Ibraaniyiin 3
3
Isa akbar min Muusa
1Achaan da, ya akhwaani al-saalihiin al-Allah naadaaku kulluku le tadkhulu fi derbah, fakkuru fi Isa. Hu rasuul Allah wa kabiir rujaal al-diin al-aniina muʼminiin beyah wa nachhado leyah. 2Wa hu amiin le Allah al-kallafah be l-khidme di misil zamaan Muusa kula bigi amiin fi l-khidme al-Allah kallafah beeha fi kulla beetah. 3Laakin al-charaf al-waajib le Isa ziyaada min al-charaf al-waajib le Muusa misil al-naadum al-bana al-beet mukarram ziyaada min al-beet al-hu banaah. 4Wa kulli beet indah naadum al-banaah wa laakin Allah bas al-bana kulla cheyy.
5Wa Muusa al-bigi amiin fi kulla beet Allah, hu gaaʼid foogah achaan hu khaddaam Allah wa bigi chahaada le l-kalaam al-Allah yidoor yiballikhah fi l-mustakhbal. 6Laakin al-Masiih bigi amiin achaan hu Ibn Allah wa hu bas al-masʼuul fi beet Allah. Wa aniina be nufuusna bas beetah, kan nagoodu saabtiin bala chakak wa nukhuttu achamna daayman fi l-Masiih al-aniina nilfachcharo beyah.
Masal al-juduud al-gawwo ruuseehum
7Achaan da, asmaʼo al-kalaam al-buguulah al-Ruuh al-Khudduus :
<Al-yoom, kan simiʼtu hiss Allah,
8ma tigawwu ruuseeku
misil juduudku al-abo
ma taabaʼo kalaamah
fi yoom al-tajriba fi l-sahara.
9Fi l-bakaan daak, juduudku jarrabooni
wa amtahanooni hatta kan chaafo amali
10fi muddit 40 sana.
Wa khalaas, ana ziʼilt min al-naas dool
wa gult : «Humman chaʼab aasiyiin
wa ma yaʼarfu derbi.»
11Wa fi zaʼali, ana halaft wa gult
abadan ma yadkhulu fi raahti.>#3:11 Al-kalaam da talgooh fi Zabuur 95:7-11.
12Ya akhwaani, khuttu baalku achaan galib hana ayyi naadum ma yabga fasil wa yaaba al-iimaan wa yamrug min derib Allah al-Hayy. 13Achchaajaʼo ambeenaatku kulla yoom. Aywa, kulla l-ayyaam ninaaduuhum «al-yoom», achaan al-zanib ma yukhuchch naadum minku wa yigawwi raasah. 14Achaan kullina bigiina muchaarikiin fi l-Masiih kan sahiih nitaabuʼu al-iimaan al-indina min al-bidaaya wa nagoodu saabtiin foogah lahaddi l-nihaaya. 15Al-Kitaab buguul : <Al-yoom, kan simiʼtu hiss Allah, ma tigawwu ruuseeku misil juduudku al-abo ma taabaʼo kalaamah.>#3:15 Al-kalaam da talgooh fi Zabuur 95:7-8.
16Yaatumman al-naas al-simʼo kalaam Allah laakin abooh ? Humman kulla l-naas al-marago min Masir wa taabaʼo Muusa. 17Wa yaatumman al-naas al-Allah ziʼil minhum fi muddit 40 sana ? Humman al-naas al-aznabo wa janaazaathum faddalo fi l-sahara. 18Wa yaatumman al-naas al-Allah halaf leehum kadar ma yadkhulu fi raahtah ? Humman al-naas al-iso Allah. 19Wa khalaas be l-kalaam da, naʼarfu kadar ma gidro dakhalo fi raahtah achaan ma induhum iimaan.
Currently Selected:
Ibraaniyiin 3: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.