SEFANAIA 1
1
Ena cudruvi sara ko ira na Juta ni sa ka levu na nodra i valavala ca, 1-18.
1A vosa i Jiova ka yaco vei Sefanaia na tagane na luve i Kusi, na luve i Kitalaia ka tagane, na luve i Amaraia ka tagane, na luve i Esekaia ka tagane, e na gauna i Josaia na luve i Emoni, na tui Juta.
2Au na vakarusa laivi sara na ka kecega mai na dela ni vanua, sa kaya ko Jiova. 3Au na vakarusa na tamata kei na manumanu; au na vakarusa na manumanu vuka, kei na ika ni waitui, kei na veika era tarabe kina, kei ira talega na tamata ca; ia ka'u na muduka tani na tamata mai na vanua, sa kaya ko Jiova. 4Au na dodoka talega na ligaqu me'u tabaki ira na Juta, kei ira kecega na kai Jerusalemi; ia ka'u na muduka tani mai na yasana oqo na tamata sa vo vei Peali, kei na yacadra na Kimerimi, ko ira vata kei na bete; 5kei ira era sa soro e na dela ni veivale ki na kalokalo ni lomalagi; kei ira era sa soro ka bubului vei Jiova, ka bubului vei Malikami; 6kei ira era sa vuki tani vei Jiova; ka ra sa sega ni vakasaqarai Jiova, se tarogi koya.
7Mo tiko lo e na mata ni Turaga ko Jiova: ni sa voleka mai na siga i Jiova: ni sa vakarautaka ko Jiova e dua me vakamatei, ka sa lesi ira sa sureta ko koya.
8Ia ena yaco e na siga ni veivakamatei i Jiova, au na cudruvi ira na turaga kei ira na gone vakaturaga, kei ira kecega era vakaisulu e nai sulu ni kai tani. 9E na siga talega ko ya au na cudruvi ira kece era ladeva nai lago ni katuba, ka vakasinaita na veivale ni nodra turaga e nai yau ni veivakayanaki kei na veivakaisini.
10Ia ena yaco e na siga ko ya, sa kaya ko Jiova, ena rorogo na domo ni tagi mai na matamata-ni-koro ni ika, kei na qoqolou mai na kenai karua ni yasa ni koro, kei na veivakacacataki levu mai na veiulu-ni-koro. 11Dou qoqolou, na lewe i Makitesa, ni ra sa vakarusai kece na mataqali dauveivoli; sa ra muduki kece tani na daucola siliva.
12Ia ena yaco e na gauna ko ya, ka'u na kauta eso na cina ka qara voli e Jerusalemi, ka cudruvi ira na tamata era vaka na waini sa cevata tu e na kena soko, era kaya e lomadra, Ena sega ni cakava na ka vinaka ko Jiova, ena sega talega ni cakava na ka ca. 13Ia na nodra i yau ena tauri mei toki ni valu, kei na nodra veivale sa na rusa: ka ra na tara vale, ka ra na sega ni tiko kina; ka ra na tea na veiwere-ni-vaini, ka ra na sega ni gunuva na kena waini.
14Sa voleka mai na siga i Jiova na siga ka uasivi, sa voleka mai, io sa kusa sara mai; a domo ni siga i Jiova, sa ka rarawa na nona tagi kina na tamata qaqa. 15A siga ni cudru na siga ko ya, na siga ni ca kei na rarawa, a siga ni veivakacacani kei na veivakarusai, a siga butobuto ka loaloa, a siga ni o kei na butobuto levu, 16a siga ni davui kei na kaila ni valu, ki na veikoro vakabai, kei na veivale ni valu e cecere. 17Ia ka'u na vakararawataki ira na tamata, a ra na lako voli me vakataki ira na mataboko, ni ra sai valavala ca vei Jiova: ia na kedra dra ena sovaraki me vaka na kuvu-ni-soso, kei na lewedra me vaka na de-ni-manumanu. 18Io, na nodra siliva kei na nodra koula ena sega ni vakabulai ira rawa e na siga ni cudru i Jiova; ia ena kania na vanua taucoko na bukawaqa ni nona vuvu: ni na vakidacala sara na nona vakaoti ira laivi na lewe ni vanua.
Currently Selected:
SEFANAIA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific