ዮሃኒሳ 10
10
ዬሱሲ ሎዖ ሄንንቻ
1ዬሱሲ፥ «ታኒ ሂንቴንቱሲ ቱሙዋ ኦዳይ፤ ዶርሳ ሲኩዋ ፔንጊያና ጌሌናን ሃራሳና ጌሊያ ኦኒኔ ካይሱዋኔ ፓኑዋ። 2ሺን ፔንጊያና ጌሊያዌ ዶርሳ ሄሚያ ኣሳ። 3ፔንጊያ ናጊያዌ ኣው ፔንጊያ ዶዬ፤ ዶርሳቱካ ኣ ኮሻ ሲሳና፤ ኢ ባሬ ዶርሳቱዋ ኡንቱንቱ ሱንን ሱንን ፄሲዴ፥ ካሬ ካሌና። 4ኢ ባሬዋንታ ካሬ ኬሴዳዋፔ ጉዪያን፥ ኡንቱንቱፔ ሲንና ሃሜቴ፤ ኡንቱንቱካ ኣ ኮሻ ኤሪያ ዲራው፥ ኣ ካሊኖ። 5ሃራ ኡራ ኮሻ ኡንቱንቱ ኤሬና ዲራው፥ ኣፔ ባቃታናፔ ኣቲን፥ ኣ ጌዱዋ ካሊኪኖ» ያጌዳ።
6ዬሱሲ ኡንቱንቱሲ ሃ ሌሚሱዋ ኦዴዳ፤ ሺን ኢ ኡንቱንቱሲ ኣይ ኦዲንቶኔካ ኡንቱንቱ ኣኬኪቤይኪኖ።
7ዬሱሲ ቃሲካ ኡንቱንቱሲ፥ «ታኒ ሂንቴንቱሲ ቱሙዋ ኦዳይ፤ ታኒ ዶርሳቶ ጌሊያ ፔንጊያ። 8ታፔ ካሴ ዬዳ ኡባይ ካዪሱዋኔ ፓኑዋ፤ ሺን ዶርሳቱ ኡንቱንቱ ጊያዋ ሲሲቤዪኪኖ። 9ፔንጊ ታና፤ ታናን ጌሊያ ኦኒኔ ኣታናዋ። ኢ ጌላናኔ ኬሳና፤ ቃሲ ሎዖ ማታይ ዴዒያ ሳዓካ ዴማናዋ። 10ካዪሱ ዉዓናው፥ ዎናዉኔ ዪሳናው ዪያዋፔ ኣቲን፥ ሃራባው ዬና፤ ታኒ ኡንቱንቱሲ ዴዑ ዴዓና ማላኔ ኩሚዴ ፓላሃና ማላ ያዲ።
11«ታኒ ዶርሳ ሎይ ሄሚያዋ፤ ዶርሳ ሎይ ሄሚያዌ ሄ ዶርሳቱዋ ዲራው ሃይቄ። 12ሚሻ ኣኪዴ ሄሚያ ኡራይ ዋሊያ ዪያዎዴ ቤዒዴ፥ ዶርሳቱዋ ዬጊ ባሺዴ ባቃቴ። ኣዪሲ ጎፔ፥ ዶርሳቱ ኣዋንታ ጊዲኪኖ፤ ቃሲ ኢካ ዶርሳቱዋ ሄሚያዋ ጊዴና። ሄዋ ዲራው፥ ዶርሳቱዋ ኦይቄኔ ላሌ። 13ሻሉዋ ኣኪዴ ሄሚያዌ ባሬ ሻሎ ሄሚያ ዲራዉኔ ዶርሳባይ ኣ ቆፌና ዲራው፥ ዶርሳቱዋ ኣጊዴ ባቃቴ።
14-15«ታኒ ዶርሳ ሎይ ሄሚያዋ፤ ታ ኣቡ ታና ኤሪያዋዳን፥ ታኒካ ቃሲ ታ ኣባ ኤራይ። ሄዋዳንካ፥ ታኒ ታ ዶርሳቱዋ ኤራይ፤ ታ ዶርሳቱካ ታና ኤሪኖ። ቃሲ ታኒ ታ ዶርሳቱዋ ዲራው፥ ሃይቃናው ኮያዲ። 16ሃ ሲኩዋን ባይና ሃራ ዶርሳቱካ ታው ዴዒኖ። ታኒ ኡንቱንታካ ኣሃናው ቤሴ። ቃሲ ኡንቱንቱ ታ ኮሻ ሲሳና፤ ኢቲ ዉዲ ዴዓና፤ ሄሚያዌካ ኢቱዋ ጊዳናዋ።
17«ታኒ ታ ሼምፑዋ ዛራዴ ኣካና ማላ፥ ኣዴ ኢማናው ኮዪያ ዲራው፥ ታ ኣቡ ታና ሲቄ። 18ታኒ ዶሳዴ ታ ሼምፑዋ ኣ ኢሚያዋፔ ኣቲን፥ ታፔ ኦኒኔ ኣኬና። ታው ታ ሼምፑዋ ኣ ኢሚያ ማታይ ዴዔ፤ ቃሲ ዛራዴ ኣካናዉካ ማታይ ዴዔ። ታኒ ሃ ኣዛዙዋ ታ ኣዉዋፔ ኣካዲ» ያጌዳ።
19ሄ ሃሳያ ዲራው፥ ኣዪሁዳቱዋ ጊዱዋን ቃሲካ ሻኩ ሜቴዳ። 20ኡንቱንቱፔ ዳሪያ ባጋይ፥ «ኣኒ ፃላሂ ዴዔ! ኢ ጎዬ! ኣ ሃሳያ ኣዪሲ ሲሲቴ?» ያጌዲኖ።
21ሃራቱ ቃሲ፥ «ፃላሂ ኦይቄዳ ኣሳይ ሃዋዳን ሃሳዬና፤ ፃላሂ ቆቃ ኣሳ ኣይፊያ ፄሊሳናው ዳንዳዪዬ?» ያጌዲኖ።
ዬሱሲ ኢፄቴዳ
22ዬሩሳላሜን ጌሻ ጎሊያ ኣንጂሴዳ ጋላሳ ሃሳዪሲያ ባላይ ጋኬዳ፤ ሳዓይ ሄ ዎዴ ባልጉዋ። 23ዬሱሲ ጌሻ ጎሊያን ሶሎሞና ባራንዳን፥ ያኔ ሃኔ ሃሜቴ። 24ኣዪሁዳቱ ዬሱሳ ማታን ዩዪ ኣዴ፥ «ኔኒ ኑና ኣዉዴ ጋካናው ሲሳዴ ዎኒ? ኔኒ ኪሪስቶሳ ጊዶፔ፥ ኑሲ ጌሻዴ ኦዳ» ያጌዲኖ።
25ዬሱሲ ኡንቱንቱሲ ዛሪዴ፥ «ታኒ ሂንቴንቱሲ ኦዳዲ፤ ሺን ታና ኣማኒኪታ፤ ታኒ ታ ኣቡ ሱንን ኦያ ኪታይ ታባ ማርካቴ። 26ሺን ሂንቴንቱ ታ ዶርሳ ጊዴና ዲራው ኣማኒኪታ። 27ታ ዶርሳቱ ታ ኮሻ ሲሲኖ፤ ታኒ ኡንቱንታ ኤራይ፤ ኡንቱንቱካ ታና ካሊኖ። 28ታኒ ኡንቱንቱሲ ሜና ዴዑዋ ኢማይ፤ ቃሲ ኡንቱንቱ ኡባካ ሃይቂኪኖ። ኦኒኔ ታ ኩሺያፔ ኡንቱንታ ዎ ኣካናው ዳንዳዬና። 29ኡንቱንታ ታው ኢሜዳ ታ ኣቡ ኦፔኔ #10፡29 ኦፔኔ፡ ኡባፔ ጉሳ። ኣ፤ ኦኒኔ ታ ኣቡ ኩሺያፔ ኡንቱንታ ዎ ኣካናው ዳንዳዬና። 30ታኔ ታ ኣቡ ኢቱዋ» ያጌዳ።
31ኣዪሁዳቱ ዬሱሳ ጫዳናው ቃሲካ ሹቻ ዴንዲኖ። 32ዬሱሲ ኡንቱንታ፥ «ታኒ ኦናው ታ ኣቡ ታው ኢሜዳ ዳሮ ሎዖ ኦሱዋ ሂንቴንታ ቤሳዲ፤ ሄዋንቱፔ ሃቃዋንቱ ዲራው፥ ታና ሹቻን ጫዳናው ኮዪቴ?» ያጌዳ።
33ኣዪሁዳቱ ዛሪዴ፥ «ኑኒ ኔና ሎዖ ኦሱዋ ዲራው፥ ሹቻን ጫዳናው ኮዮኮ፤ ሺን ኔኒ ፆሳ ቦላ ቦሪያ ቃላ ሃሳዪያ ዲራዉኔ ቃሲ ኣሳ ጊዳዴ ኔ ሁጲያ ፆሳ ኦዳ ዲራው፥ ጫዳናው ኮዬቶ!» ያጌዲኖ። #ዎግ 24፡16
34ዬሱሲ ዛሪዴ፥ «ሂንቴንቱ ሂጊያን ፆሳይ፥ ‹ሂንቴ ፆሳቱዋ› ጌዳዌ ፃፌቲቤኔ? #ማዝ 82፡6 35ፆሳ ማፃፋቱዋ ላማናው ዳንዳዬቴና፤ ፆሳይ ባሬ ቃላይ ዬዳ ኣሳቱ፥ ‹ፆሳቱዋ› ጊዴ ፄሴዳዋ ጊዶፔ፥ 36ታኒ፥ ‹ታኒ ፆሳ ናዓ› ጌዳ ዲራው፥ ታ ኣቡ ኣንጂዴ፥ ሳዓ ኪቴዳ ታና፥ ‹ፆሳ ቦላ ቦሪያ ቃላ ሃሳያ› ያጊቴ? 37ታኒ ታ ኣቡ ኦያዋ ኦና ዮፔ፥ ታና ኣማኖፒቴ። 38ሺን ታኒ ኦያዋ ጊዶፔ፥ ሃራይ ኣቶ ሂንቴንቱ ታና ኣማናና ዮፔካ፥ ታ ኣቡ ታናን ዴዒያዋኔ ታኒካ ታ ኣቡን ዴዒያዋ ኤራናዳኒኔ ኣኬካናዳን፥ ታ ኦሱዋ ኣማኒቴ» ያጌዳ።
39ቃሲካ ኡንቱንቱ ኣ ኦይቃናው ኮዬዲኖ፤ ሺን ኢ ኡንቱንቱፔ ኬሲ ኣኪዴ ቤዳ።
40ዮሃኒሲ ካሴ ፃማቂያሳ ዮርዳኖሳ ሻፋፔ ሄፊን ዬሱሲ ፒኒዴ፥ ያኒ ዴዔዳ። 41ዳሮ ኣሳይ ዬሱሳኮ ዪዴ፥ «ዮሃኒሲ ዎልቃማ ማላታ ኦቤና፤ ሺን ኢ ሃ ቢታኒያባ ሃሳዬዳባይ ኡባይ ቱማ» ያጌዲኖ። 42ያኒ ዳሮ ኣሳይ ዬሱሳ ኣማኔዳ።
Currently Selected:
ዮሃኒሳ 10: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa