1 Butrus 2
2
1Achaan da, khallu minku kulla l-fasaala wa kulla l-najaada wa l-nifaakh wa l-husud wa l-gatiiʼe. 2Wa misil al-sakhiir al-yitmanna laban ammah, intu kula atmanno kalaam Allah al-misil laban saafi. Wa be l-kalaam da, takburu wa talgo al-naja. 3Achaan intu dukhtu wa iriftu kadar Rabbina al-Masiih rahiim.
Isa hu al-hajar al-hayy
4Garrubu leyah. Hu bas al-hajar al-hayy al-Allah azalah al-muhimm bilheen laakin al-naas ma dawwarooh. 5Wa intu kula misil hujaar al-hayyiin al-Allah gaaʼid yabni beeku beet hana Ruuhah. Wa intu rujaal diin khaassiin wa gaaʼidiin tigaddumu le Allah dahaaya be izin al-Ruuh al-Khudduus al-Allah yarda beehum be waasitat Isa al-Masiih. 6Wa Allah gaal fi l-Kitaab :
<Asmaʼo. Ana nukhutt fi jabal Sahyuun hajar zaawiye.
Wa hu al-hajar al-khaali al-ana azaltah.
Wa l-yiʼaamin beyah, abadan ma yakhjal.>#2:6 Al-kalaam da talgooh fi Ichaʼya 28:16.
7Wa leeku intu al-muʼminiin, al-Masiih hu al-hajar al-indah khiima kabiire. Wa laakin le l-naas al-ma muʼminiin, hu bigi misil al-kalaam al-maktuub fi l-Kitaab al-buguul :
<Al-hajar al-bannaayiin al-beet awwal ma dawwarooh
bigi al-hajar al-muhimm fi buna al-beet.>#2:7 Al-kalaam da talgooh fi Zabuur 118:22.
8Wa battaan buguul :
<Asmaʼo, ana nukhutt hajar fi Sahyuun.
Be sababah, al-naas yintaggo wa yagaʼo.>#2:8 Al-kalaam da talgooh fi Ichaʼya 8:14.
Wa yintaggo foogah achaan abo ma yitaabuʼu kalaam Allah wa da mukhaddar leehum.
9Laakin kan leeku intu, bigiitu al-gabiila al-Allah azalaaha wa rujaal diin hana l-malik al-kabiir wa umma mukhassasa le Allah wa chaʼab Allah zaatah. Hu naadaaku achaan tamurgu min al-dalaam wa tadkhulu fi nuurah al-ajiib wa khalaas tiballukhu khabar hana aʼmaal Allah al-kubaar. 10Wa maktuub fi l-Kitaab :
<Awwal intu ma chaʼab Allah
laakin hassaʼ intu bigiitu chaʼabah.
Awwal rahmat Allah ma jaat foogku
laakin hassaʼ rahmatah jaat foogku khalaas.>#2:10 Al-kalaam da talgooh fi Huuchaʼ 2:23.
Abiid Allah ajaanib fi l-dunya
11Ya akhwaani al-nihibbuku al-aaychiin fi l-dunya misil ajaanib wa diifaan, nuguul leeku angarʼu. Chahwaat al-insaan adu. Aabo ma titaabuʼuuhum. 12Khalli haalku fi ust al-naas al-ma muʼminiin tabga adiile. Wa be misil da, kan yakdubu fiiku wa yuguulu intu naas fasliin kula, yichiifu amalku al-sameh wa fi l-akhiir, yimajjudu Allah fi yoom al-faraj.
13Fi chaan Rabbina, taabuʼu kalaam hana ayyi naadum al-indah sulta. Taabuʼu kalaam al-malik, kabiir al-balad, 14wa l-hukkaam al-hu khattaahum le yahkumu al-mujrimiin wa yachkuru al-naas al-yisawwu al-kheer. 15Wa da al-yidoorah Allah leeku. Be l-kheer al-tisawwuuh, tiwaggufu al-kalaam al-baatil al-yuguuluuh foogku al-naas al-juhhaal. 16Iichu be hurriiye laakin ma tichiilu al-hurriiye di fursa le tisawwu beeha al-fasaala wa ma tanso kadar intu abiid Allah. 17Karrumu kulla l-naas. Hibbu kulla akhwaanku al-muʼminiin. Akhaafo Allah. Karrumu al-malik.
Wasaaya le l-abiid
18Wa leeku intu al-abiid, asmaʼo kalaam siyaadku be kulla ihtiraam. Kan humman zeeniin wa kalaamhum baarid walla kan kalaamhum murr kula, asmaʼo kalaamhum. 19Wa aʼarfu ayyi naadum al-yahmal al-taʼab be sabur fi chaan Allah wakit al-naas yazulmuuh, al-naadum da Allah yibaarikah. 20Wa kan tisawwu khata wa be sababah yudugguuku wa intu tahmalooh be sabur, chunu al-faayde ? Laakin kan intu tisawwu al-kheer wa yitaʼʼubuuku be sababah wa intu tahmalooh be sabur, khalaas Allah yibaarikku.
21Da bas al-derib wa Allah naadaaku le tichiiluuh. Achaan al-Masiih kula tiʼib fi chaanku wa bigi leeku masal achaan titaabuʼuuh.
22<Hu ma aznab
wa fi khachmah ma fi khachch.>#2:22 Al-kalaam da talgooh fi Ichaʼya 53:9.
23Wakit ayyarooh,
hu ma radda leehum be muʼyaar.
Wakit taʼʼabooh,
hu ma haddadaahum.
Fi badalah, hu atwakkal ale Allah
al-yihaasib be l-hagg.
24Wa fi l-saliib, hu be nafsah
hamal zunuubna fi jismah
achaan nikhallu al-zunuub marra waahid
wa niʼiichu be haal saalhe.
Wa be waasitat jiraahah,
intu ligiitu al-chifa.
25Achaan awwal intu misil khanam muwaddiriin
laakin hassaʼ gabbaltu le raaʼiiku al-yahfadku.#2:25 Al-kalaam da talgooh fi Ichaʼya 53:6.
Currently Selected:
1 Butrus 2: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.