1 Tasaluuniiki 2
2
Khidmit al-rasuul fi Tasaluuniiki
1Ya akhwaani, intu zaatku taʼarfu kadar intu faddaltuuna wa da ma saakit. 2Taʼarfu kadar jiina leeku min hillit Filibbi al-taʼʼaboona wa ayyaroona foogha bilheen. Laakin Allah antaana chajaaʼa wa gammeena niballukhu leeku bichaarat Allah, hatta kan al-naas khaalafoona be chidde kula. 3Wa da yiwassif kadar ninaadu al-naas fi l-derib al-adiil. Wa da ma be kidib wa la be niiye fasle wa la be najaada.
4Be l-aks, Allah chaaf guluubna wa kallafaana be l-bichaara wa achaan da bas, nibachchuru al-naas. Wa nibachchuruuhum da, ma achaan nidooru rida minhum laakin achaan nidooru rida min Allah al-yakchif guluubna. 5Abadan ma hajjeena kalaam hana khachch. Wa abadan ma indina tamaʼ achaan naakulu maal hana ayyi naadum. Allah chaahid le kalaamna. 6Wa kulla cheyy al-sawweenaah ma achaan nidooru chukur min al-naas wa la minku wa la min al-naas al-aakhariin. 7Aniina rusul al-Masiih wa indina hagg le natulbu minku cheyy katiir, laakin aniina ma chilna minku cheyy.
Wakit aniina gaaʼidiin fi usutku, hanneena foogku misil al-amm al-tihinn fi iyaalha. 8Aniina gaaʼidiin nihinnu foogku wa achaan da, dawwarna nantuuku bichaarat Allah. Wa ziyaada min da, dawwarna nantuuku nufuusna achaan nihibbuuku bilheen.
9Ya akhwaani, fakkuru fi taʼabna wa amalna. Leel wa nahaar khadamna be duraaʼna. Ma dawwarna nikallufu naadum minku beena wakit aniina gaaʼidiin niballukhu leeku bichaarat Allah. 10Intu zaatku tagdaro tachhado leena wa Allah kula chaahid kadar haalna maʼaaku intu al-muʼminiin, hi saalhe wa adiile wa ma indaha eeb. 11Wa taʼarfu kadar aniina bigiina maʼa ayyi naadum minku misil al-abu maʼa iyaalah. 12Wa aniina daayman chajjaʼnaaku wa sabbarnaaku wa wasseenaaku be chidde achaan tiʼiichu be l-haal al-waajbe le l-naas al-Allah naadaahum le yadkhulu fi mamlakatah wa majdah.
13Wa fi chaan da, nachkuru Allah daayman achaan wakit simiʼtu minnina kalaam Allah, intu karabtuuh gawi. Khibiltuuh ma misil kalaam insaani bas laakin khibiltuuh misil kalaam Allah. Wa be l-sahiih, hu kalaam Allah wa gaaʼid yisawwi khidimtah fi guluubku intu al-muʼminiin.
14Ya akhwaani, misil da, intu taabaʼtu nafs al-derib misil naas Allah ummat al-Masiih akhwaanku al-yitaabuʼu al-Masiih Isa fi daar al-Yahuudiiya. Wa intu bigiitu misilhum. Naas baladku taʼʼabooku misil al-Yahuud kula taʼʼabo akhwaanhum naas al-Masiih al-fi baladhum. 15Al-Yahuud dool, humman bas al-katalo al-Rabb Isa wa l-anbiya al-gubbaalah. Wa leena aniina kula, taʼʼaboona bilheen. Humman yikhaddubu Allah wa khalaas bigo adu le kulla l-naas. 16Humman yadharoona ma niballukhu al-bichaara al-tinajji al-naas, le l-naas al-ma Yahuud. Wa misil da, yitammumu adad zunuubhum marra waahid wa khadab Allah nazal fooghum khalaas.
Al-rasuul muchtaag leehum
17Ya akhwaani, aniina anfaragna minku le wakit chiyya. Wa kan aniina macheena baʼiid minku kula, guluubna gaaʼidiin maʼaaku. Wa aniina muchtaagiin leeku be ziyaada wa dawwarna nichiifuuku battaan. 18Dawwarna nigabbulu leeku, khaassatan ana Buulus. Haawalna namchu leeku iddat marraat laakin Ibliis sadda leena al-derib. 19Aywa, nidooru nichiifuuku battaan achaan intu bas achamna wa farahna. Wa fi yoom jayyit Rabbina Isa, chunu al-daliil al-yiwassif khidmitna ma fachalat ? Al-daliil hu intu wa iimaanku. 20Aywa be sababku intu bas, narfaʼo ruuseena foog wa nafraho bilheen.
Currently Selected:
1 Tasaluuniiki 2: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.