1 ቴሴሎንቃ 2
2
ጳዉሎሲ ቴሴሎንቂያን ኦዳ ኦሱዋ
1ኑናዳን ፆሳ ካሊያዋንቶ፥ ኑኒ ሂንቴኮ ቤዳዌ ሜላ ጊዴናዋ ሂንቴንቱ ሂንቴንቱ ሁጴው ኤሪታ። 2ሺን ኑኒ ሂንቴኮ ያናፔ ካሴ ፒሊጲሲዮሳ ጊያ ካታማን ዋዬቴዳዋኔ ቦሬቴዳዋ ሂንቴንቱ ኤሪታ፤ ዳሮ ጳልቄይ ዴዖፔካ፥ ሂንቴንቶ ኣ ሚሺራቹዋ ቃላ ኦዳና ማላ፥ ፆሳይ ኑሲ ሚኖቴ ኢሜዳ። 3ኑኒ ሂንቴና ዎሲያዌ ባሊዴ ዎይ ቱናቴን ዎይ ጌኒያን ጊዴና።
4ሺን ፆሳይ ዎንጋላ ሃዳራ ኣካናው ኑኒ ኣማኔቲያዋንታ ጊዲና፥ ኑሲ ሄ ሃዳራ ኢሜዳ፤ ሄ ኢሜዳዋዳንካ ኑኒ ሃሳዬቶ። ቃሲ ኑኒ ኑ ዎዛና ፆሞሲያ ፆሳ ናሼቺያዋዳን ሃሳዬቶፔ ኣቲን፥ ኣሳ ናሼቺያዋዳን ሃሳዮኮ። 5ኑኒ ሂንቴኮ ጪሚያ ሃሳያና፥ ዎይ ኑኒ ዮራ ጌንያ ሃኖታን ዪቤናዋ ሂንቴንቱ ሎይ ኤሪታ፤ ፆሳይካ ኑሲ ማርካ። 6ኑኒ ኣሳፔ፥ ዎይ ሂንቴፔ፥ ዎይ ሃራንቱ ኦፔኔካ ቦንቹዋ ኣካናው ኮዪቤይኮ። 7ኑኒ ኪሪስቶሲ ኪቴዳዋንታ ጊዲዴ፥ ቦንቹዋ ሂንቴንቱፔ ኦቻናው ዳንዳዬቶ። ሺን ኣታ ባሬ ናናቱዋ ሲቁዋን ዲቺያዋዳን፥ ሂንቴንቱ ጊዶን ኣሺኬ ጊዴዶ። 8ሂንቴንቱ ኑሲ ዳሮ ኣልዖ ጊዴዳ ዲራው፥ ፆሳ ዎንጋላ ሂንቴንቶ ኢማናዋ ፃላላ ጊዴናን፥ ኑ ዴዑዋካ ሂንቴንቶ ኢማናው ጊጊ ኡቴዶ፤ ኣዪሲ ጎፔ፥ ሂንቴና ኑኒ ሎይ ሲቄዶ። 9ኑናዳን ፆሳ ካሊያዋንቶ፥ ኑ ኦሱዋኔ ኑ ዳቡራ ሂንቴንቱ ኣኬኪታ፤ ሂንቴንቶ ፆሳ ሚሺራቹዋ ቃላ ኦዲዴ፥ ሂንቴና ኣዪኔ ዋዪሴና ማላ፥ ቃማኔ ጋላሲ ኑኒ ኦዶ።
10ኑ ዴዑ ሂንቴንቱ ማታን፥ ኣማኒያዋንቱ ማታን፥ ጌሻ፥ ፂሎኔ ቦሬቴናዋ ጊዲያዎ ሂንቴኔ ፆሳይ ማርካ። 11ኑኒ ሂንቴንቶ ሁጲያን ሁጲያን ኣዉ ባሬ ናናው ሃኒያዋዳን ሃኔዳዋ ኤሪታ። 12ኑኒ ሂንቴና ዞሬዶ፤ ሜንዶኔ ሂንቴንቶ ማርካቴዶ። ሄዌኔካ ሂንቴና ፄሴዳ ፆሳ ናሼቺያ ዴዑዋ ሂንቴንቱ ዴዓናዳናኔ ኣ ካዉቴኔ ኣ ቦንቹዋ ጌላናዳና።
13ሂንቴ ኑፔ ፆሳ ቃላ ቱማ ጊዴዳዋዳን ኣኬዳ ዎዴ፥ ፆሳ ኪታዳን ኣኬዳዋፔ ኣቲን፥ ኣሳ ኪታዳን ኣኪቤና ዲራው፥ ፆሳ ቃላይ ኣማኒያ ሂንቴናን ኦ፤ ሄ ጋሱዋን ኑኒ ፆሳ ኡባ ዎዴ ጋላቴቶ።
14ኣዪሲ ጎፔ፥ ኑናዳን ፆሳ ካሊያዋንቶ፥ ኪሪስቶሲ ዬሱሳን ኢቱዋ ጊዴዳ ዪሁዳ ጊያ ጋዲያን ዴዒያ ኣማኒያዋንታ፥ ሂንቴንቱ ሌሚሴቲታ፤ ሄዋንቱ ፆሳ ኣማኒያዋንታ። ኣዪሁዳቱ ኡንቱንታ ዋዪሴዳዋዳን፥ ሂንቴንቱ ቢታ ኣሳይካ ሂንቴና ዋዪሴዳ። 15ሄ ኣዪሁዳቱ ጎዳ ዬሱሳኔ ናባቱዋ ዎዲኖ፤ ቃሲ ኑና ዬዴርሴዲኖ። ኡንቱንቱ ፆሳ ናሼቺኪኖ፤ ኣሳ ኡባካ ኢፂኖ። 16ኣዪሁዳ ጊዴና ኣሳይ ኣታና ማላ፥ ኑኒ ኡንቱንቶ ቃላ ኦዲያዋ ዲጊኖ። ቃሲ ኡንቱንቱ ናጋራይካ ኡባ ዎዴ ዳሪ ዳሪ ቤ። ሺን ዉርሴን ፆሳ ሃንቁ ኡንቱንቱ ቦላ ዎዳ።
ጳዉሎሲ ቴሴሎንቂያ ኣሳ ላዔንዋ ፆሞሳናው ኣሞቴዳ ኣሙዋ
17ሺን ኑናዳን ፆሳ ካሊያዋንቶ፥ ኑኒ ኑ ቆፋን ጊዴናዳን፥ ኣሳቴ ፃላላን ሂንቴፔ ጉ ዎዴው ሻኬቴዳ ዎዴ፥ ሂንቴና ዳሮ ላሞቲዴ፥ ኣይፊያን ቤዓናው ሎይ ኮዬዶ። 18ኣዪሲ ጎፔ፥ ኑኒ ሂንቴኮ ሲሚዴ ባናው ኮዬዶ። ኡባ ታኒ ጳዉሎሲ ዛራ ዛራዴ ሂንቴኮ ባናው ማላ ቤዓዲ፤ ሺን ሴፃናይ ኑና ዲጌዳ። 19ኣዪሲ ጎፔ፥ ኑ ጎዳ ዬሱሲ ኪሪስቶሲ ዪያ ዎዴ፥ ኑኒ ቤዓና ጊዴ ናሼቻን ናጊያዌ፥ ዎይ ኑ ናሼቻይ፥ ዎይ ኑኒ ጬቄቲያ ኣኪሊሊ ኦኔ? ሂንቴና ጊዲኪቴዬ? 20ኣዪሲ ጎፔ፥ ሂንቴንቱ ኑ ቦንቹዋኔ ኑ ናሼቻ።
Currently Selected:
1 ቴሴሎንቃ 2: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa