JONI 18
18
Sa soli Jisu yani ko Jutasa, a sa taya laivi na daliga i Maliko ko Pita, 111. Sa tauri ko Jisu ka tuberi yani vei Anasa kei Kaiafa, a sa cakitaki Jisu ko Pita, 1227. Sa lewai Jisu ko Pailato, 2840.
1Ni sa vosataka oti na veika oqo ko Jisu, sa lako yani ko koya kei ira na nona tisaipeli ki tai kadua ni soniwai ko Kitironi, a sa dua kina na were, a sa curu kina ko koya, kei ira na nona tisaipeli.
2Ia ko Jutasa, ko koya sa soli koya yani, sa kila na tikina: ni sa lako wasoma kina ko Jisu kei ira na nona tisaipeli. 3Ia ni sa rawata ko Jutasa na mata sotia kei na ovisa eso, maivei ira na bete levu kei ira na Farisi, sa yaco kina, a ra sa kauta eso na tabucagi kei na cina kei nai yaragi ni valu.
4Ia ni sa kila ko Jisu na ka kecega ena yaco vei koya, sa lako yani, ka kaya vei ira, Dou sa vakasaqarai cei? 5Era sa kaya vua, Ko Jisu na kai Nasareci. Sa kaya vei ira ko Jisu, Koi au. A sa tu vata kei ira ko Jutasa, ko koya sa soli koya yani. 6Ni sa qai kaya vei ira ko koya, Sai au, era sa suka vakanadaku, ka bale sobu ki na qele.
7Sa qai taroga tale ko koya, Dou sa vakasaqarai cei? A ra sa kaya, Ko Jisu na kai Nasareci. 8Sa kaya ko Jisu, Au sa tukuna oti vei kemudou ni sai au: ia kevaka dou sa vakasaqarai au, laivi ira oqo me ra lako tani: 9me vakayacori kina na vosa sa tukuna ko koya, Au sa sega ni vakayalia e dua vei ira ko a solia mai vei au.
10Sa qai ucuna ko Saimoni Pita nai seleiwau sa tu vua, ka yavita kina na tamata ni bete levu, ka taya laivi na daligana i matau. Na yaca ni tamata ko Maliko. 11Sa qai kaya vei Pita ko Jisu, Daramaka na nomui seleiwau ki na kena taga: a bilo sa solia mai vei au ko Tamaqu, kau na sega beka ni gunuva?
12Ko ira na matai valu, kei na kena turaga, kei ira na nodra ovisa na kai Jutia, era sa qai tauri Jisu, ka vesuki koya, 13ka ra sa tubera mada eliu vei Anasa; ni sa vugo i Kaiafa, ko koya sa bete levu e na yabaki ko ya. 14Ia ko Kaiafa oqo, sai koya ka vakavulici ira na kai Jutia, ni sa yaga me mate e dua na tamata e na vukudra na tamata.
15A rau sa muri Jisu, ko Saimoni Pita ka dua tale na tisaipeli: a sa kilai na tisaipeli ko ya vua na bete levu, a rau sa curu vata kei Jisu ki na vale ni bete levu. 16A sa tu etautuba ko Pita ka voleka ki na katuba. Sa qai curu yani na tisaipeli kadua, ko koya sa kilai vua na bete levu, a sa vosa vua na yalewa sa vakatawa na katuba, a sa vakacurumi Pita. 17Sa qai kaya vei Pita na vada sa vakatawa na katuba, Ko iko beka talega na tisaipeli ni tamata oqo? Sa kaya ko koya, Oi au e segai. 18A sa tu maikina ko ira sa dauveiqaravi kei ira na ovisa, a ra sa vakawaqa na buka; ni sa liliwa: a ra sa tatalai; a sa tu vata kei ira ko Pita, ka tatalai.
19Sa qai tarogi Jisu na bete levu e na vukudra na nona tisaipeli, e na nonai vakavuvuli talega. 20Sa kaya vua ko Jisu, Au a vosa votu ki vuravura; au a vakavuvuli tikoga e na veivale ni lotu, kei na vale ni soro, era sa daulako kina ko ira kece na kai Jutia; ia kau sa sega ni kaya vuni e dua na ka. 21A cava ko sa tarogi au kina? tarogi ira era sa daurogoca, se cava kau a kaya vei ira: raica, era sa kila na ka kau a daukaya.
22Ia ni sa vosa oti vakaoqo ko koya, e dua vei ira na ovisa sa tu voleka, sa sabici Jisu e na ligana, ka kaya, Ko sa vosa vakacava vakaoqo vua na bete levu? 23Sa kaya vua ko Jisu, Kevaka kau sa vosa vakaca, vakatakila na kena ca: ia kevaka e vinaka, ko sa sabici au e na vuku ni cava? 24Ia ko Anasa sa talai koya, ni sa vesu tu, vei Kaiafa na bete levu.
25Ia sa tu ko Saimoni Pita, ka tatalai. Era sa qai kaya vua, Ko iko beka talega sa dua vei ira na nona tisaipeli? Sa cakitaka ko koya, ka kaya, Oi au e segai. 26E dua vei ira na tamata ni bete levu, a weka i koya sa taya laivi na daligana ko Pita, sa kaya, Au a sega beka ni raici kemudrau vata kaya e na were? 27Sa qai cakitaka tale ko Pita; a sa tagi sara na toa.
28Era sa qai kauti Jisu tani maivei Kaiafa ki na vale ni veilewai; a sa mataka caca; ia ko ira era sa sega ni curu ki na vale ni veilewai, me ra kakua ni vakadukadukalitaki, ka me ra ia na kana vata ni lako-sivia.
29Sa qai curu yani vei ira ko Pailato, ka kaya, A cava na ka ca dou sa beitaka vua na tamata oqo? 30Era sa vosa ka kaya vua, Kevaka sa sega ni tamata ca ko koya oqo, keitou sa sega ni soli koya yani vei iko. 31Sa qai kaya vei ira ko Pailato, Dou kauti koya, ka lewai koya me vaka na nomudou lawa. O koya era sa kaya kina vua ko ira na kai Jutia, E sega ni tara vei keimami me vakamatea e dua na tamata: 32me vakayacori kina na vosa ka tukuna ko Jisu, ni sa vakatakila nai valavala ni mate ena mate kina.
33Sa qai curu tale ki na vale ni veilewai ko Pailato, ka kacivi Jisu, ka kaya vua, O iko na nodra Tui na kai Jutia, se segai? 34Sa kaya vua ko Jisu, Ko sa vosataka li na ka oqo vakataki iko, se sa tukuni au vakaoqo vei iko ko ira na tani? 35Sa kaya ko Pailato, Oi au beka na kai Jutia? ko ira na kai nomu kei ira na bete levu, era sa soli iko mai vei au: a cava ko a cakava? 36Sa kaya ko Jisu, Sa sega ni vakavuravura na noqu matanitu: kevaka sa vakavuravura na noqu matanitu, era na qai vala na noqu tamata, meu kakua ni soli yani vei ira na kai Jutia: ia oqo, sa sega ni vu eke na noqu matanitu. 37Sa qai kaya vua ko Pailato, Ko iko bagi na tui? Sa kaya ko Jisu, Ko sa kaya niu sa tui. A ka oqo kau sa sucu mai kina, ia na ka oqo kau sa lako mai kina ki vuravura oqo, meu dautukuna na ka dina. O koya yadua sa vakabauta na ka dina, sa rogoca na noqu vosa. 38Sa kaya vua ko Pailato, A cava na ka dina? Ia ni sa vosa oti vakaoqo, sa curu tale yani vei ira na kai Jutia, ka kaya vei ira, Au sa sega ni kunea vua e dua nai valavala ca: 39ia sa dua na nomudoui valavala, meu sereka e dua vei kemudou e na kana vata ni lako-sivia: dou sa vinakata kina, se segai, meu sereka vei kemudou na nodra Tui na kai Jutia? 40Era sa qai qoqolou tale, ka kaya, Me kakua ga na tamata oqo, ko Parapa ga. Ia na daubutako ko Parapa.
Currently Selected:
JONI 18: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific