Zɛkɛrâya 2
2
Zɛŋ-kɔ̂ɔŋ-ɣɛlii maa zĩ̂ai
1Ŋá nalôŋ tɔ̀nɔ kàa ŋázĩ̂ai su sɛŋ-kɔ̂ɔŋ-ɣɛli kɛ́ ƃɔ̀ ǹyêei. 2Ŋá m̀arê kɛ̀ ńyɛɛ mai, “Ƃa liî mí ta?” È zu tòo ǹyɛɛi, “Ŋa liî Zerusâlɛŋ kɔ̂ɔnii ŋá gáa berei gôyaai la da berei gɛ̂tɛi lai.”
3È kɛ̀ tí ŋá Ŋ̀âla-taa-kelai kâa nyii kɛ̀ lônoi ḿbɔi è pîlaŋ ŋ́ɛi, dɔnɔ è pà ŋɔ́nɔ dí koyâŋ díkîe ma. 4Ŋ̀âla-taa-kelai maa-ŋuŋ è mò m̀arâŋ-nuui ma ǹyɛɛi, “Kîrɛ síɣe í m̀ó ǹyaŋ-kpai tí ma zɛŋ-kɔ̂ɔŋ-ɣɛlii káa ǹyêei a gɛɛ núu támaa da taa-sua-ŋa da pâi kɛ̂i Zerusâlɛŋ, ǹyaŋ nàa a pâi kɛ̂i a zu kɛ́tɛ a gɛɛ núu é siɣãŋ tínaŋ ma. 5Yâwɛɛ a mó a gɛɛ ǹyaa kpîŋ a pâi kɛ̂i a ŋɔŋ-sîyãŋ é tínaŋ daa-lêei ma, gɛ́ m̀ɛi kâa, ǹyaŋ a pâi kɛ̂i naa ŋɔfólo-laai kélee su.”
Diai kɛ̀ a dítaa-tâa ǹɔii da kpɛ́ni-ŋai sui, da dí tôlii a gɛɛ dí pá pôlu dípɔ-taai
6-7Yâwɛɛ è mò ŋɔnûai dîa ǹyɛɛi, “Ŋá kátàa-taa ǹɔii gwaa kélee. Kɛ́lɛ káai kátaa-tâai, ka pú ká kúla Babelɔŋ lɔii su ká lí pôlu Zerusâlɛŋ. 8Núu da kélee a kálòkwa, a zɛŋ lókwa nyii m̀ɛni kpanaŋɔ̂ɔi ḿâi.”
M̀ɛni ma, Ŋ̀wála-wâla kélee Yâwɛɛ a ńdɛɛ a gɛɛ ŋá ŋ̀orɛ̂-wooi ŋí ƃó ǹɔii-ŋûŋ-ŋai dîa diai da ŋúma kɛ́ ŋɔnûai dîai: 9“Yâwɛɛ ǹyaa kpîŋ a pâi kɔ̂i kápɔ, ǹyaŋ ka pâi kɛ̂i ǹûai mu diai dí kɛ̀ kámu a luɛ-ŋai.”
M̀ɛnii ŋí à gbàa kɛ́, ǹúui kélee da pâi gɔ́lɔnîi a gɛɛ Ŋ̀wála-wâla kélee Yâwɛɛ ƃé ńdɛ̀ɛ.
10Yâwɛɛ è mò ǹyɛɛ, “Ka wule tóo a lii-nɛ̃̂ɛ káai a Zerusâlɛŋ-ƃelai! Ŋa pâi a gɛɛ kwa kâa-ni kú kɛ́ kwaa tɔ̂nɔ ma!”
11Maa tãi tí su lɔii-ŋûŋ támaa da pâi pâi Yâwɛɛ pɔ́ dí kɛ́ a ŋɔnûa. A pâi kɛ̂i kúsama, ǹyaŋ ka pâi gɔ́lɔnîi a gɛɛ ǹyaa ƃé ńdɛ̀ɛ kápɔ-naa. 12Naa pôlu ma Zuda a pâi ŋɔ́nɔ kɛ̂i a Yâwɛɛ kɔ̂liŋ kpîŋ-kpiŋ ŋɔlɔii maa waai ma, ǹyaŋ Zerusâlɛŋ a pâi kɛ̀ ŋɔ́nɔ a gbîŋ taa-lee.
13Kákelee ka kámɛi sáa Yâwɛɛ ŋɛ́i túɛ, kpɛ́ni fêi, a pâi kulâi ŋɔkwaa maa waai ma.
Currently Selected:
Zɛkɛrâya 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia