CAKACAKA 1
1
Sa yalataka na Yalo Tabu kivei ira na nona tisaipeli ko Jisu, 18. Sa rairai mai vei ira e le rua na agilose, ni sa kau cake ko Jisu ki lomalagi, a rau sa tukuna ni na lako tale mai emuri ko koya, 911. Era sa soqoni vata ki Jerusalemi ka daumasu, 1214. Sa digitaki ko Mataiasa mei apositolo, mei sosomi kei Jutasa, 1526.
1I Ceofilo, au a vola nai vola eliu, kei na ka kecega sa vakatekivu me cakava ka vakatavuvulitaka ko Jisu; 2ka yacova na siga sa kau cake kina ko koya, ni sa tauca oti e na Yalo Tabu na nonai vakaro vei ira nai apositolo, ko ira ka digitaka ko koya: 3ka sa vakarairaitaki koya talega vei ira, ka sa levu na kenai vakadinadina, ni sa bula tale mai na nona mate, ka ni sa daurairai vei ira ka bogi vasagavulu, ka vosataka na veika ni matanitu ni Kalou. 4Ia, ni sa soqoni vata kei ira, sa vakarota me ra kakua ni lako tani e Jerusalemi, me ra waraka ga na vosa ni yalayala i Tamana, ko koya, dou a rogoca maivei au: 5e dina ka dauveipapitaiso ko Joni e na wai; ia sa bogi vica ga, dou na qai papitaisotaki e na Yalo Tabu.
6Ni ra sa qai soqoni vata era sa tarogi koya, ka kaya, Kemuni na Turaga, ko ni na vakayacori ira na Isireli me ra matanitu tale e na gauna oqo, se segai? 7A sa kaya vei ira ko koya, Sa sega ni nomudou mo dou kila na kena gauna, se na kena yabaki, sa lewa duaduaga kina ko Tamaqu: 8ia dou na rawata na kaukauwa, ni sa lako mai vei kemudou na Yalo Tabu; dou na qai dautukuni au mai Jerusalemi, kei Jutia taucoko, kei Samaria, ka yacova nai yalayala kei vuravura.
9Ia ni sa tukuna oti na veika oqo ko koya, sa qai kau cake, ni ra sa vakaraica tiko; a sa dua na o sa tabonaki koya mai na matadra. 10Ia ni ra sa rai matua ki lomalagi, ni sa lako yani ko koya, raica, e le rua na tamata sa tu voleka vei ira erau vakaisulu vulavula; 11a rau sa kaya, Oi kemudou na kai Kalili, dou sa tu ka rai matua ki lomalagi e na vuku ni cava? ko Jisu oqo ko koya sa kau tani cake vei kemudou ki lomalagi, ena lako tale mai vakakina me vaka dou sa raici koya ni sa lako ki lomalagi.
12Era sa qai lesu tale ki Jerusalemi mai na ulu-ni-vanua sa vakayacani ki na veiolive, sa voleka ki Jerusalemi me vaka ga na kena yawa sa dau lakovi e na dua na siga ni vakacecegu. 13Ia ni ra sa curu ki loma, era sa cabe ki nai taba loma ni vale ecake, era sa dautiko kina, ko Pita, kei Jemesa, kei Joni, kei Adriu, kei Filipi, kei Tomasi, ko Pacolomiu, kei Maciu, ko Jemesa na luve i Alifio, kei Saimoni e dua vei ira sa vakatokai Na gumatua, kei Jutasa na taci i Jemesa. 14Era sa gumatua kecega ko ira oqo, a ra sa lomavata e na kerekere kei na daumasu, kei iratou talega na yalewa, kei Meri na tina i Jisu, kei iratou na tacina.
15Ia e na gauna ko ya, sa tu cake kina ko Pita e na kedra maliwa na veiwekani (ni sa wili vata na yacadra era sa le dua beka na drau ka ruasagavulu,) a sa kaya, 16Oi kemudou na veiwekani, e dodonu me vakayacori na tiki-ni-Vola Tabu oqo, ka vosataka eliu na Yalo Tabu e na gusu i Tevita, e na vuku i Jutasa, ko koya ka liutaki ira era sa tauri Jisu: 17ni sa wili vata kei keda ko koya, a sa lesi ki na cakacaka oqo. [18Ia na tamata oqo sa volia e dua na tiki ni vanua e nai voli ni nonai valavala ca; a sa lutu ka saumakidule kira, a sa kacabote na boto ni ketena, a sa kasabura kecega na nona wawa: 19a sa kilai na ka oqo vei ira kecega sa tiko mai Jerusalemi: a sa vakatokai kina na tiki ni vanua ko ya e na nodra vosa, Akelitama, o koya ko ya, Na vanua ni dra.]
20Ni sa volai e nai vola ni Same, Me lala didi na nona vale, Ia me kakua na tamata me tiko kina: ia, Me dua tani me taura na nonai tavi.
21O koya sa dodonu kina, me dua mada vei ira na tamata era sa tiko vata kei keda e na gauna kecega sa tiko kina kei keda na Turaga ko Jisu, 22sa vakatekivu mai na papitaiso i Joni, ka yacova na siga sa kau cake kina vei keda ko koya, me lesi ko koya me tukuna vata kei keda na nona tu cake tale mai na mate.
23A ra sa lesia e lewe rua, ko Josefa sa vakatokai ko Parisapa, a yacana talega ko Jusitu, kei Mataiasa. 24Era sa qai masu, ka kaya, Oi Kemuni na Turaga, ko ni sa kila na yalo ni tamata kecega, mo ni vakatakila mai se ko cei vei rau oqo ko ni sa digitaka, 25me nonai tavi na cakacaka vakaiapositolo oqo, sa sivo tani maikina ko Jutasa, me lako ki na nona yasana. 26A ra sa qai vakawiri madigi e na vukudrau, a sa bale vei Mataiasa; a sa wili vata kina ko koya kei ira nai apositolo e le tinikadua.
Currently Selected:
CAKACAKA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific