2 Kuruntus 11
11
Haal al-rasuul al-sahiih
1Chiilu sabur achaan hassaʼ nidoor nihajji leeku chiyya misil naadum ma indah fikir. Chiilu sabur bas. 2Ana indi mahabba chadiide leeku wa mahabbiti di jaaye min Allah. Ana misil abu al-bineeye al-lissaaʼha ma chaafat raajil wa intu bas al-bineeye. Wa ana sawweet mawʼid achaan al-bineeye di taakhud raajil waahid wa hu al-Masiih. Wa nidoor nigaddimku leyah misil bineeye al-ma indaha eeb.
3Laakin naʼarfu kadar al-daabi khachcha Hawwa be najaadtah#11:3 al-daabi khachcha Hawwa Al-taariikh da talgooh fi Takwiin 3:1-7. wa hassaʼ ana khaayif leeku. Akuun naadum yitallif fikirku achaan ma titaabuʼu al-Masiih be mahabba saadkhe wa mukhlisa. 4Ana khaayif achaan kan naadum yamchi leeku wa yiballikh leeku be Isa aakhar chig min Isa al-aniina ballakhnaaku beyah, intu takhbalooh. Achaan intu jaahiziin le takhbalo ruuh chig min al-Ruuh al-Khudduus al-awwal khibiltuuh. Wa kan naadum yiballikh leeku bichaara chig min al-bichaara al-awwal khibiltuuha, ana khaayif intu titaabuʼuuh ajala. Wa tasburu le l-naadum al-misil da.
5Wa l-rusul al-intu tuguulu humman kubaar dool, ana nuguul ana ma sakhayyar minhum be cheyy. 6Sahiih, ana ma nikallim kalaam saʼab misil kalaam al-ulama laakin ilmi chadiid bilheen. Wa da waddahnaah leeku kulluku fi kulla cheyy.
7Wa taʼarfu kadar ana ma talabt minku gurus wakit ballakht leeku bichaarat Allah. Wa be misil da, ana sawweet nafsi sakhayyar achaan intu tabgo kubaar. Wa hassaʼ tuguulu da khata minni ana walla ? 8Angarʼu ! Ana chilt musaaʼada min jamaaʼaat al-muʼminiin al-aakhariin achaan nakhdim leeku. Wa da misil ana sirigt minhum fi chaanku. 9Wa wakit ana maʼaaku wa bigiit hawjaan, ana ma kallaft ayyi naadum minku. Al-akhwaan al-jo min Magiduuniya bas saaʼadooni be l-cheyy al-gassar leyi. Wa ana abeet ma kallaftuku be ayyi cheyy wa abadan ma nikallifku. 10Nuguul leeku al-hagg be usum al-Masiih al-gaaʼid foogi, nuguul leeku naadum waahid ma yadharni min al-fachaar da fi ayyi bakaan fi Akhaaya.
11Wa maala ma nikallifku ? Achaan ma nihibbuku walla ? Allah yaʼarif kadar ana nihibbuku bilheen. 12Wa ana nakhdim daayman misil ana khadamt min awwal. Wa misil da, al-naas al-yifaachuru be khidmithum ma yalgo fursa yuguulu humman rusul sawa sawa maʼaayi. 13Al-fachchaariin dool, humman ma rusul be l-sahiih. Humman khaddaamiin khachchaachiin wa yisawwu nufuushum yichaabuhu rusul al-Masiih. 14Wa ma waajib tiʼajjubu min al-kalaam da, achaan Ibliis zaatah yisawwi nafsah yichaabih malak al-nuur. 15Wa kan khaddaamiin Ibliis kula yisawwu nufuushum yichaabuhu khaddaamiin Allah al-saalihiin, ma niʼajjubu minhum. Wa fi l-akhiir, yalgo al-waajib leehum hasab khidmithum.
Taʼab al-rasuul al-sahiih
16Wa nuguul battaan ma tahsubuuni ana naadum ma indah fikir. Laakin kan tahsubuuni ma indi fikir kula, akhbalooni. Wa be da, ana nagdar nilfachchar chiyya. 17Wa l-kalaam al-nuguulah be fachaar da ma misil Rabbina yidoorah laakin misil kalaam hana naadum al-ma indah fikir. 18Akiid naas katiiriin yilfachcharo be l-cheyy al-bukhuss al-insaan wa ana kula nilfachchar misilhum. 19Achaan ana chift kadar intu al-tuguulu fikirku gawi tahmalo al-naas al-ma induhum fikir be farah. 20Wa intu tahmalo al-naadum al-yisawwiiku abiidah walla yaakul maalku walla yasrig minku be khachch walla yistakbar giddaamku walla yudugguku amkaff. 21Wa da eeb leena achaan aniina ma kubaar wa ma sawweena al-cheyy al-yisawwuuh al-rusul al-kubaar dool !
Wa laakin ana nihajji misil ma indi fikir. Kan naadum yidoor yilfachchar be ayyi cheyy, ana kula nagdar nilfachchar mislah. 22Yuguulu humman Yahuud walla ? Ana kula Yahuudi. Humman min Bani Israaʼiil walla ? Ana kula min Bani Israaʼiil. Humman min zurriiyit Ibraahiim walla ? Ana kula min zurriiyit Ibraahiim. 23Humman khaddaamiin al-Masiih walla ? Chiifu ! Hassaʼ nihajji misil raasi laffa marra waahid !
Ana khaddaam akheer minhum. Khadamt be chidde ziyaada minhum. Karabooni fi l-sijin ziyaada minhum. Farachooni ziyaada minhum. Wa gaʼadt fi ust al-moot katiir. 24Al-Yahuud jaladooni khamsa marraat wa fi ayyi jalde 39 darbe.#11:24 39 darbe Hasab aadaat al-Yahuud, induhum izin yajludu naadum khaati lahaddi 39 darbe wa abadan ma ziyaada min da. 25Al-Roomaaniyiin farachooni talaata marraat be asa. Wa l-naas rajamooni marra waahide. Talaata marraat ana musaafir be safiina wa l-safiina ankasarat beyi fi ust al-bahar. Yoom waahid ana gaʼadt fi ust al-bahar yoom kaamil leel wa nahaar. 26Ana saafart katiir bilheen wa waajaht khutuura katiire. Khutuura wakit ana gaatiʼ al-buhuur wa khutuura min rabbaatiin al-duruub. Wa khutuura fi usut naasi al-Yahuud wa khutuura fi ust al-naas al-ma Yahuud. Wa khutuura fi l-hillaal wa khutuura fi l-kadaade wa khutuura fi ust al-bahar al-maalih. Wa khutuura fi ust al-muʼminiin al-khaayniin. 27Ana khadamt be duraaʼi wa tiʼibt wa fagadt daayman al-noom wa l-akil wa l-charaab. Wa katiir ke al-barid lihigaani wa khulgaan gassaro leyi.
28Wa battaan, fi cheyy aakhar. Kulla yoom, al-hamm al-chadiid yakrubni fi chaan ummat al-Masiih fi ayyi bakaan. 29Kan akhu waahid yadʼaf ana kula nadʼaf maʼaayah. Kan naadum yamurguuh min derib al-iimaan, ana nihiss be naar fi galbi.
30Kan waajib nilfachchar, nilfachchar be l-cheyy al-yiwassif kadar ana ma indi gudra. 31Wa Allah abu Rabbina Isa, hu al-waajib leyah al-chukur ila l-abad, yaʼarif kadar kalaami ma kidib. 32Wakit ana gaaʼid fi madiinat Dimachkh, dawwaro yakurbuuni. Wa fi l-wakit daak, haakim al-madiina al-kallafah al-malik al-usmah Al-Haaris rassal askarah achaan yaharsu kulla biibaan al-madiina achaan ma namrug. 33Wa ana da, al-akhwaan dallooni be chabaka min chubbaak waahid al-gaaʼid fi durdur al-madiina wa misil da bas nijiit minnah.#11:33 Al-taariikh da talgooh fi Aʼmaal al-Rusul 9:23-25.
Currently Selected:
2 Kuruntus 11: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.