ዮሃኒሳ 11
11
ኣሊዓዛራ ሃይቁዋ
1ቢታኒያ ጊያ ቄሪ ካታማን ኣሊዓዛራ ጊያ ኢቲ ቢታኒ ሃርጌዳ፤ ሄ ካታማይ ማይራማኔ ኢዚ ሚቻታ ማርታ ዴዔዳ ካታማ። 2ጎዳ ጌዲያ ሺቱዋ ኦካዴ፥ ባሬ ቢናናን ኣ ጌዲያ ቁጬዳዉና ሄ ማይራሞ፤ ሃርጌዳዌ ቃሲ ኢዚ ኢሻ ኣሊዓዛራ። 3ሄዋ ዲራው፥ ሚቻቱ፥ «ጎዳው፥ ኔኒ ሲቂያዌ ሃርጌዳ» ጊዴ ዬሱሳው ኪቴዲኖ።
4ዬሱሲ ሄዋ ሲሴዳ ዎዴ፥ «ታኒ ፆሳ ናዓይ ሃርጊያ ጋሱዋን ቦንቼታና ማላ፥ ፆሳ ቦንቹዋሲ ሃ ሃርጊ ኣሊዓዛራ ኦይቄዳፔ ኣቲን፥ ዎያ ሃርጊያ ጊዴና» ያጌዳ።
5ዬሱሲ ማርቶ፥ ኢዚ ሚቻቶኔ ኣሊዓዛራ ሲቄ፤ 6ኣሊዓዛር ሃርጌዳዋ ዬሱሲ ሲሴዳ ዎዴ፥ ባሬ ዴዒያ ሳዓን ላዑ ጋላሳ ፔሼዳ። 7ሄዋፔ ጉዪያን፥ ዬሱሲ ባሬና ካሊያዋንታ «ላዔንዋ ዪሁዳ ጋዲያ ቦይቴ» ያጌዳ።
8ዬሱሳ ካሊያዋንቱ ዛሪዴ፥ «ታማሪሲያዎ፥ ጉ ዎዲያፔ ካሴ ኣዪሁዳቱ ኔና ሹቻን ጫዳናው ኮዬዲኖ፤ ቃሲካ ያ ባኒ?» ያጌዲኖ።
9ዬሱሲ፥ «ኢቲ ጋላሳን ታማኔ ላዑ ሳቲ ዴዔኔዬ? ጋላሲ ሃሜቲያ ኣሳይ ቤቴና፤ ኣዪሲ ጎፔ፥ ኢ ሃ ሳዓ ፖዑዋ ቤዔ። 10ሺን ቃማ ሃሜቲያ ኡራይ ዴዖፔ፥ ፖዑ ኣኒ ባይና ዲራው፥ ቤቴ» ያጌዳ። 11ዬሱሲ ሄዋ ጌዳዋፔ ጉዪያን፥ ቃሲካ ኡንቱንቱሲ፥ «ኑ ዳቡ ኣሊዓዛር ጌሚዒሼዳ፤ ሺን ጌሚዒሹዋፔ ኣ ዴንናው ታኒ ባይ» ያጌዳ።
12ዬሱሳ ካሊያዋንቱ ዛሪዴ፥ «ጎዳው፥ ኢ ጌሚዒሼዳዋ ጊዶፔ፥ ኣው ሎዓናዋ» ያጌዲኖ።
13ኣሊዓዛር ሃይቄዳዋ ዬሱሲ ኦዴዳ፤ ሺን ኣሊዓዛር ጌሚዒሺዴ ጊሴዳዋ ኦዴዳ ጊዴ፥ ኡንቱንቱ ቆፔዲኖ። 14ሄዋ ዲራው፥ ዬሱሲ ጌሺዴ ኡንቱንታ፥ «ኣሊዓዛር ሃይቄዳ። 15ሂንቴንቱ ኣማናና ማላ፥ ታኒ ሄ ሳዓን ዴዔናዎ፥ ሂንቴንቱ ዲራው ናሼታይ። ሺን ዴንዲቴ፤ ኣኮ ቦይቴ» ያጌዳ።
16ሄዋፔ ጉዪያን፥ ማንቲያ ጌቴቲያ ቶማሲ ባሬ ላጌቱዋ ዬሱሳ ካሊያዋንታ፥ «ዬሱሳና ሃይቃናው ኑኒካ ቃሲ ቦይቴ!» ያጌዳ።
ዬሱሲ፥ ዴንዱዋኔ ዴዑዋ
17ዬሱሲ ጋኪያ ዎዴ፥ ኣሊዓዛራው ሞጌቶዴፔ ኦይዱ ጋላሳ ጊዴዳዋ ዴሜዳ። 18ቢታኒያ ካታማይ ዬሩሳላሜፔ ሄዙ ኪሎ ሚቲሪያ ኬና ሃኬ። 19ዳሮ ኣዪሁዳቱ ማርቶኔ ማይራሞ ኡንቱንቱ ኢሻይ ሃይቄዳዎ ሜንናው ዬዲኖ።
20ማርታ ዬሱሲ ዬዳዋ ሲሳዴ፥ ኣ ሞካናው ኬሳዱ፤ ሺን ማይራማ ጎሌን ኣታዱ። 21ማርታ ዬሱሳ፥ «ጎዳው፥ ኔኒ ሃዋን ዴዔዳዋ ጊዲንቶ፥ ታ ኢሻይ ሃይቄና። 22ሺን ኔኒ ዎሲያዋ ኣይ ጊዶፔኔ፥ ፆሳይ ኔው ሃራይ ኣቶ ሃዒካ ኢማናዋ ታኒ ኤራይ» ያጋዱ።
23ዬሱሲ፥ «ኔ ኢሻይ ሃይቁዋፔ ዴንዳና» ያጌዳ።
24ማርታ፥ «ዎዲያ ዉርሴን #11፡24 ዎዲያ ዉርሴን፡ ፆሳይ ኣሳ ዜሬ ኡባ ፒርዳው ሺሺያ ዎዴ ጉሳ። ዴንዱዋ ጋላሲ፥ ኢ ሃይቁዋፔ ዴንዳናዋ ታኒ ኤራይ» ያጋዱ።
25ዬሱሲ ኢዚው፥ «ታኒ ዴንዱዋኔ ዴዑዋ፤ ታና ኣማኒያ ኡራይ ሃራይ ኣቶ፥ ሃይቆፔካ ዴዑዋን ዴዓናዋ። 26ቃሲ ዴዑዋን ዴዒያ ኡራይኔ ታና ኣማኒያ ኡራይ ኡባይ ኡባካ ሃይቄና፤ ሄዋ ኔኒ ኣማናይ?» ያጌዳ።
27ማርታ ዛራዴ፥ «ጎዳው፥ ኤ ታኒ ኣማናይ፤ ኔኒ ፆሳ ናዓ፥ ሳዓ ያናው ዴዒያ ኪሪስቶሳ ጊዲያዋ ታኒ ኣማናይ» ያጋዱ።
28ማርታ ሄዋ ጌዳዋፔ ጉዪያን፥ ባዴ ባሬ ሚቻቲው ጌማን ፄሳዴ፥ «ታማሪሲያዌ ዪዴ፥ ኔና ኮዬ» ያጋዱ። 29ማይራማ ሄዋ ሲሴዳ ዎዴ፥ ኤሌላ ዴንዳ ኤቃዴ ዬሱሳኮ ባዱ። 30ዬሱሲ ማርታ ኣ ሞኬዳ ሳዓን ዴዔፔ ኣቲን፥ ቢሮ ቄሪ ካታማ ጋኪቤና። 31ማይራሞ ሜንዴ፥ ጎሌን ኢዚና ዴዒያ ኣዪሁዳቱ፥ ኢዛ ኤሌካ ዴንዳ ኤቃዴ ካሬ ኬሲያዋ ቤዒዴ፥ ኣሊዓዛር ሞጌቴዳ ዱፉዋ ባዴ ያኒ ዬካናው ሃናው ያጊዴ፥ ኢዞ ካሊዴ ኬሴዲኖ።
32ማይራማ ዬሱሲ ዴዒያሳ ባዴ ዬሱሳ ቤዔዳ ዎዴ፥ ኣ ጌዲያ ቦላን ኩንዳዱ፤ «ጎዳው፥ ኔኒ ሃዋን ዴዔዳዋ ጊዲንቶ፥ ታ ኢሻይ ሃይቄና ሺን!» ያጋዱ።
33ዬሱሲ ኢዛ ዬኪያዋኔ ቃሲ ኢዚና ዬዳ ኣዪሁዳቱካ ዬኪያዋ ቤዒዴ፥ ባሬ ዎዛናን ዳሮ ሴሌቴዳ፤ ቃሲ ቶኪ ሼምፔዳ። 34ኡንቱንታ፥ «ሃቃን ሞጌዲቴ?» ያጊዴ ኦቺና፥ «ጎዳው፥ ያዴ ቤዓ» ያጊዴ ዛሬዲኖ።
35ዬሱሲ ኣፎፄዳ። 36ሄዋ ዲራው፥ ኣዪሁዳቱ፥ «ኣሊዓዛራ ኢ ኣይ ኬና ሲቂንቶ ቤዒቴ!» ያጌዲኖ።
37ሺን ኡንቱንቱፔ ኢቱ ኢቱ፥ «ሃዌ ቆቃ ቢታኒያ ፄሊሴዳዌ ሃ ቢታኒ ሃይቄናዳን ኡዳናው ዳንዳዬኔ?» ያጌዲኖ።
ዬሱሲ ኣሊዓዛራ ሃይቁዋፔ ዴንዳ
38ዬሱሲ ቃሲካ ዎዛናፔ ቃሬቲዴ፥ ኣሊዓዛር ሞጌቴዳ ዱፉዋኮ ቤዳ፤ ሄ ዱፉ ጎንጎሉዋ ጊዲዴ ሹቻን ቁምዔቲ ኡቴዳ። 39ዬሱሲ፥ «ሹቻ ዲጊቴ!» ያጊዴ ኣዛዜዳ።
ሃይቄዳ ቢታኒያ ሚቻታ ማርታ፥ «ጎዳው፥ ኢ ሃይቆዴፔ ኦይዱ ጋላሳ ጊዴዳ ዲራው፥ ሃዒ ፂንቃናዋ!» ያጋዱ።
40ዬሱሲ ማርቶ፥ «ኣማኒያዋ ጊዶፔ፥ ኔኒ ፆሳ ቦንቹዋ ቤዓናዋ ታኒ ኔው ኦዳቤይኪታ?» ያጌዳ። 41ኡንቱንቱ ሹቻ ዴንዲኖ፤ ዬሱሲ ሳሉዋ ፑዴ ፄሊዴ፥ «ኣዎ፥ ታኒ ጊያዋ ኔኒ ሲሴዳ ዲራው፥ ኔና ጋላታይ። 42ኔኒ ኡባ ዎዴ ሲሲያዋ ታኒ ኤራይ፤ ሺን ሃዋን ዩዪ ኣዴ ኤቄዳ ኣሳይ ኔኒ ታና ኪቴዳዋ ኣማናና ማላ፥ ሃዋ ታኒ ኡንቱንቱ ዲራው ጋይ» ያጌዳ። 43ዬሱሲ ሄዋ ጌዳዋፔ ጉዪያን፥ ባሬ ቃላ ቁ ኡዲዴ፥ «ኣሊዓዛራ፥ ሃ ኬሳ!» ያጌዳ። 44ሃይቄዳ ኣሊዓዛራ ኩሺኔ ጌዲ ሻሉዋን ቃሼቲ ኡቲዴ ኣ ዴሙካ ኣፊላን ካሜቲ ኡቴዳዌ ኬሲና ዬሱሲ ኡንቱንታ፥ «ቢሊ ኣጊቴ! ቦ!» ያጌዳ።
ኪሪስቶሳ ቦላ ማቄቴዲኖ
(ማት 26፡1-5፤ ማር 14፡1-2፤ ሉቅ 22፡1-2)
45ሄዋ ዲራው፥ ማይራሚኮ ዬዳ ኣዪሁዳቱዋፔ ጮራቱ ዬሱሲ ኦዳዋ ቤዒዴ፥ ኣ ኣማኔዲኖ። 46ሺን ኡንቱንቱፔ ኢቱ ኢቱ ፓሪሳዋቱዋኮ ቢዴ፥ ዬሱሲ ኦዳዋ ኡንቱንቱሲ ኦዴዲኖ። 47ሄዋፔ ጉዪያን፥ ቄሳቱዋ ካፓቱኔ ፓሪሳዋቱ ያዓ ሺሺዴ፥ «ሃ ቢታኒ ዳሮ ዎልቃማ ማላታ ኦያ ዲራው፥ ኣያ ኦኔ? 48ኑኒ ኣ ጮዑ ጊዴ፥ ኣጎፔ፥ ኣሳይ ኡባይ ኣ ኣማናናዋ፤ ቃሲ ሮሜ ጋዲያ ኣሳቱ ዪዴ፥ ኑ ጌሻ ጎሊያኔ ኑ ኣሳ ዪሳና» ያጌዲኖ።
49ኡንቱንቱፔ ኢቱ ቃያፋ ጊያ፥ ሄ ላይ ቄሳቱዋ ኡባቱዋ ካፖ ጊዴዳዌ፥ «ሂንቴንቱ ኣይኔ ኤሪኪታ! 50ኣሳይ ኡባይ ዪያዋፔ ኣሳ ኡባ ዲራው፥ ኢቲ ኣሳይ ሃይቂያዌ ሎዓ ጊዲያዋ ሂንቴንቱ ኣኬኪቴ?» ያጌዳ። 51ኢ ሄዋ ባሬፔ ጊቤና፤ ሺን ሄ ላይ ቄሳቱዋ ኡባቱዋ ካፖ ጊዲያ ዲራው፥ ዬሱሲ ኣዪሁዳ ኣሳ ዲራው ሃይቃናው ቤሲያዋ ናቢ ኦዴዳ። 52ቃሲ ዬሱሲ ኣዪሁዳ ኣሳ ፃላላው ሃይቄና፤ ሺን ላሌቲ ዴዒያ ፆሳ ናና ኢቱዋ ኡዲ ሺሻናው ሃይቃናዋ።
53ሄ ጋላሳፔ ዶሚዴ፥ ኡንቱንቱ ኣ ዎናው ማቄቴዲኖ። 54ሄዋ ዲራው፥ ዬሱሲ ኣዪሁዳቱ ጊዱዋን ቆንጪያን ያ ሃ ሃሜቲቤና፤ ሺን ሜላ ቢታ ጋፃን ዴዒያ ጋዲያ፥ ኤፊሬማ ጌቴቲያ ካታማ ቤዳ። ባሬና ካሊያዋንቱና ሄዋን ታኬዳ።
55ኣዪሁዳቱ ፓሲጋ ቦንቺያ ጋላሳይ ማቴዳ፤ ቃሲ ዳሮ ኣሳይ ባሬና ጌሻናው፥ ፓሲጋ ቦንቺያ ጋላሳይ ጋካናፔ ካሴ ዱማ ዱማ ሳፔ ዬሩሳላሜ ቤዳ። 56ኡንቱንቱ ዬሱሳ ኮዪኖ፤ ጌሻ ጎሊያን ኤቂዴ፥ «ኣያ ቆፒቴ? ፓሲጋ ቦንቺያሳ ዬሱሲ ዬኔ?» ያጊዴ ኢቱ ኢቱዋ ኦቼዲኖ። 57ቃሲ ቄሳቱዋ ካፓቱኔ ፓሪሳዋቱ ዬሱሳ ቃቻናው፥ ኢ ዴዒያሳ ኤሪያዌ ኦኒኔ ባሬንቶ ኦዳና ማላ ኣዛዜዲኖ።
Currently Selected:
ዮሃኒሳ 11: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa