JOPE 2
2
Sa yacovi Jope e dua na mate ca, 1-8. Sa vosa vakatani vua ko koya na watina, a sa vunauca ko Jope, 9,10. Sa lako mai na wekana eratou lewe tolu me vakacegui koya, 11-13.
1Sa dua tale na siga era sa lako mai kina na luve ni Kalou me vakaraitaki ira e na mata i Jiova, ka sa lako talega mai kei ira ko Setani me vakaraitaki koya e na mata i Jiova. 2Ka sa kaya vei Setani ko Jiova, Ko sa lako maivei? A sa vosa vei Jiova ko Setani, ka kaya, Au sa veilakoyaki tu e vuravura, ka gade voli kina. 3Ka sa kaya vei Setani ko Jiova, Ko sa vakanananu beka ki na noqu tamata ko Jope, ni sa sega e dua e tautauvata kaya e vuravura, a tamata yalododonu ka daucaka dodonu, a sa rerevaka na Kalou, ka sega ni torova na ca? ia ko a mai vakauqeti au me'u vakarusai koya walega, ia sa taura matua tikoga ko koya na nona yalododonu. 4Ka sa vosa vei Jiova ko Setani, ka kaya, nai sau ni kulina na kulina, ia na nona ka kecega ena solia na tamata me bula kina. 5Ia mo ni dodoka mada na ligamuni, ka tara na suina kei na lewena, ena qai vosavakacacataki kemuni ki matamuni. 6A sa kaya vei Setani ko Jiova, Raica, sa qai soli ki ligamu ko koya; ia mo kakua ni vakamatei koya.
7Sa qai lako tani ko Setani mai na mata i Jiova, ka yaviti Jope e na vidikoso, mai na qeteqete ni yavana ka cavaraka na buradelana. 8A sa taura ko koya nai caca ni bilo me kari koya kina; ka sa la'ki tiko ki loma ni dravusa.
9Sa qai kaya vua ko koya na watina, Ko sa taura matua tiko beka na nomu yalododonu? mo vosavakacacataka na Kalou, ka mo mate ga. 10A sa kaya vua ko koya, Ko iko ko sa vosa me vaka e dua na yalewa lialia. E vakaevei li? me da rawata beka na ka vinaka vua na Kalou, me da kakua talega ni rawata na ka ca? E na ka kecega oqo sa sega ni cala ko Jope e na gusuna.
11Ia ko iratou na weka i Jope eratou lewe tolu, ni ratou sa rogoca na ka rarawa kecega oqo sa yaco vua, eratou sa qai dui lako yadua mai na nona yasana: ko Elifasi na kai Temani, kei Pilitati na luve i Sua, kei Sofa na kai Neama: ni ratou sa lokuca vata na siga me ratou lako mai kina me tagi vata kaya ka vakaceguya. 12Ia ni ratou sa ta cake ni ra sa yawa tiko, eratou sa sega ni kilai koya, a ratou sa tagi vakadomoilevu; ka ratou sa dui dresulaka na nonai sulu, ka kaburaka na kuvu-ni-soso ki na uludratou vaka ki lomalagi. 13A ratou sa tiko sobu kaya e na qele me oti mada e vitu na siga ka vitu na bogi, a sa sega e dua sa vosa rawa vua: ni ratou sa kunea sa ka levu sara na nona rarawa.
Currently Selected:
JOPE 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific