Efesios 5
5
Ñeñthey poechemer pen Yomporpaꞌ oꞌch yorrtaten ñeñth ateth moenen ña
1Yomporpaꞌ atarr morrentenya, atthoña eꞌñe poechemer peney. Ñeñthoꞌmarña yokoppaꞌxhoꞌña añ poktetsa oꞌch yorrtateññañ ñeñth ateth kowenareꞌ es phaꞌyen ña ñeñth Yeyomporer yepen. 2Elloña Cristopaꞌ atarr morrentenya. Ñeñthoꞌmarña eꞌñe pokteꞌ eñch atthoña poma ñañeña attho rroma yokop ateth peteꞌth awath allempo moetseteꞌth carnero Yomporekop. Ñeñthña eꞌñe kowen enteꞌth Yompor eꞌñe ateth ñerraꞌmrratheꞌ ñeñth allo atarr eñmosathtamphsacheteꞌth awath ña. Attho atarr morrentya Cristo, yokoppaꞌxhoꞌña añ poktetsa eꞌñech kowen yemorrentannaꞌtwena.
3Ñamha amach yephaꞌyesatsto ñeñth ama pokteyeꞌ enteno ña. Amaꞌt parrocha amach yechtatsche ñeñth ama yethaporeyaye, ñamha koyaneshaꞌpaꞌ amach agapatstano ñeñth ama poerrollareyaye. Ñamha amaꞌt mameshapaꞌ amach yephatsto ñeñth atarr sosyaꞌtsañetyets ñamha ama es ayeꞌchapretannaꞌtpawo. Ñeñth ateth poktetsa allowenakpay ñeñthey poeyochreshaꞌ oꞌ perrey Parets. Allochñapaꞌ amaꞌt parrochapaꞌ amach errothenoth otyetoꞌ yapaꞌ attho yepena. 4Ñamha serrpareꞌtatseꞌteñets sosyaꞌtsañ ñeñth ama aserrpareꞌtpawoyaye ñeñthoꞌmarña yapaꞌ amach ateth yephatsto amaꞌt mamesha. Ñamha otatseꞌteñets ñeñthpaꞌ ama sherbeno Yomporekop ñeñthoꞌmarña yapaꞌ amach ateth yephatsto. Ñamha allokchameꞌtanneñets ñeñth ama ayellsheñeꞌchpawoyaye allo, ñeñthpaꞌxhoꞌña amach ateth yephatsto. Añchaꞌña yapaꞌ Yomporepaꞌchña yeparasyosoꞌten. 5Sapaꞌ señoteñ ñeñth kañoreshaꞌtetspaꞌ amach es oꞌpaterroña Yomporesho amaꞌt eꞌñe esempaña allchaꞌ amhchaꞌtarethterra Cristo epoet Pompor. Ñamha allowen ñeñth eñoteneꞌ paꞌnamen sosyaꞌtsañ, ñeñthpaꞌxhoꞌña amach es oꞌpatatarethterrtsoña all amhchaꞌtarethtena Yompor. Ñamha ñeñth atarr es yeꞌchapretetsa añña poꞌyomporer pen ñeñth atarr es yeꞌchatseꞌtateneꞌ. Ñeñthoꞌmarña ñapaꞌxhoꞌña amach es oꞌpatateñoña Yompor all amhchaꞌtarethtena. 6Amach seꞌmhñotatsche acheñ ñeñth moeneneꞌ oꞌch shekareꞌtas oꞌch otas ñeñthchaꞌ ateth sephatseꞌta samha ñeñthpaꞌ eꞌñe pokteꞌ Yomporekop. Tharraña napaꞌ oꞌch notas, ñeñthpaꞌ ama poꞌñoxhoyaye, tharroꞌmar Yomporpaꞌ xhokmach koñchatwerran allowen ñeñth ateth athpareꞌtetsa, ñeñthpaꞌ oꞌ eꞌñe notwanmas. 7Ñeñthoꞌmarña theꞌpaꞌ oꞌch notas, sapaꞌ amach sokshapretatstaneto ñeñth ateth phatseꞌtyenet.
Ñeñth ateth yorrtatyen allempo oꞌ yokrrerra eꞌñe kowen poetaro
8Ñewa, sapaꞌ awathpaꞌ poꞌñoxh eꞌñe ateth sokshapretatseꞌtyeseꞌth allempo sapaꞌ chekmeta sokrraꞌyeseꞌth. Tharraña theꞌ eꞌñe seyemteñoth Yepartseshar oꞌ xhapatonas seyoxhro ñeñth kowen enten ña. Ñeñthoꞌmarña theꞌ sokoppaꞌ añ poktetsa oꞌch sorrtateññañ ñeñth kowen enten ña, attho sapaꞌ oꞌ sokrrerra poetaro. 9Ñewa, ñerraꞌm poetaroch yokrrena, ñeñthpaꞌ atethchaꞌ yorrtatyen. Eꞌñech kowenakma es yephannaꞌtyena ñeñth eꞌñe pokteꞌ enten Yompor ñamha ñeñthpaꞌ ama shekëñtsoyaye amaꞌt mamesha. 10Ñamha sokoppaꞌ añ poktetsa oꞌch semaꞌyoxhra eñotnomoeꞌ ñeñthchaꞌ atarr kowen entapretenes Yepartseshar. 11Ñamha theꞌpaꞌ oꞌch alla noterrserr, amach sokshapretatsche ñeñth ateth phatseꞌtyenet, ñeñthpaꞌ ama es sherbeno amaꞌt eꞌñe mamesha. Tharroꞌmar ñetpaꞌ chekmeta korrenet. Sapaꞌ añchaꞌña sorrtatyen ñeñth eꞌñe kowenareꞌ allochñapaꞌ atthoch eñochet ñeñth ateth phatseꞌtyenet ñet, ñeñth amaꞌt mameshapaꞌ ama kowenayeꞌ enteñe Yompor. Ñeñthpaꞌ ñatoꞌ yapaꞌ oꞌch yot, yapaꞌ oꞌ yaꞌpoetarsamphsanet ñet ñeñth ateth phatseꞌtyenet chekmeto. 12Ñewa, sapaꞌ señoteñ ñeñth ateth phatseꞌtyenet aꞌnawa. Ñerraꞌm yaꞌmetheꞌpaꞌ ñeñthpaꞌ atarr apenkoxhen. 13Ñamha ñerraꞌm yaꞌpoetarsamphsanet ñet ñeñth phatseꞌtyenet ñeñth ama kowenayaye, atthoña ñetpaꞌ oꞌch xhapanet poeyoxhro ñeñth ateth penet ñetpaꞌ poꞌñoxh ama kowenayaye. 14Ñeñthoꞌmarña sokoppaꞌ ateth axhotenes añ ñoñets:
Phapaꞌ ñeñtheph ateth phatseꞌtyetsa eꞌñe attheph ñerraꞌm xha atarr rroma pemoen. Theꞌñapaꞌ oꞌch peꞌmanerra oꞌch petanterra attho rroma pemoen. Cristopaꞌ ñach phaꞌpoetarsamperreꞌ.
15Ñeñthoꞌmarña theꞌpaꞌ oꞌch notas: Señota eꞌñe errothentheꞌ sephaꞌyen, ñatoꞌ kowentheꞌ ñatoꞌ amatheꞌ kowenayaye. Amach ateth sephatsto ateth ñerraꞌmrratheꞌ ñeñth ama es eñotetso. Añchaꞌña ateth sephaꞌyes ateth ñerraꞌm ñeñth atarr es eñotets ñeñth kowentetsa Yomporekop. 16Theꞌpaꞌ arosña attha es poexhatstatsa xhochña yethorra Yomporekop tharroꞌmar theꞌ acheñeneshaꞌ atarr sosey yexhkatyenet arr patsro. 17Ñeñthoꞌmarña notenes amach attha es sepxhatsto ñeñth ateth pena ñeñth ama es eñotetso. Sapaꞌ añchaꞌña oꞌch señotoñ ñeñth ateth moenen Yepartseshar ñeñthchaꞌ ateth yepha ñeñth kowen enten ña. 18Ñamha oꞌch notas, amach seposaꞌtatsto; ñeñthpaꞌ xhach kothapeꞌchatenes sosyaꞌtsañexhno atthoch aꞌpoerrataterres. Amach seposaꞌtatsto, añepaꞌchña sechorrenaya ñeñthchaꞌ sokshateneꞌ ñeñthara Parets Poekamkëñ. 19Añepaꞌchña eꞌñe sokshapretannena ñeñth ateth saxhoteñ Yepartseshar. Eꞌñepaꞌchña soksheñeshaꞌ seyoxhrokmañen semorrechena allo yaꞌyeꞌchoxhtateññañ Parets, ñamha allowen morreñtsoxhno ñeñth Partsokop. 20Eꞌñe yeyerpoeñoth Yepartseshar Jesucristo xhokmoepaꞌch yeparasyosoꞌteññañ Pompor allowenakop paꞌnamenakop. 21Eꞌñe semorrenteñoth Cristopaꞌ eꞌñepaꞌchña kowen sameꞌñannena. Atthochña yekowentateññañ Cristo.
Arrpaꞌ all kothapeꞌchatan yakma epoet poethapor
22Ñeñthes arrollarethes oꞌch notas, añ pokteꞌ serrollarpaꞌ ñachña eꞌñe sameꞌñena ateth yepeñ ñamha Yepartseshar Cristopaꞌ ñachña eꞌñe sameꞌñena. 23Tharroꞌmar serrollarpaꞌ añ poktetsa atethchaꞌ senteñ ñerraꞌmrratheꞌ samoꞌmteꞌ sepeñ. Atthekma yepena yamha alloweney ñeñthey ameꞌñetsa, añ Yamoꞌmteꞌ yepen Cristo ñeñth yekwampeneꞌ. Tharroꞌmar ñapaꞌ oꞌ aꞌkeshphaterrey ñeñthey oꞌ poꞌchets perrey. 24Ñeñthoꞌmar añ pokteꞌ serrollarpaꞌ ñach pomnaren sepeneꞌ allowenakop, atthekmay yamha ñeñthey ameꞌñetsapaꞌ añchaꞌ pomnaren yepeneꞌ Cristo.
25Theꞌpaꞌ oꞌch notas samha ñeñthes athaporethes, añ poktetsa eꞌñech kowen semorreñcha sethapor. Oꞌch semoerya nanak ateth peney Cristo atarr moerenya yamha ñeñthey ameꞌñenaya ña. Ñeñthoꞌmarña poemorrenteñothey ya ñapaꞌ eꞌñe pokteꞌ eñch oꞌch rroma yokop. 26Allochñapaꞌ atthochña eꞌñe eꞌshowerrnay allowen yoꞌchñar oꞌch aꞌkowentaterrey Partsokop. Ñewa, ñeñth tomaꞌntena allempo yapatarethterra Yomporekop. Ñamha poꞌñoñpaꞌ ñeñthña eꞌñe yaꞌkowentaterreꞌ. 27Allempoña oꞌ yaꞌkowentatarethterrapaꞌ ñapaꞌ moeneñ oꞌch agërrey alloweney ñeñthey ameꞌñenaya ña. Ñamha ya attho oꞌ yaꞌkowentatarethterrapaꞌ amach alla eñalleterreꞌthe amaꞌt mamesha ñeñthchaꞌ yaꞌsosyaterrayerr. Amach alla enterryeꞌthe attho ama kowenayeꞌ yorrteno amaꞌt errothena. Eꞌñechña yaꞌkowentatarethterra Partsokop. 28Poꞌñoxhpaꞌ ñeñthes athaporethespaꞌ añ poktetsa sokop eꞌñepaꞌch kowen semoerya sethapor eꞌñe ateth atarr semorrentena sañeña. Tharroꞌmar ñerraꞌm atarr yemorrenteña yethapor yaꞌnaña atarr morrentetsa, tharroꞌmar yethaporpaꞌ ñeñthara yechets yepen. 29Ñewa, yapaꞌ yeñoteñ amaꞌt eꞌñe poesheñarrotheya ama yetsenaꞌtenoña eꞌñe ya yechets. Xhochña eꞌñe kowen yerren eshekchaꞌ eꞌñe womenknaꞌntateney. Eꞌñech kowen yekwen eꞌñe ya yechets. Atthekma peney ñamha Cristo atarrchaꞌ kowampeney ya alloweney ñeñthey ameꞌñenaya ña. 30Tharroꞌmar ñapaꞌ ña eꞌñe poꞌñoxh poꞌchets phoweney ya. Paꞌnamenoth poꞌchets phaꞌyeney alloweney ñeñthey ameꞌñenaya ña. 31Ñewa, Yompor poꞌñoñ ñeñth akellkareth awathotheñ ñeñthpaꞌ ateth oten: “Ñeñthoꞌmarña ñerraꞌm esempo yesnaꞌta amapaꞌ koyaneshaꞌpaꞌ oꞌch echan poerrollar, añ pokteꞌ oꞌwañchaꞌ tama yeyemteña yachor ñamha yompor. Allochñapaꞌ atthoch eꞌñe yeparrokmaten epay yethapor. Atthoña eꞌñe epsheñoꞌmareypaꞌ eꞌñech pathrra yechets yepen.” 32Ñeñthpaꞌ awathotheñ ama eñotpawoyaye ñeñth tomaꞌntatenya añ kothaphñats. Tharraña theꞌpaꞌ napaꞌ noten añ yetmaꞌntenaya ñeñth atarr kowen ñeñth attho eꞌñe yeparrokmaten epay Cristo alloweney ñeñthey ameꞌñenaya ña, ñeñthara ñeñth poꞌchets yepeneꞌ alloweney. 33Ñeñthoꞌmarña oꞌch alla noterrserr, eꞌñe poesheñaꞌttsospaꞌ eꞌñepaꞌch kowen semoerya sethapor ateth atarr semorrentena eꞌñe sañeña. Ñamha ñeñthes koyaneshaspaꞌ oꞌch notas, añ poktetsa ñamha sokop semorrenteñothpaꞌ sameꞌñyach serrollar, ñamha eꞌñech kowen senteñ.
Currently Selected:
Efesios 5: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.