Azaya 1
1
1Ŋ̀orɛ̂-woo-ŋai gáa gɔlɔi ŋí sui, Ɣâla è dɛ̀ɛ Zuda da Zerusâlɛŋ-ƃelai pɔ́. È ŋ̀áa lɛ̀ Emɔ ǹóŋ Azaya ma zĩ̂a su. Ɣâla è ŋ̀orɛ̂-woo-ŋai ŋí tɛ̀ɛ ǹûai ŋí pɔ́naa a Gâloŋ Uzia, Zotaŋ, Eeɣa da Ɛsekaya-ni díkâloŋ-laai kɛ́ tãi ma a tɛɛ-ŋa.
Ɣâla è ŋɔnûai dí mɛni nyɔ́mɔɔi lɛ̀ dîa
2È mò ǹûai dîa a gɛɛ Ɣâla Yâwɛɛ ǹyɛɛi, “Ŋ̀elei da ǹɔii su-ƃelai kélee, ka káwoli tɔ́ɔ m̀ɛnii ma ŋa pâi m̀ôi. Ǹîa-pɛlɛɛi ŋá díkùla zui, da tɔ́ɔ ḿâ. 3Niŋa-ŋa dí dínuu-namu kɔ́lɔŋ. Wɛlɛ-sôo-ŋa dí ƃɛ́i kɔ́lɔŋ dínuu-nâmu a díkɔ̃nɔŋ pù naai. Kɛ́lɛ dáre sii ŋí fé ŋánûai Eezuɛ-ŋai ŋuŋ su. Dífa mɛni ŋá kàa a dɔnɔ kpîŋ.”
4Káai a Eezuɛ-ƃelai, kpalo-ƃêlaai kâa. Kákaa a sɔnyɔ̂ŋ-ƃela. Kákaa a wôya-ƃela da ŋwana lɔ̂ɔ-ƃela lônii. Kásɔnyɔ̂ŋ a ká ɣíri. Ka káyee kúla Eezuɛ Ŋɔɣâla Maa Waai Yâwɛɛ mu, ka kápôlu tɔɔ m̀a. 5Óo ŋánûa, zɔnyɔ̂ŋ kula maa kɛ́ɛ ka zɔlɔ ƃôi, vé gula kɛ̂ɛ ƃó ní kámɛni ma? Lé mɛni ƃé ka tɔɔ̂i la m̀ai? Ka ŋ̀wɛ̂lii é ká kula maa kɛ́ a ŋ̀ánaa é tɛ́ɛ nyíti ma? Kɔlɔ a kpɛɛ kâa ka fûa. 6Kákɔlɔi fé pono ní. Kákpono gwaa kélee ma ɣala-ɣalâŋ ƃôɔɔi. Dífe nîi kápalai ŋá waa-ni dísale pú ŋá, dí ŋ̀á pɛ́lɛ.
7Ŋɔ̃ya-ŋa da kálɔii su-kara, da kátaa lêe-ŋai kélee kéreŋ. Dí m̀ɛni-ŋai ŋí kélee kɛ̀ káŋɛi, kálɔii é lɛ́ɛ a bûŋ. 8Zerusâlɛŋ taa-leei nɔ́ ƃé lɛ̀ɛ. Kɛ́lɛ maa mɛ̂ni káa yɛ̂ɛ boo-kpânaŋ da sûa su yeŋkeŋ. Gáa nɔ́ yɛ̂ɛ taa-lêe nyii kɔ-kuluƃa-ŋa da ǹaa pere-lee-ŋai kélee sóŋ. 9Ŋ̀wála-wâla kélee Ɣalai Yâwɛɛ è ǹúui da-ŋa ŋuŋ ma ƃò naa. Eêi wàla kɛ́ tí, dîi Zerusâlɛŋ taa-leei su kàra nɔ́ yɛ̂ɛ berei dí gɛ̀ la a Sodɔŋ da Gomora taa-lee-ŋai su-ƃelai.
10Káai a Zerusâlɛŋ taa-leei su-ƃelai, ka kálaa túɛ-ƃelai kákaa nɔ́ yɛ̂ɛ Sodɔŋ da Gomɔra-ƃelai. M̀ɛni ma, ka káwoli tɔ́ɔ Yâwɛɛ wóoi ŋí ma. Ka káwoli tɔɔ Kúɣâlai ŋɔsɛŋ lɛ́ɛi ma. 11A m̀ôi ǹyɛɛi, “Zâla támaai ka gulâi ḿâi, vé a sɛŋ dɔnɔ kpîŋ ŋ́ɛi. Káƃala-sîrɛ da niŋa sîrɛ sala támaai mɛni ƃɛlɛ fé ŋ́goi. Fé wɛ́li ní a niŋa sîrɛ, ƃála sîrɛ da ƃoli sîrɛ ŋãa mɛni. 12Gbɛ̂ɛ ƃé m̀o kâa a gɛɛ kà kɛ̀ pâi ḿvɛlîi ká pá a zama-sãai ŋíi? Gbɛ̂ɛ ƃé mò kâa a gɛɛ ká kɔ́ɔ mu tìŋ é kúla a gɛɛ ŋí Ŋápɛrɛ Kɛ́tɛi mu a gɛɛ ŋii? 13Ƃâa fé kásama-sãai dîa. Kákereŋ sãa kú nɛ̃ɛi kúŋ ƃɛlɛ fé ŋ́goi. Ka ŋ̀áloŋ nina kuui kûla, ká kɛ́ vii-tɔɔ ɣelei mɛi kâa, ká kɛ́ káɣâla mɛni kɛ́ kpɔŋ-ŋai tôo. Kɛ́lɛ kásɔnyɔ̂ŋ a gɛ̀ ƃâa fé ŋɔ́nɔ gúu-ŋai ŋí kélee dîa. 14Ka kɛ̀ ŋ̀áloŋ nina kuui kulâi, ká kɛ́ ŋ̀ele maa waa-ŋai mɛi kâa, ńii a kɛ̂ sôlii ŋ́goi. Díkaa a kpîri wuyɛɛ ḿaa mɛ̂ni ma. Ḿvii a nâa kpɛɛ ziɣe mɛ̂ni ma.
15“A nɛ̃ɛ ma kpîŋ ká kɛ́ ḿvɛ̀li, kákɛ káyee tɛ̀ ɣelêi, ŋa pâi ŋɛ́i loôi kâa, kpɛ́ni fêi, ŋãa támaa káa káyee ma. 16Ka kpera mɛni nyɔ́mɔɔ kɛ́ɛ ma, ká ǹanii wáa kâa. Tɔ̃yâ ma ka kpera mɛni nyɔ́mɔɔ kɛ́ɛ ma. 17Ka mɛni lɛ́lɛɛ-ŋa kɛ́-pere maa kɔ́ri. Ka gáa a gɛɛ núu kélee ŋɔtɔ̃yâ-laai é lí bɔ́. Káfe fàa ma dí núu da kula maa kɛ́ mɛni da ma nyii zɔŋ fé zui. Ka dee-noŋ-ŋai maa kɔ̃ɔ, ká lóno bɔɔ-nɛyãai mɛni ma.”
18Yâwɛɛ a m̀ôi ǹyɛɛi, “Ka pá kwaa kúloai kpɛtɛ kwa káa ni. Berei máŋ kásɔnyɔ̂ŋ a kpɔ̂lui la yɛ̂ɛ dóloi, ŋa pâi káwâai ká kɛ́ kóle yɛ̂ɛ yee fũa. Berei máŋ kásɔnyɔ̂ŋ a kpɔ̂lu la yɛ̂ɛ lólo-mãlaŋ, ŋa pâi káwaâi ká kɛ́ yɛ̂ɛ ƃála leɣa kole. 19À kɛ̀ kà fàa mà, woo mɛni kɛ́ ƃò káyêei, ka pâi ǹɔii ŋí ŋ̀úlɔ kpelêi. 20Kɛ́lɛ kà wàla fáa ma, kà tɔɔ ḿâ, ka pâi saa tí-ti ƃôi. Ńyãa Yâwɛɛ ƃé mò tí.”
Zɔnyɔ̂ŋ taa-leei
21Zerusâlɛŋ taa-leei, tãi tɔnɔ da, í kɛ̀ yɛ̂ɛ ǹɛnîi ńyii a bɔ̂ŋ wóo mɛnii. Tãi tɔnɔ da ínûai kélee dí kɛ̀ a teniŋ ƃô-ƃela. Kɛ́lɛ yâ nâa kɛ́ yɛ̂ɛ wulu-wulu kɛ́-nɛni. Ínûai kélee da kɛ́ a núu paa-ƃela. 22Zerusâlɛŋ, ímaa mɛni è kɛ̀ a gbanaŋɔɔ yɛ̂ɛ káne, kɛ́lɛ ƃâa fé ŋɔ́nɔ yâ. Íkɛ̀ yɛ̂ɛ ŋwã̂ai nɛ̃ɛ, kɛ́lɛ yâ kɛ́ nɔ́ zɔ̀ti-zɔti. 23Í lɔii mɛi-ƃelai da tɔɔ Yâwɛɛ ma. Díwɛli kɛ́-maa ƃelai díkaa a ŋúma-ƃela tee-tee. Yee pɛlɛ ǹá-sɛŋ mɛni wɛ́li káa dîa a ŋ̀ánaa. Dífe kpáaŋ ní bɔɔ-nɛyãai da dee-noŋ-ŋai mɛ̂ni ma. Dífa bɔɔ-nɛyâai dímɛni-saai ƃô a tɔ̃yâ-pere.
24M̀ɛni ma, Ŋ̀wála-wâla kélee Yâwɛɛi, Eezuɛ Ŋɔɣâla wála-walaai a m̀ôi ǹyɛɛi, “Káai a ŋ́gbɔara-ƃelai, ŋa pâi kákula maa kɛ̂i. À kɛ̀ tí, káfe ŋɔ́nɔ pâi tɔ̂ɔi ḿâ. 25Ŋa pâi kákula maa kɛ̂i. Ŋá káseɣenîi yɛ̂ɛ da kɔli sêɣeŋ a gɛ́ɛ dí gbó kúla ma. 26À kɛ̀ tí, ŋa pâi gɛ̂i ímɛni-saa ƃó-ƃelai díkɛ a nûa sãa-ŋa yɛ̂ɛ berei dí kɛ̀ la a bɔlɔɔi, ŋá dílîa-woo ƃo kɛ́-ƃelai kɛ́ yɛ̂ɛ berei díkɛ̀ la a gɔ́ɔ pîlanii. Nyíŋi pôlu ma, nûa da pâi ítôlii a daa-lêei nyíi zu-ƃela díkaa a teniŋ ƃô da tɔ̃yâ-ƃela.”
27Yâwɛɛ teniŋ ƃôɔɔi, m̀ɛni ma a pâi Zerusâlɛŋ ƃâloi é pɛ́lɛ diai pâi dílii penêi dîa. 28Kɛ́lɛ a pâi zɔnyɔ̂ŋ-ƃelai su-karâi da diai da tɔ̂ɔ m̀ai. Diai kélee da díyee kùla m̀ui, a pâi dípaâi.
29Ŋumɛ a pâi ká paâi, kpɛ́ni fêi, ka ôo wuru-ŋa sì ká díkɛ a káɣâla-ŋa kákɛ dífɛli. Kákɛ̀ gâai yɛ̂ɛ ka kwaa ma kpɛ̀tɛ ká nàa tɛɛ zí-sɛŋ lɛ́lɛ ɣâlai pɔ́, gɛ̀ ní a pâi lûwa lâai kási-sãai dîa, kɛ́lɛ ŋumɛ a pâi kákɛ̂i gwaa-ŋai ŋí ma mɛni ma. 30Ka pâi fɔ̃̀yâi yɛ̂ɛ ôo wuru a kɛ̀ pâi saâi, kpaa máŋ yɛ̂ɛ sí-sãa nyíi núu da fa yá pú dîai. 31Ŋ̀wála-wâla nuui da ŋɔtûa-pere nyɔ̂ŋ dísu a pâi karâi yɛ̂ɛ ŋɔŋ a kala-kpâla kèleŋ. Núu da fé pâi pɔrîi díkula yêei kɛ̂i.
Currently Selected:
Azaya 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia