ሮሚያ 1
1
1ባሬ ሚሺራቹዋ ቃላ ኦዳናው ፆሳይ ዶሪዴ ፄሴዳ ኪሪስቶሳ ዬሱሳ ቆማይ፥ ዬሱሲ ኪሪስቶሲ ኪቴዳ ጳዉሎሲ፥ ታኒ ሃ ዳቢዳቢያ ፃፋይ።
2ፆሳይ ዳሮ ዎዴፔ ካሴ ባሬ ናባቱዋ ባጋና ሚሺራቹዋ ቃላ ኢማና ያጌዳዌ ፆሳ ጌሻ ማፃፋቱዋን ፃፌቴዳ፤ 3ሄ ሚሺራቹዋ ቃላይ ኣሳ ጊዲዴ ዳዊቴ ዛሪያፔ ዬሌቴዳ ፆሳ ናዓ፥ ኑ ጎዳ ዬሱሲ ኪሪስቶሳባ። 4ቃሲ ኢ ባሬ ጌሻ ኣያናን #1፡4 ባሬ ጌሻ ኣያናን፡ ዎይ «ኣኒ ዴዒያ ጌሻ ኣያና» ሃይቁዋፔ ዴንዴዳዋን፥ ፆሳ ናዓ ጊዲያዋ ዎልቃማ ዎልቃን ቤሴዳ። 5ኣዪሁዳ ጊዴና ኣሳይ ኡባይ ኣማናናዳኒኔ ኣዛዜታናዳን፥ ኑኒ ኡንቱንታ ካሌና ማላ፥ ፆሳይ ኪሪስቶሳ ሱን ዲራው፥ ኪሪስቶሳ ባጋና ኣ ኬካቴኔ ዬሱሲ ኪቴዳዋንታ ጊዲያ ማታ ኑሲ ኢሜዳ። 6ዬሱሲ ኪሪስቶሳዋ ጊዳናዳን፥ ፆሳይ ፄሴዳ ሂንቴንቱካ ሄዋንቱ ጊዶን ዴዒታ።
7ፆሳይ ሲቂያዋንቶኔ ጌሻባ ኦናው ፄሴዳ ሮሜ ጋዲያን ዴዒያ ኡባቶ ፆሳ ኑ ኣዉዋፔኔ ጎዳ ዬሱሲ ኪሪስቶሳፔ ኣ ኬካቴይኔ ሳሮቴይ ሂንቴንቶ ጊዶ።
ጋላታ ዎሳ
8ካሴታዴ ታኒ ሂንቴንቱ ኣማኑ ሳዓ ኡባን ሲሴቴዳ ዲራው፥ ዬሱሲ ኪሪስቶሳ ባጋና ሂንቴንቶ ታኒ ፆሳ ጋላታይ። 9-10ኣዪሲ ጎፔ፥ ታኒ ኡባ ዎዴ ታ ዎሳን ሂንቴንታ ሃሳዪሲያዎ፥ ፆሳይ፥ ታኒ ኣ ናዓ ሚሺራቹዋ ቃላ ኦዲያዋን ታ ኣያናን ኣው ኦያዌ ማርካ። ፆሳይ፥ ባሬ ሼኒያን፥ ታኒ ሃዒ ሂንቴንቱኮ ባናው ታ ኦጊያ ሚኮያናዳን፥ ኡባ ዎዴ ዎሳይ። 11ኣዪሲ ጎፔ፥ ታኒ ሂንቴንታ ሚኒሳናው፥ ሂንቴንቱና ኢቲፔ ኣያና ኢሞታ ሻካና ማላ፥ ሂንቴንታ ቤዓናው ላሞታይ። 12ታኒ ጊያዌ፥ ሂንቴንቱካ ታካ ኢቲ ዎዴ ሚኔታና። ሂንቴንቱ ታ ኣማኑዋን፥ ቃሲ ታኒካ ሂንቴ ኣማኑዋን ሚኔታና።
13ታናዳን ኣማኒያዋንቶ፥ ታኒ ኡባ ዎዴ ሂንቴንቱኮ ባናው ቆፓዲ። ሺን ታና ዲጊያባይ ዴዒያዋ ሂንቴ ኤራናው ቤሴ፤ ታኒ ሃራይ ኣቶ ኣዪሁዳ ጊዴና ሃራ ኣሳፔካ ኣይፊያ ዴሜዳዋዳን፥ ሂንቴንቱፔካ ኣይፊያ ዴማናው ኮያይ። 14ታኒ ኣሳ ኡባው፥ ጊሪኬ ኣሳዉኔ ታማሪቤና ኣሳው ቃሲ ኣ ኤራንቻቶኔ ኤያቶ ቃንፃና ኣጩ ዴዔ።
15ሄዋ ዲራው፥ ታው ዳንዳዬቴዳ ኬናን ሮሜን ዴዒያ ሂንቴንቱሲካ ሚሺራቹዋ ቃላ ኦዳናው ኣሞታይ።
ሚሺራቹዋ ቃላይ ፆሳ ዎልቃ
16ሚሺራቹዋ ቃላይ ታና ዬላዬና፤ ኢ ኣማኒያ ኡባ፥ ካሴቲዴ ኣዪሁዳ ኣሳ ቃሲ ኣዪሁዳ ጊዴና ኣሳ ኣሻናው ፆሳፔ ዪያ ዎልቃ። 17ኣዪሲ ጎፔ፥ ፆሳ ማፃፋይ፥ «ፂሉ ፆሳን ኣማኔቲዴ ዴዓና» ያጊያዋዳን፥ ፆሳይ ኣሳ ኮይሮፔ ዉርሴ ጋካናው፥ ኣማኑዋን ፂሊሲያዋ ሚሺራቹዋ ቃላይ ቆንጪሴ። #ኢምብ 2፡4
ኣሳ ኢታ ኦሱዋ
18ቱማቴይ ኤሬታናዋ ባሬንቱ ኢታ ሃኖታን ዲጊያ ናጋራ ኦሱዋ ኡባ ቦላኒኔ ኣሳ ኢታ ኦሱዋ ኡባ ቦላን፥ ፆሳ ሃንቁ ሳሉዋፔ ዎዴ ቆንጫና። 19ኡንቱንቱ ፆሳባ ኤራና ዳንዳዪያዌ ኡንቱንቶ ቆንጬ፤ ኣዪሲ ጎፔ፥ ፆሳይ ኡንቱንቶ ቆንጪሴዳ። 20ቤቴና ኣ ሃኖታይ፥ ሄዌካ ኣ ሜና ዎልቃይኔ ኣ ፆሳቴይ ኢቲፔ ፆሳይ ሃ ኣላሚያ ሜዳዋፔ ዶሚዴ፥ ኡንቱንቶ ቆንጪዴ ቤቴዳ፤ ኡንቱንቱ ሄዋ ፆሳይ ሜዳባፔ ቤዓናው ዳንዳዪያ ዲራው፥ ኡንቱንቶ ጋሶዪያባይ ባዋ።
21ኣዪሲ ጎፔ፥ ኡንቱንቱ ፆሳ ኤሮፔካ፥ ኣው ቤሲያ ቦንቹዋ ኢሚቤይኪኖ፤ ቃሲ ኣ ጋላቲኪኖ። ሺን ኡንቱንቱ ኣላሌ ኬሴናባ ቆፒኖ፤ ቃሲ ኡንቱንቱ ኣኬኬና ዎዛናይ ሜዳ። 22ኡንቱንቱ ባሬንታ ኣዳ ኤራንቻ ጊኖ፤ ሺን ኡንቱንቱ ኤያ። 23ኡንቱንቱ ሃይቄና ፆሳሲ ጎዪኒያዋ ኢፂዴ፥ ሃይቂያ ኣሳ ሜታ፥ ካፋቱዋ ሜታ፥ ዶዓቱዋ ሜታኔ ቲራን ጎሼቲያዋንቱ ሜታ ሜቴዳዋንቱሲ ጎዪኔዲኖ። #ዛር 4፡16-18
24ሄዋ ዲራው፥ ኡንቱንቱ ኢቱ ኢቱዋና ፖኮባ ኦና ማላ፥ ፆሳይ ኡንቱንቱ ዎዛናይ ኣሞቲያ ቱናባ ኦናዳን ኡንቱንታ ኣጌዳ። 25ኣዪሲ ጎፔ፥ ኡንቱንቱ ፆሳ ቱማቴ ዎርዱዋን ላሜዲኖ፤ ቃሲ ሜዳ ፆሳ ኣጊዴ፥ ኢ ሜዳባው ጎዪኔዲኖኔ ኦዲኖ። ፆሳይ ሜናው ጋላቴቴዳዋ። ኣሜንዒ።
26ሄዋ ዲራው፥ ፆሳይ ኡንቱንቱ ፖኮባ ኣሞታና ማላ፥ ኡንቱንታ ኣጌዳ፤ ሃራይ ኣቶ ኡንቱንቱ ማጫዋንቱ ባሬንቶ ቤሲያዋ ኣጊዴ፥ ቤሴናዋ ሃኔዲኖ። 27ሃዋዳንካ፥ ኣቱማ ኣሳይ ቃሲ ባሬንቶ ቤሲያዋዳን ማጫዋንቱና ጋኬቲያዋ ኣጊዴ፥ ኢቱ ኢቱዋና ጋኬታናው ኮዬዲኖ፤ ኣቱማ ኣሳይ ኢቱ ኢቱዋና ፖኮባ ኦዴ፥ ባሬንቱ ኦዳ ባላን ባሬንቶ ቤሲያ ፒርዳ ኣኬዲኖ።
28ኡንቱንቱ ፆሳ ኤራናው ዶሴናን ኢፄዳዋ ኬና ፆሳይ ኡንቱንቱ ቤሴናዋ ኦና ማላ፥ ኡንቱንቶ ፓና ቆፋ ኢሜዳ። 29ኡንቱንቱን ቱናቴይ፥ ኢታቴይ፥ ዮራቴይኔ ኢታ ሃኖታይ ኩሜዳ፤ ቃሲ ኡንቱንቱን ቃናቲ፥ ሼምፑዋ ዎያ ቆፋይ፥ ፓሉማይ፥ ጪሙሳይኔ ኢታ ቆፋይ ኩሜዳ፤ ቃሲ ኡንቱንቱ ሶቂያዋንታ፥ 30ዚጊሪያዋንታ፥ ፆሳ ኢፂያዋንታ፥ ቦሪያዋንታ፥ ኦቶሬቲያዋንታ፥ ጬቄቲያዋንታ፥ ኢታባ ኦናው ኮዪያዋንታኔ ባሬንቱ ኣዎኔ ኣቲው ኣዛዜቴናዋንታ፥ 31ቆፋይ ባይናዋንታ፥ ኣማኑ ባይናዋንታ፥ ሃራንቶ ቃሬቴናዋንታኔ ማሬናዋንታ። 32ኡንቱንቱ ሃዋንቱ ማላ ኦያዋንቱሲ ሃይቁ ቤሴ ጊያ ፆሳ ሂጊያ ኤሪዴ፥ ሃዋንታ ኦኖ፤ ሄዋ ፃላላ ጊዴናን፥ ሃዋንታ ኦያዋንታካ ኦቴ ጊዴ ሚኒሲኖ።
Currently Selected:
ሮሚያ 1: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa