2 TUI 2
2
Sa kau cake ki lomalagi ko Ilaija, 1-11. Sa qai cakava na veika mana na parofita ko Ilaisa, 12-25.
1A sa yaco ni sa voleka ni kauti Ilaija cake ki lomalagi ko Jiova, e na covulaca, sa rau lako ko Ilaija kei Ilaisa mai Kilikali. 2A sa kaya vei Ilaisa ko Ilaija, Mo tiko mada ga eke; ni sa talai au ki Peceli ko Jiova. A sa kaya ko Ilaisa, Me vaka sa bula ko Jiova, ka sa bula na yalomu, ka'u na sega ni laivi iko. A rau sa lako sobu ki Peceli. 3Ia sa lako mai vei Ilaisa ko ira na luvedra na parofita mai Peceli, a ra sa kaya vua, O sa kila beka, ni na kauta tani na nomu turaga edaidai ko Jiova, me kakua ni lewai iko tiko? A sa kaya ko koya, Io, au sa kila; dou tiko lo ga. 4A sa kaya vua ko Ilaija, Ko iko Ilaisa, mo tiko mada ga eke, ni sa talai au ko Jiova ki Jeriko. A sa kaya ko koya, Me vaka sa bula ko Jiova, ka sa bula na yalomu, ka'u na sega ni laivi iko. A rau sa lako ki Jeriko. 5Ia sa toro vei Ilaisa ko ira na luvedra na parofita mai Jeriko, ka kaya vua, O sa kila beka, ni na kauta tani na nomu turaga edaidai ko Jiova, me kakua ni lewai iko tiko? A sa kaya ko koya, Io, au sa kila; dou tiko lo ga. 6A sa kaya vua ko Ilaija, Mo tiko mada ga eke; ni sa talai au ko Jiova ki na Joritani. A sa kaya ko koya, Me vaka sa bula ko Jiova, ka sa bula na yalomu, ka'u na sega ni laivi iko. A rau sa lako ruarua yani. 7Ia era lewe limasagavulu vei ira na luvedra na parofita, era sa la'ki tu vakayawa me ra vakararai: ia erau sa tu ruarua mai na Joritani. 8A sa taura na nonai tutuvi ko Ilaija, ka lobia, ka yavita na wai, a sa tawase vaka ka vaka, a rau sa lako kina ki tai kadua e na qele mamaca.
9Ia ni rau sa yaco ki tai kadua, sa qai kaya vei Ilaisa ko Ilaija, Mo kerea mada na ka me'u cakava vei iko, ni'u sa bera ni kau tani mai vei iko. A sa kaya ko Ilaisa, Me vakaruataki mada vei au nai votavota ni yalo sa tu vei iko. 10A sa kaya ko koya, Sa ka dredre na ka ko sa kerea: ia kevaka ko na raici au ni'u sa kau tani tiko mai vei iko, ena yaco vakakina vei iko; ia kevaka e segai, ena sega ni vakakina.
11Ia ni rau sa lako tiko, ka veivosaki, raica, sa dua na qiqi bukawaqa ka so na ose bukawaqa, sa tawasei rau; a sa lako cake ki lomalagi ko Ilaija e na covulaca.
12A sa raica tiko ko Ilaisa, a sa qolouvaka, Na tamaqu, na tamaqu! na nodra qiqi ni valu na Isireli, kei ira na nodra tamata sa dauvodo ose! A sa sega tale ni raici koya: a sa taura na nonai sulu, ka wasea rua. 13A sa taura cake nai tutuvi i Ilaija ka lutu mai vua, ka lesu tale, ka la'ki tu e na bati ni Joritani. 14A sa taura ko koya nai tutuvi i Ilaija ka lutu mai vua, ka yavita kina na wai, a sa kaya, Sa evei ko Jiova na Kalou i Ilaija? Ia ni sa yavita oti na wai ko koya talega, sa tawase vaka ka vaka; a sa lako ki tai kadua ko Ilaisa.
15Ia ni ra sa raica ko ira na luvedra na parofita era a tu me vakararai mai Jeriko, era sa kaya, Sa lutu vei Ilaisa na yalo i Ilaija. A ra sa la'ki tavaki koya, ka ra sa cuva vua ki na qele. 16A ra sa kaya vua, Raica, sa tiko kei keitou na nomu tamata e le limasagavulu na tamata kaukauwa; me ra lako mada, ka vakasaqarai koya na nomu turaga: de kauti koya cake beka na Yalo i Jiova, ka biuti koya ki na dua na ulu-ni-vanua, se ki na dua na kikilo. A sa kaya ko koya, Dou kakua ga ni talaki. 17Ia ni ra sa cikevi koya tiko ka sa madua kina ko koya, sa qai kaya, Ia dou talaki ga. A ra sa tala na tamata e le limasagavulu; a ra sa vakasaqarai koya ka bogi tolu, ka sega ni kunea. 18A ra sa lesu tale vua, ni sa tiko ga mai Jeriko ko koya, a sa kaya vei ira ko koya, Au sa sega beka ni kaya vei kemudou, Dou kakua ni lako?
19A sa kaya vei Ilaisa ko ira na lewe ni koro ko ya, Raica mada, sa toka vinaka na koro oqo, me vaka sa raica tiko na noqu turaga; ia ka sa ca na wai, a sa sega ni vua na qele. 20A sa kaya ko koya, Dou kauta mai vei au e dua na tavaya vou, ka viria kina na masima. A ra sa kauta vua. 21A sa lako yani ko koya ki nai vurevure ni wai, ka biuta kina na masima, ka kaya, Sa vosa vakaoqo ko Jiova, Au sa vakavinakataka na wai oqo; ena sega tale maikina emuri na mate se me tawa vua. 22A sa vinaka mai na wai, ka yacova na gauna oqo, me vaka na vosa ka vosataka ko Ilaisa.
23A sa lako cake maikea ko koya ki Peceli: ia ni sa lako cake tiko e na sala, sa curu mai na koro eso na gone tagane, ka vakalialiai koya, ka kaya vua, Mo lako cake, na ulu cou; mo lako cake, na ulu cou. 24A sa gole ki muri ko koya, ka raici ira, ka vatonaki ira e na yaca i Jiova. A sa lako yani e rua na pera yalewa mai na veikau, a rau sa basuraki ira e le vasagavulu ka rua na gone tagane. 25A sa lako tani maikea ko koya ki na ulu-ni-vanua ko Kameli, a sa lesu maikea ki Samaria.
Currently Selected:
2 TUI 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific