneñethexhno ñeñth ama erroth aphapawo eꞌñe ya yototh tharroꞌmar ñeñthpaꞌ ama entpawoyaye poꞌchets errothentheꞌña. Tharraña ñeñthpaꞌ atarr amhchaꞌnoxhetyena ñamha atarr awamenkathexhno. Atthoña pomnaren penan allowen acheñeneshaꞌ arr patsro ñeñth phatseꞌtyeneꞌ ñeñth ama kowenayaye ñeñth chekmetoꞌtsena. Ñeñthara oneñethexhno ñeñth ama kowenayeꞌ yexhkatetso ñeñth errakmañen amhchaꞌnoxhetyetsa entoth. 13Ñeñthoꞌmarña notenes, oꞌch sagërrñañ allowen allpon ora ñeñth apoeney Yompor allochñapaꞌ ñeñthchaꞌña allo yemoñena atthoch amach alla aꞌpoerrataterrye oneñeth ñerraꞌm esempo atarr nanak topateney. Tharraña amaꞌt allempo paꞌnamenoth atarr topateney yañapaꞌ amach errothenoth aꞌpoerrataterrye. 14Theꞌpaꞌ oꞌch neñotatas ñeñth apoeney Yompor ñeñthña yemoñenaya atthoch ama aꞌpoerrataterrye oneñeth allempo topateney. Ñatoꞌ oꞌch netmaꞌntacha ñeñth ateth paꞌnamen chorraꞌyena solltarneshaꞌ allempo kellarenet.#6.14 Ñewa, ñeñthpaꞌ ateth chorraꞌyeseꞌth awath solltarneshaꞌ allempo kellareteꞌth. Ñeñth ñanom ñeñthpaꞌ Yompor poꞌñoñ ñeñth eꞌñe poꞌnoxh ama shekëñtsoyaye amaꞌt mamesha. Ñeñthoꞌmarña yapaꞌ eꞌñech yeñmañeshaꞌ es yephaꞌyen, amach yeshkareꞌtannaꞌtyesatsto. Ñatoꞌ oꞌch netmaꞌntacha ñeñthpaꞌ ñeñthña yechanar yepen ñeñthchaꞌ awamenkath yepeꞌ ateth ñerraꞌm solltar apoeñet chanarets alloch chanena ñeñth kellaraten. Elloñapaꞌ eꞌñepaꞌch kowen es yephannaꞌtyesnoma ñeñth ateth eꞌñe pokteꞌ enten Yompor. Ñeñthpaꞌ añ tomaꞌntena asrom ateth ñerraꞌmrratheꞌ ñeñth chorrena solltar ñeñth aꞌnateneꞌ poesomap allempo kellarena. 15Theꞌñapaꞌ oꞌch seꞌshpoꞌcha eꞌñe soksheñeshaꞌ oꞌch awes allchaꞌ seserrpareꞌtyenaꞌ attho Yomporpaꞌ oꞌ amoꞌtsterrya atthochña eꞌñe kowen aꞌkeshphaterrey. Ñeñthpaꞌ añ tomaꞌntena ateth pena solltar oꞌch nan poꞌsapatpaꞌ oꞌch awoꞌ allchaꞌ kellarosa. 16Elloña ñeñth nanak sherbets ñeñthpaꞌ añ, xhokmoepaꞌch eꞌñe kowen yeyemteña Yompor ñeñth ateth oteney. Ñeñthpaꞌ añ tomaꞌntena solltar poeꞌskodo allo aꞌnatena allochñapaꞌ atthoch ama etarethteneto. Ñewa, attho womenk topateney oneñeth ñatoꞌ oꞌch netmaꞌntacha ñerraꞌmrratheꞌ ñapaꞌ xho sanapecheney poꞌchopapho ñeñth woretnets. Tharraña ya eꞌñe yeyemteñoth Yompor ñeñthpaꞌ ñeñthña yeꞌskodo yepen ñeñthchaꞌ xhokma emayeneꞌ oneñeth poꞌchopaph ñeñth woretnets allo sanapecheney. 17Ñamha yapaꞌ yeñoteñ Yomporpaꞌ theꞌpaꞌ oꞌ aꞌkeshphaterrey, ñeñthña yemoñenaya. Ñeñthpaꞌ añ tomaꞌntena ateth pena solltar oꞌch naꞌnman asret poño atthoch ama ettoꞌcheto. Ñamha oꞌch yerrmoñ Yompor poꞌñoñ yeyoxhro ñeñth ateth eñotateney ña Poekamkëñoth; ñeñthpaꞌ ñeñthña yepanmet yepen alloña yekhllareñña oneñeth. 18Ñamha sapaꞌ xhokmoepaꞌch semaꞌyochena amaꞌt errothenoꞌtsensa. Añchaꞌña seyenpoeneꞌ Parets Poekamkëñ. Allochñapaꞌ atthochña xhokma semaꞌyoxhrena maꞌyochatsa. Oꞌch senamh Yompor ora allpon ñeñth sepalltena, ñamha xhokmoepaꞌchña eꞌñe semaꞌyochampesweña allowen ñeñth poeyochreshaꞌ pen Parets. 19Napaꞌxhoꞌña xhokmoepaꞌchña semaꞌyochampenna. Oꞌch senamon Yompor nokop allochñapaꞌ ñachña neꞌñorateneꞌ atthoch amach nemhchaꞌnañotha neserrpareꞌteññañe poꞌñoñ. Allochñapaꞌ atthochña neñotatyesanet kowen ñoñets ñeñth alloch eꞌñe yekeshphaꞌwerra alloweney; ñeñthpaꞌ ama eñotpawoyaye, amaꞌt awathotheñ. 20Napaꞌ allsensarethen ñeñthen eñosyets eꞌñe kowen Yomporekop. Eꞌñe neñosyeñoth Yomporekop ñeñthoꞌmarña theꞌpaꞌ yottampennet. Ñeñthoꞌmarña nemneñ oꞌch semaꞌyochampenna atthoch amach nemhchaꞌnañotha neserrpareꞌteno ñeñth eꞌñe kowen ñoñets alloch yekeshphaꞌwerra. Atthochña eꞌñe noksheñeshokmañen neserrpareꞌten tharroꞌmar ñeñth eꞌñe kowen ateth poktetsa nokop.
Arrpaꞌ all soꞌtnerranet eꞌñe poꞌcartoth
21-22Theꞌñapaꞌ oꞌch notas, oꞌch nemñonas masheñ Tíquico ñeñth atarr nemorrentena. Ñapaꞌxhoꞌña xhokma atarr kowen thorrena Yepartsesharekop. Ñapaꞌ ñeñthoꞌmarña oꞌ nemñe sesho allochñapaꞌ ñach señotatwerreꞌ ñeñth ateth yepena ya arr. Atthochña atarr koshatwerres seyoxhro.
23Theꞌña masheñneshachaꞌ ñamha noxhaneshachaꞌ, Yomporepaꞌchña semorrentannaꞌtataya eꞌñe sameꞌñeñoth, ñeñthara Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ seyoxhro. 24Ñamha ñetepaꞌchña eꞌñe saꞌnatenaya allowenes ñeñthes eꞌñe kowen morrentenaya Yepartseshar Jesucristo. Ñeñth attho semorrenteñapaꞌ amach awañañathterro amaꞌt eꞌñe awatha. Ñeñthach notas, ñeñthpaꞌ atthetepaꞌch Nompore. Allowa.
Pablo
Currently Selected:
Efesios 6: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.