CAKACAKA 2
2
Sa soli na Yalo Tabu vei ira nai vavakoso lewe ni soro, 1—13. Sa vunau ko Pita, 14—36. Era sa veivutuni eso, ka papitaisotaki, 37—40. A sa veilomani sara ko ira kecega sa vakabauta, 41—47.
1Ia ni sa yaco sara na siga ni Penitiko, era sa tiko lomavata ko ira kecega e na dua na tikina. 2Sa qai lako vakasauri mai lomalagi e dua na rorogo, e vaka na cagi vakacevaruru kaukauwa, a sa vakasinaita na vale taucoko era sa tiko kina. 3A sa rairai vei ira na ka e vaka na veiyameyame ni bukawaqa sa dui veisebayaki, a sa tiko yadua vei ira vakaaduaga. 4A ra sa vakasinaiti kecega e na Yalo Tabu, a ra sa vakatekivu me vosataka na vosa tani eso, me vaka sa solia vei ira na Yalo Tabu me ra cavuta.
5A sa tiko mai Jerusalemi na kai Jutia eso, a tamata lotu, mai na veivanua kecega e ruku i lomalagi. 6Ia ni sa rogovaki yani na ka oqo, era sa soqoni vata na lewe vuqa, a ra sa kurabui ni ra sa dui rogoci ira na tamata yadua ni ra sa vosataka na nona vosa. 7A ra sa kidacala kecega ka kurabui, ka kaya vakai ira, Raica, era sa sega li ni kai Kalili ko ira kecega oqo era sa vosa? 8ia ka vakaevei oqo ni da sa rogoca koi keda kecega, e na noda vosa eda a sucu kaya? [9ko ira na kai Paricia, kei Mitia, kei Ilama, kei ira sa tiko mai Mesopotemia, kei Jutia, kei Kapatosia, mai Ponito, kei Esia, 10mai Firijia, kei Pamifilia, mai Ijipita, kei na yasayasa vaka-Lipea e voleka ki Kirini, kei ira na vulagi mai Roma, ko ira na kai Jutia, kei ira sa vuki ki na lotu vaka Jiu, 11ko ira na kai Kiriti kei Arepea,] eda sa rogoci ira ni ra sa tukuna e na noda vosa na nona cakacaka e veivakurabuitaki na Kalou. 12A ra sa kurabui kecega, ka taqaya, ka sa veikayaka vakai ira, A cava nai balebale ni ka oqo? 13A sa vakalialia ko ira eso tani, ka kaya, Era sa mateni e na waini vou.
14Sa qai tu cake ko Pita, kei ira na le tinikadua, ka sa tabalaka cake na domona, ka tukuna vei ira, Oi kemudou na kai Jutia, kei kemudou kecega sa tiko e Jerusalemi, mo dou kila na ka oqo, ka rogoca na noqu vosa: 15ni ra sa sega ni mateni ko ira oqo, me vaka na ka dou sa nanuma; ni sa kenai katolu ga ni aua. 16Ia sai koya ga oqo sa tukuna na parofita ko Joeli: 17Sa kaya na Kalou, Ena yaco e na gauna maimuri, Ka’u na sovaraka na Yaloqu kivei ira na tamata kecega: A ra na parofisai kina ko ira na nomudou gonetagane kei ira na nomudou goneyalewa, Ia ena raica na raivotu eso ko ira na nomudou cauravou, Ia ena tadrataka na tadra eso ko ira na nomudou qase: 18Io, vei ira talega na noqu tamata kei na noqu vada, Ka’u na sovaraka na Yaloqu e na gauna ko ya, a ra na parofisai kina: 19Ia ka’u na vakatakila na ka e veivakidacalataki eso mai lomalagi ecake, Kei nai vakatakilakila eso e vuravura era; A dra, kei na bukawaqa, kei na o kubou: 20Ena vuki na mata-ni-siga me butobuto, Kei na vula me dra, Ena qai yaco emuri na siga i Jiova, Sa levu ka rogo tiko: 21Ia ena yaco, ko koya yadua ena masuta na yaca i Jiova, ena bula.
22Oi kemudou na tamata na Isireli, rogoca na vosa oqo; Ko Jisu na kai Nasareci, a tamata sa vakadinadinataka vei kemudou na Kalou e na cakacaka-mana, kei na ka e veivakurabuitaki eso, kei nai vakatakilakila eso, sa solia na Kalou kivei koya me cakava e na kemudou maliwa, me vaka dou sa kila: 23ko koya, ni sa soli oti yani vei kemudou, me vaka ka nakita dina na Kalou ka lewa eliu, dou sa taura ka vakota ki na kauveilatai ka vakamatea e na ligadra na tamata ca; 24ko koya sa vakatura cake na Kalou, ni sa sereka nai vau ni mate; ni sa sega ni rawa me vauci tikoga kina ko koya. 25Ni sa vosataki koya ko Tevita, ka kaya, Au a raici Jiova tikoga ni sa tu e mataqu, Ni sa tu ko koya e na ligaqu i matau, me’u sega kina ni yavavala; 26O koya sa reki kina na yaloqu, a sa marau kina na yamequ; Ena vakacegu talega na lewequ e nai nuinui; 27Ni kemuni ena sega ni biuta na yaloqu mai etesi, Se biuta na nomu Le dua yalosavasava me vuca mai: 28Ko ni sa vakatakila mai vei au na sala ni bula; Ko ni na vakasinaiti au e na marau mai na matamuni. 29Oi kemudou na veiwekani, dou vosota me’u doudou ni’u sa tukuni Tevita na qase vei kemudou, ni sa mate ko koya ka bulu, ka sa tu ga vei keda na nonai bulubulu ka yacova na siga oqo. 30Ia ni sa parofita ko koya, a sa kila ni sa bubului vua na Kalou, ni na tubu maivua ko ira ena vakatubura maikina ko koya na Karisito, me vaka na lewena, me tiko e na nonai tikotiko vakaturaga: 31ia ni sa kila eliu, sa tukuna na nona tu cake tale mai na mate na Karisito, ni na sega ni biu tu mai etesi, se na vuca mai na lewena. 32Ko Jisu oqo sa vakatura cake na Kalou, ka sai vakadinadina ni ka oqo koi keitou kecega. 33Ia ni sa kau cake e na liga i matau ni Kalou, ka rawata ko koya maivei Tamana na Yalo Tabu ka yalataki, sa qai sovaraka mai na ka oqo, dou sa qai raica ka rogoca. 34Ni sa sega ni lako cake ki lomalagi ko Tevita; ia sa kaya ko koya, Sa kaya ko Jiova vua na noqu Turaga, Mo tiko e na ligaqu i matau, 35Me’u vakamalumalumutaki ira mada na nomu meca mei tutu-ni-yavamu. 36O koya oqo, me kila sara kina na mataqali taucoko nei Isireli, ko Jisu oqo, ko koya dou a vakota ki na kauveilatai, sa lesia na Kalou me Turaga ka Karisito talega.
37Ia ni ra sa rogoca, sa laucoka na yalodra, a ra sa kaya vei Pita kei ira nai apositolo sa vo, Oi kemudou na veiwekani, a cava me keimami kitaka?
38Sa qai kaya vei ira ko Pita, Dou veivutuni, ka papitaisotaki, koi kemudou yadua, e na yaca i Jisu Karisito, me bokoci kina na nomudoui valavala ca, ka dou na rawata na Yalo Tabu mei solisoli. 39Ni sa caka vei kemudou na vosa ni yalayala, vei ira talega na nomudou gone, kei ira vakaaduaga era sa vakayawa, io, vei ira vakaaduaga ena kacivi ira vua na Turaga na noda Kalou. 40Ia sa vuqa tale na vosa sa tukuna ko koya ka vakarota, ka kaya, Dou vakabulai kemudou mai nai tabatamata takelo oqo.
41Ia ko ira sa vakabauta na nona vosa, era sa papitaisotaki: ka sa kenai kuri vei ira sa lotu e na siga ko ya e lewe tolu beka na udolu na tamata.
42A ra sa qarava matua na nodrai vakavuvuli nai apositolo kei na veilomani, kei na dovi madrai, kei na masumasu. 43A sa kani ira kecega na rere; a sa levu na ka e veivakurabuitaki kei nai vakatakilakila era sa kitaka ko ira nai apositolo. 44Ia ko ira kecega sa vakabauta era sa tiko vata, a ra sa dui solia na nonai yau yadua me ra taukena vata; 45a ra sa volitaka na nodra vanua kei na nodrai yau, a ra sa vota kivei ira kecega, me vaka na nodra dui dravudravua. 46A ra sa gumatua sara e na lako ki na vale ni soro e na veisiga, a ra sa lomavata, a ra sa dovi madrai e na veivale, a ra sa kania na kedra e na marau kei na yalo dina, 47ni ra sa vakavinavinaka tiko vua na Kalou, a sa vinakati ira ko ira na tamata vakaaduaga. Ia na Turaga sa vakaikuritaka kivei ira nai soqosoqo lewe ni lotu, e na veisiga, na tamata era sa vakabulai tiko.
Currently Selected:
CAKACAKA 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific