IPERIU 1
1
Sa tukuna ko Paula ni sa uasivi cake ko Jisu vei ira kecega na parofita kei ira na agilose, ni sa Luve ni Kalou, 1-14.
1Sai ira na parofita ka vosa kina eliu na Kalou vei ira na qase, e na gauna e vuqa, kei nai valavala e vuqa: 2ia sai koya na Luvena sa vosa kina vei keda ko koya, e na gauna mai ki muri oqo; o koya sa lesia ko koya mei taukei ni ka kecega, o koya sa bulia talega kina na vuravura kecega; 3o koya sa cila kina na nona serau kei na yaloyalo ni nonai tovo, a sa tokona na ka kecega e na nona vosa mana, a sa tiko sobu e na liga i matau i Koya sa levu sara maicake, ni sa vuya laivi oti vakataki koya na nodai valavala ca; 4ni sa yaco me uasivi cake vei ira na agilose, ni sa taukena na yaca sa uasivia na yacadra.
5Io, ko cei vei ira na agilose sa kaya vua ko koya e na dua na siga, A Luvequ ko iko, au sa vakatuburi iko e na siga oqo? sa kaya tale, Au na Tamana koi au, ena Luvequ ko koya? 6Ia ni sa kauta mai ko koya na Ulumatua ki vuravura, sa kaya, Me cuva vei koya ko ira kecega na agilose ni Kalou. 7Ia e na vukudra na agilose sa kaya ko koya, O koya sa qisi ira na nona agilose me cagi, Kei ira na nonai talatala me yameyame ni buka. 8Ia e na vuku ni Luvena ga, Ena sega ni mudu na nomuni tikotiko-vakaturaga, oi kemuni na Kalou: Sai titoko ni caka dodonu nai titoko ni nomuni matanitu: 9Ni kemuni sa vinakata nai valavala dodonu, ka cata nai valavala ca, Sa lumuti kemuni kina na Kalou, a nomuni Kalou, E na waiwai ni reki mo ni uasivi cake kina vei ira na nomuni tokani. 10Ia, Oi kemuni Turaga, ko ni a tauyavutaki vuravura e nai vakatekivu; Ia na cakacaka ni ligamuni ko lomalagi: 11Ena rusa oqori; ia koi kemuni ena tiko ga: Ia ena madra mai oqori kecega me vaka nai sulu: 12O ni na lobia talega me vaka nai tutuvi, ka na vakaisosomitaki: Ia koi kemuni sai kemuni tikoga, Ia ena sega ni bau mudu na nomuni veiyabaki. 13Ia ko cei vei ira na agilose sa kaya vua ko koya e na dua na siga, Mo tiko e na ligaqu i matau, Ka me'u qisi ira oti mada na nomu meca mei tutu-ni-yavamu? 14Era sa sega li ni yalo dauveiqaravi ko ira kecega, sa talai yani me qaravi ira era na yaco emuri mei taukei ni bula?
Currently Selected:
IPERIU 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific