Zôo Tuɛ mɛni ƃóɔɔ
Tuɛ mɛni ƃóɔɔ
Zôo ŋɔmɛni-pɔlɔi káa a m̀ɛni-pɔlɔi nyii bîlaŋɔɔi nâloŋ tɔnɔ ma nyii kɛ̀ a zɔŋ lɛlɛɛi. Mɛni kpɔ̂lu támaa è làa nâloŋ ŋí ma. Ŋɔnîa-pɛlɛɛi kélee dí sâa, gɔ̃lîŋ kélee su é kara, pala kɔlɔ-fela é zòŋ. Gɔlɔi ŋí pɔ̃yɛ nûui è berei lɛ̂ Zôo da m̀arâai dílôno la a táre woo-ŋai. Dí táre lono-ŋai ŋáa kɔlɛ̂i gbulu ma gîei saaƃa é pîlaŋ la berei ma da pɔ̂ri tûai la tãi mɛni-kpɔ̂lu a laa la dîai. M̀ɛni-ŋai ŋí kpɛɛ-ŋai, Ɣâla nyii gbaaŋɔɔi núu kpune mɛni mai, dí lôno é pîlaŋ m̀a mɛnii ŋí sui, ǹyaa kpîŋ è pà Zôo pɔnaa.
Zôo m̀arâai dí Zôo ŋɔmɔ̃lɛ laai ŋá lɛ̀ yɛ̂ɛ berei núu kpune ŋɔɣâla mɛni kɛ́ perei káa lai. Díkili-ŋa-siai è ǹɛ dîa a gɛɛ Ɣâla a mɛni lɛ́lɛɛ su tòo nɔ́ a mɛni lɛ́lɛɛ, gɛ́ mɛni nyɔ́mɔɔ su tòo a mɛni nyɔ́mɔɔ. M̀ɛni ma Zôo è kɛ̀ m̀ɔ̃lɛi kpɛ́ni fêi è sɔnyɔ̂ŋ kɛ̀. Kɛ́lɛ Zôo ŋɔmɛni-ŋa káai su, m̀ɛnii ŋí è kɛ̀ a mɛni fíi kpɛɛ. Vé a sɛŋ a gɛ́ɛ é mɔ̃lɛ-laa sii kɛ́ɛ tí sɔlɔ ƃó, kpɛ́ni fêi, vé nîi mɛni nyɔ́mɔɔ da kɛ́ ní a gɛɛ é mɔ̃lɛ-laa sii kɛ́ɛ tí sɔlɔ ƃó m̀ɛni ma. È kɛ̀ a téniŋ ƃô nuu. Zôo fé kɛ́ ní a m̀ɛnii kɔ́lɔŋɔɔ è gɛ̀ a gɛ́ɛ Ɣâla a pɔ̂ri ǹɛɛi naa mɛni kpɔ̂lu kɛ́ɛ tí é láa m̀ai. È Ɣâla marê kɛ̀ kpɔ́ gbono ma m̀ɛnii ŋí ma. Laa-la è kɛ̀ Zôo yêei, kɛ́lɛ è kɛ̀ ŋ̀wɛ̂lii a gɛɛ é téniŋ ƃô làa sɔlɔ ƃó Ɣâla ŋɛ́i-tuɛ, é ŋɔ́nɔ ŋɔƃaa-kɛ maai sɔlɔ ƃô téniŋ ƃô mɛni ma.
Ɣâla fé Zôo ŋɔmarê kɛ̂ɛi su kula ní. Kɛ́lɛ è lono é pîlaŋ Zôo ŋɔlaa-lai ma. Ɣâla è m̀ɛni-ŋai ŋí ŋá lɛ a táre-woo-ŋa nyii è ǹɛ a mɛni-maa waa-ŋa maa-wala-wala maa pɔɔkɔŋ da táre. Zôo è Ɣâla ŋɔtárei da ŋɔkɛ́tɛ-laai kɔ̀lɔŋ ƃaa-kɛ-maa pere su. Ǹaa pôlu ma, Zôo è nâa bôlu tɔ̀ɔ ŋ̀óo-nyɔ́mɔ-ŋai da ǹíi ŋwâna-woo-ŋai è m̀o é pîlaŋ Ɣâla mai dîa.
M̀ɛnii ŋí kpɛɛ-ŋa wooi a berei lɛ̀ kûa Zôo è ŋɔ́nɔ kɛ̀ la a dɔ̂ɔ é tɛ́ɛ bɔlɔi mai. Ɣâla è Zôo m̀arâai kula maa kɛ́, kpɛ́ni fêi dífe kɛ́ ní a dítareɛɛ m̀ɔ̃lɛ-laai Zôo è kɛ̀ zui maa mɛ̂ni su. Zôo ǹyaa tɔ̂nɔ nɔ́ ƃé kɛ̀ a gɔ́lɔŋɔɔ a gɛɛ Ɣâla kɛ̂tɛi é tɛ́ɛ berei ma núu-kpune ŋɔɣâla mɛni kɛ́ pere a sɛŋ lɛ̂ lai.
M̀ɛni-ŋûŋ-ŋai gɔlɔi ŋí sui
Gbuai maa-ŋuŋ (1:1--2:13)
Zôo da m̀arâai (3:1--31:40)
Zôo ŋɔmɛni saa-wooi (3:1-26)
Dí zɛpɛ-wooi maa-ŋuŋ (4:1--14:22)
Dí zɛpɛ-wooi veerɛi (15:1--21:34)
Dí zɛpɛ-wooi zaaƃai (22:1--27:23)
Táre maa laa-maa tɛ̀-woo (28:1-28)
Zôo ŋɔwóoi gbɛɛ-ŋai (29:1--31:40)
Ɛliu lóno-woo-ŋai (32:1--37:24)
Kúnuu-namui è Zôo wóo su tòo (38:1--42:6)
M̀ɛni kpɛɛ-ŋa wooi (42:7-17)
Currently Selected:
Zôo Tuɛ mɛni ƃóɔɔ: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia