SEFANAIA 2
2
Era sa vakaroti me ra veivutuni, 1-3. Ena cudruvi ko ira na kai Filisitia, 4-7, kei Moapi, kei ira na Amoni, 8-11, kei Iciopea, kei Asiria, 12-15.
1Dou soqoni kemudou vata, io, dou soqoni vata, na matanitu sa sega ni domoni; 2ni sa bera ni yaco dina na ka sa lesi; ni sa bera ni oti yani na siga me vaka na qa ni sila; ka ni sa bera ni yacovi kemudou na cudru waqawaqa i Jiova, ni sa bera ni yacovi kemudou na siga ni cudru i Jiova. 3Dou vakasaqarai Jiova, oi kemudou kece sa yalomalumalumu e na vanua, oi kemudou sa cakava na nona lewa; dou qara mada na yalododonu, vakasaqara na yalomalumalumu: dou na vuni beka kina e na siga ni cudru i Jiova.
4Ia ko Kesa, ena biu laivi; ko Asikiloni talega, ena rusa: ko Asitoti, era na vakasava tani e na siga levu; ena cavuivuvu talega ko Ekironi. 5E ca vei ira sa tiko mai baravi, na matanitu vaka Kireci! a vosa i Jiova sa tauci kemudou; I Kenani, na vanua ni kai Filisitia, au na vakarusai iko, me kakua e dua me tiko kina. 6Ia na baravi ena yaco me nodra i tikotiko kei na nodra vale ni tiko nai vakatawa, kei na kedra bai na qele ni sipi. 7Ia na baravi ena nodra na vo ni mataqali i Juta; era na vakania kina na sipi: era na koto sobu e na yakavi e na veivale mai Asikiloni: ni na talevi ira ko Jiova na nodra Kalou, ka vakalesui ira tale mai na nodra veivakabobulataki.
8Au a rogoca na nodra veivakalialiai ko ira na Moapi, kei na nodra vosa vakacaca na Amoni, era vakalialiai ira kina na noqu tamata, ka vakalevulevui ira ki na nodra i yalayala. 9O koya oqo, me vaka na dina ni noqu bula, sa kaya ko Jiova ni lewe vuqa, na nodra Kalou na Isireli, ena yaco dina kina ko Moapi, me tautauvata kei Sotoma; ka na yaco ko ira na Amoni, me ra tautauvata kei Komora; me vanua ni kau karokaroa, kei nai keli masima, io, me vanua lala tu ga, ka tawa mudu: a kena vo ni noqu tamata ena vakacacani ira, io, na kena vo ni noqu matanitu ena taukeni ira. 10Na ka oqo ena kedra e na vuku ni nodra viavialevu, e na vuku ni nodra ia na veivakalialiai kei na nodra vakalevulevui ira vei ira na mataqali i Jiova ni lewe vuqa. 11Sa na daurerevaki vei ira ko Jiova, ni na vakawaletaki ira kecega na kalou kei vuravura; ka ra na dui cuva vua ko ira na tamata yadua mai na nona yasana, io, na lewe ni veiyanuyanu kecega e na veimatanitu.
12Oi kemudou talega na kai Iciopea, dou na vakamatei e na noqu i seleiwau.
13Ena dodoka talega na ligana, me tauca na mata ni tokalau, ka vakarusai Asiria; ena cakavi Ninive talega me vanua lala, me dausiga me vaka na veikau. 14Ia na qele ni manumanu ena koto kina, io na manumanu kecega ni veivanua: ia na pelikani kei na belo ena mai ro ki na domodomo ni kena duru; e dua na domo ena tagi mai na katuba; ena rusa nai lago ni katuba; io, nai botani sitari sa vakarairaitaka mai ko koya. 15Sai koya oqo na koro daumarau ka dautiko wele, ka kaya e lomana, Sai au ga, ka sega tale e dua; na kena yaco me koro lala, mei davodavo ni manumanu kila! ko ira kece era lako volekata era na vakasiusiu, era na kurea na ligadra.
Currently Selected:
SEFANAIA 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific