Markhus 16
16
Buʼaas Isa al-Masiih
1Wakit yoom al-sabt kammal, Mariyam al-Magdaliiye wa Saluuma wa Mariyam amm Yaakhuub maragan wa charan riihe achaan yusubbanha fi janaazit Isa. 2Wa awwal yoom fi l-subuuʼ, bakkaran be fajur badri wa wassalan fi bakaan al-khabur maʼa taluuʼ al-harraay. 3Wa gaaʼidaat yihajjan ambeenaathin wa yuguulan : «Yaatu al-yidardig leena al-hajar al-kabiir min khachum al-khabur ?»
4Wa rafaʼan ruuseenhin wa chaafan al-hajar mudardag khalaas min khachum al-khabur. Wa l-hajar da kabiir bilheen. 5Wa dakhalan fi l-khabur wa chaafan malak yichaabih sabi, laabis khalag abyad wa gaaʼid tihit fi nussihin al-zeenaay. Wa hinna khaafan marra waahid. 6Wa hu gaal leehin : «Ma tibarjilan. Intan gaaʼidaat tifattichan Isa al-min al-Naasira, al-katalooh fi l-saliib. Hu baʼas khalaas ! Hu ma fiih hini ! Chiifan al-bakaan al-awwal raggadooh foogah. 7Wa hassaʼ amchan le talaamiizah wa le Butrus wa guulan leehum : ‹Isa maachi giddaamku fi daar al-Jaliil wa hinaak tichiifuuh misil hu awwal gaalah leeku.›»
8Wa l-awiin maragan min al-khabur wa jaran. Wa hinna gaaʼidaat yarjifan min al-ajab wa l-khoof. Wa ma hajjan beyah le ayyi naadum achaan hinna khaayfaat.
Al-Masiih baan le Mariyam
9Wa Isa baʼas fajur badri fi yoom al-ahad. Wa hu baan awwal le Mariyam al-Magdaliiye wa di l-mara al-awwal tarad minha sabʼa chawaatiin. 10Wa hi gammat wa hajjat beyah le rufgaanah. Wa humman haznaaniin wa gaaʼidiin yabku leyah. 11Wa hi oorathum kadar Isa hayy wa hi chaafatah wa laakin humman abo ma saddago kalaamha.
Al-Masiih baan le naaseen
12Wa baʼad da, naaseen min al-talaamiiz maachiin fi l-kadaade wa Isa baan leehum suurtah chig. 13Wa humman gabbalo fi l-madiina wa ooro beyah al-talaamiiz al-aakhariin laakin al-aakhariin ma saddago be kalaamhum.
Al-Masiih baan le l-ihdaachar
14Wa baʼadeen Isa baan le l-talaamiiz al-ihdaachar wakit humman gaaʼidiin yaakulu. Wa hu harajaahum achaan ma aamano wa gawwo ruuseehum wa abo ma saddago kalaam al-naas al-chaafooh baʼad hu baʼas. 15Wa gaal leehum : «Amchu fi kulla l-ard wa ballukhu al-bichaara le kulla l-naas fi kulla bakaan. 16Wa ayyi naadum al-yiʼaamin beyi wa yikhattusuuh, yanja. Wa ayyi naadum al-ma yiʼaamin beyi, Allah yiʼaakhibah. 17Wa l-muʼminiin yisawwu ajaayib. Be usmi yaturdu chawaatiin wa yihajju be lukhkhaat judaad. 18Wa yakurbu dabiib wa kan yacharbo charaab al-indah samm, ma yisawwi leehum cheyy fasil. Wa yukhuttu iideehum fi l-mardaaniin wa l-mardaaniin yalgo al-aafe.»
Al-Masiih anrafaʼ fi l-samaawaat
19Wa baʼad al-Rabb Isa kallam leehum, hu anrafaʼ fi l-sama wa gaʼad fi kursi jamb Allah fi nussah al-zeenaay. 20Wa talaamiizah macho wa ballakho al-bichaara le l-naas fi ayyi bakaan. Wa l-Rabb aawanaahum wa antaahum ajaayib achaan yisabbit al-bichaara al-humman gaaʼidiin yiballukhuuha. Aamiin.
Currently Selected:
Markhus 16: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.