ያዪቆባ ኪታ 3
3
ኢንፃርሳ ናጊያዋ
1ታናዳን ፆሳ ካሊያዋንቶ፥ ኑኒ ሃራቱዋፔ ኣያ ፒርዳ ኣካናዋ ሂንቴ ኤሪያ ዲራው፥ ሂንቴፔ ጮራቱ ታማሪሲያዋንታ ጊዶፒቴ። 2ኑኒ ኡባዪካ ዳሮባን ባሌቶ፤ ኢቲ ኡራይ ባሬ ሃሳያን ሙሌካ ባላና ዮፔ፥ ኢ ባሬና ናጋናው ዳንዳዪያ ባሊ ባዪና ኣሳ። 3ፓራቱ ኑሲ ኣዛዜታና ማላ፥ ቢፃላ ባርሲዴ፥ ኑኒ ኮዪያሳ ኡባ ኡንቱንታ ኣፌቶ። 4ቤዒቴ፥ ማርካቤቱካ ቃሲ ሄዋ ኬና ዎልቃማ ጊዲዴ፥ ጎቱዋ ጫርኩዋን ላጌቶፔካ፥ ኡንቱንታ ላጊያዌ ባሬዋ ኮዪያሳ ዛሪዴ ላጊያ ቄሪ ጉ ሚን ላጌቲዴ ቢኖ። 5ሄዋዳን ኢንፃርሳይ ቦላ ጊዶን ጉ ኣሳቴ ጊዶፔካ፥ ዳሮ ዎልቃማባን ጬቄቴ።
ጉ ታማይ ዋኒዴ ዎልቃማ ዎራ ጉዲ! ኣኬኪቴ። 6ኢንፃርሳይካ ታማ ማላ። ኢ ኑ ኣሳቴ ጊዶን ኢታባ ኡባ ኦና ዳንዳዬ፤ ኣሳቴ ኡባ ቱኒሴ። ቃሲ ኑ ዴዑዋ ዎካ ታማን ጉዴ፤ ጋናሚያ ታማን ኢ ጉዴታናዋ። 7ኣዪሲ ጎፔ፥ ዶዓቱዋ፥ ካፋቱዋ ዛሪያ፥ ቲራን ጎሼቲያ ሾሻቱ ዛሪያኔ ኣባን ዴዒያ ሜታቱዋ ዛሪያ ኡባ ኣሳይ ኣዲሴዳ፤ ቃሲ ኡንቱንቱካ ኣዴዲኖ። 8ሺን ኦኒኔ ኢንፃርሳ ኣዲሳናው ዳንዳዪቤና፤ ኢንፃርሳይ ዎያ ማርዚ ኩሜዳ ጮዑ ጌና ኢታ ሜታ። 9ኑኒ ኢንፃርሳን ኑ ጎዳኔ ኣዉዋ ጋላቴቶ፤ ቃሲ ኣኒካ ፆሳ ማላቲዴ ሜቴዳ ኣሳ ሼቄቶ። #ዶም 1፡26 10ኢቲ ዶናፔ ጋላታይኔ ሼቃይ ኬሴ። ታናዳን ፆሳ ካሊያዋንቶ፥ ሄዌ ሄዋዳን ሃናናው ቤሴና። 11ፑልቱ ኢቲ ኦላፔ ማልዒያ ሃኔ ጫሚያ ሃ ፑልታናው ዳንዳዪ? 12ታናዳን ፆሳ ካሊያዋንቶ፥ ባላሲያ ጊያ ሚይ ዎጋራ ኣዪፋናው ዳንዳዪ? ዎይ ዎዪኒያ ቱራይ ባላሲያ ጊያ ሚ ኣዪፋናው ዳንዳዪ? ማፂኔ ማፂኔ ጊያ ሃፔካ ማልዖ ሃይ ኬሳና ዳንዳዬና።
ሳሉዋ ኣዳ ኤራኔ ሳዓ ኣዳ ኤራ
13ሂንቴ ጊዶን ኣዳ ኤራንቻዪኔ ኣኬካንቻይ ኦኔ? ባሬ ሎዖ ዴዑዋን ኦሴቴዳ ባሬ ኦሱዋ ኣዳ ኤራቴፔ ዪያ ኣሺኬቴን ቤሶ። 14ሺን ሂንቴ ዎዛናን ጫሚያ ቃናቲኔ ዪርጊ ዴዖፖ። ቃሲ ቱማቴ ቦላካ ዎርዶቶፒቴኔ ኦቶሬቶፒቴ። 15ሄዋ ማላ ኣዳ ኤራቴይ ሳሉዋፔ ዎያዋ ጊዴና፤ ሺን ሄዌ ሳዓባ፥ ኣሳዋ፥ ፃላሃቱዋዋ። 16ኣዪሲ ጎፔ፥ ቃናቲኔ ዪርጊ ዴዒያሳን ዋላሳዪኔ ኢታ ኦሶ ኡባይ ዴዔ። 17ሺን ቦላፔ ዪያ ኣዳ ኤራቴይ ኡባፔ ካሴ ጌሻ። ቃሲ ሳሮቴ ዶሲያዋ፥ ኣሺኬኔ ኤኖ ጊያዋ፤ ቃሲ ማሮቴይኔ ሎዖ ኣይፊ ኩሜዳዋ። ሲኔ ሎዖ ማላቲያ ኢታቴይ ባዪናዋ። 18ፂሎቴ ኣይፊ ሳሮቴ ኦያዋንቱ ሳሮቴን ዜሬዳ ዜሬፔ ቤቴዳ።
Currently Selected:
ያዪቆባ ኪታ 3: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa