Kuluusi 3
3
Al-haya al-jadiide fi l-Masiih
1Akiid ligiitu haya jadiide fi buʼaas al-Masiih wa achaan da, khuttu baalku fi l-achya al-gaaʼidiin fi l-sama maʼa l-Masiih al-gaaʼid jamb Allah fi nussah al-zeenaay. 2Khuttu afkaarku fi l-khumaam al-samaawi wa ma fi l-khumaam al-ardi 3achaan intu muttu maʼa l-Masiih wa l-haya al-Allah antaaha leeku, hi lissaaʼ ma tinchaaf. Hi maʼa l-Masiih fi iideen Allah. 4Al-Masiih bigi leeku al-haya wa wakit hu yaji battaan, intu tibiinu maʼaayah fi majdah.
5Achaan da, guchchu marra waahid min afkaarku kulla cheyy al-min al-ard misil al-zina wa l-haal al-cheene wa l-chahwaat al-fasliin wa l-niiye al-fasle wa l-tamaʼ. Wa be l-sahiih, al-tamaʼ hu misil ibaadat al-asnaam. 6Fi chaan al-zunuub dool, khadab Allah yanzil fi l-aasiyiin. 7Wa awwal, intu kula haalku kaanat misil haalhum wakit intu gaaʼidiin titaabuʼu al-chahwaat dool. 8Laakin hassaʼ, khallu minku kulla cheyy al-ma adiil. Khallu minku al-khabiine wa l-zaʼal wa l-hasiife wa l-gatiiʼe wa l-kalaam al-cheen. 9Ma takdubu le akhwaanku battaan achaan intu khalleetu al-haal al-gadiime maʼa kulla aadaatha. 10Intu chiltu al-haya al-jadiide wa Allah gaaʼid yijaddidku wa yiziid leeku al-irfe lahaddi tichaabuhu misil suurat Allah al-khalagaaku. 11Wa fi l-haya al-jadiide di, ma muhimm battaan kan naadum Yahuudi walla ma Yahuudi, wa kan mutahhar walla ma mutahhar, wa kan ajnabi walla min al-kadaade, wa kan abid walla hurr. Laakin al-Masiih hu gaaʼid fiina kullina wa hu bas al-muhimm.
12Ya l-naas al-Allah azalaaku, bigiitu saalihiin wa mahbuubiin. Achaan da, albaso al-mahanna wa khalli guluubku yabgo buyud wa nafasku yabga baarid wa abgo daluuliin wa sabuuriin. 13Wa alhammalo al-waahidiin le l-aakhariin be mahabba. Wa kan naadum indah daliime foog akhuuh, khalli yisaamihah. Al-Rabb saamahaaku wa achaan da, waajib leeku tissaamaho ambeenaatku. 14Wa ziidu le kulla l-achya dool al-mahabba al-tarbut kulla cheyy tamaam wa tijiib al-wihda. 15Khallu salaam al-Masiih yamluk fi guluubku achaan Allah naadaaku le tiʼiichu fi l-salaam wa jaʼalaaku jisim waahid. Wa abgo chakuuriin.
16Khallu kalaam al-Masiih yaskun ambeenaatku be kulla barakaatah. Allumu beyah ayyi waahid wa achchaajaʼo ambeenaatku be kulla hikma. Khannu le Allah be kulla guluubku wa khine wa anaachiid wa chukur min al-Ruuh al-Khudduus. 17Wa kulla cheyy al-tisawwuuh, kan be kalaam walla be fiʼil, sawwuuh be usum al-Rabb Isa wa be usmah achkuru Allah abuuku.
Al-beet al-Masiihi
18Ya l-awiin, asmaʼan kalaam rujaalkan misil waajib le l-awiin al-yitaabiʼan al-Rabb. 19Ya l-rujaal, hibbu awiinku wa ma takurbu leehin fi guluubku.
20Ya l-iyaal, asmaʼo kalaam waaldeenku fi kulla cheyy achaan da yiraddi Rabbina. 21Ya abbahaat al-iyaal, ma tizaʼʼulu iyaalku. Kan tizaʼʼuluuhum ziyaada, akuun yiwadduru achamhum.
22Ya l-abiid, fi kulla cheyy taabuʼu kalaam al-naas al-fi l-dunya di, humman siyaadku. Taabuʼu kalaamhum daayman wa ma wakit humman gaaʼidiin yichiifuuku bas wa la wakit tidooru minhum al-chukur. Laakin taabuʼu kalaamhum be galib mukhlis achaan Rabbina hu siidku al-intu khaayfiin minnah. 23Ayyi khidme al-yantuuku, akhdumuuha be niiye waahide. Khuttu fi afkaarku kadar takhdumu le Rabbina wa ma le l-naas bas. 24Aʼarfu kadar talgo warasa min al-Rabb wa di bas ujritku. Intu gaaʼidiin takhdumu le Rabbina al-Masiih. 25Wa ayyi naadum al-yisawwi cheyy fasil, al-Rabb yiʼaakhibah fi chaan fasaaltah. Rabbina ma yichiif naadum akheer min al-aakhar.
Currently Selected:
Kuluusi 3: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.