Osia 2
2
1M̀ɛni ma íƃarâ Eezuɛ-ŋai tóli a “Ɣâla ŋɔnûai nyii a dímalôŋ kaai.”
Gomɛ fé a tɔ̃yâ nɛni, Eezuɛ-ŋai dífe a tɔ̃ya-ƃela Yâwɛɛ mɛni ma
2Yâwɛɛ è mò ǹyɛɛi, “Ka mó kálee ma a gɛɛ é kpéra ŋɔmɛni nyɔ́mɔɔi ma. Vé ŋɔ́nɔ a ŋánɛnî ńyaŋ ḿve ŋɔ́nɔ a ŋɔsurɔ̂ŋ. Ka mó ma a gɛɛ é ǹyée kúla wulu-wulu kɛ́ɛ su, é tée mɛni piliɛɛ zu ma. 3À wàla kɛ́ tí, ŋa pâi maa kpôlonii é lɛ́ɛ a gáa kàŋ yɛ̂ɛ berei dí m̀aa sɔlɔ ƃô lai. Ŋa pâi gɛ̂i yɛ̂ɛ fɛ̃ɛ-kpâlaŋ ŋá, gɛɛ yɛ̂ɛ lɔii-kpûa ƃɛ́i yá fé naai, ŋá báa a kpele wɛ̂li. 4Fé pâi ǹônii malôŋ kâai, kpɛ́ni fêi, díkaa a wulu-wulu kɛ́ nɛni lônii. 5Dílee è wulu-wulu kɛ̀. È dímaa kôo sìɣe ŋumɛ tûa kɛ́ɛ su. È mò ǹyɛɛ, ‘Ŋa pâi liî ŋáwɛli-ŋai pɔ́ nyii-ŋai da kpólo yà ḿî, seɣe, wúlɔ da kpele-sɛŋ.’
6“M̀ɛni ma ŋa pâi berêi kpáanîi a ŋalêŋ kpɔlɔ, ŋá kónaŋ tɔ́ɔ é tínaŋ ma, a gɛɛ vé pere kâa é kúla. 7A pâi kîrɛ siɣêi ŋɔwɛ́li-ŋai pôlu, kɛ́lɛ vé pâi dísonîi. A pâi díkɔ̂rii, kɛ́lɛ vé pâi díkâai. A pâi m̀ôi ǹyɛɛ, ‘Ŋa pâi liî pôlu ŋásurɔ̂ŋ maa-ŋuŋ pɔ́, kpɛ́ni fêi, ŋá kɛ̀ mɛni lɛ́lɛɛ sɔlɔ ƃôi é tɛ́ɛ tãi ŋí ma.’
8“Vé kɛ́ ní a gɔ́lɔŋɔɔ a gɛɛ ńyãa ƃé mii-sɛŋ tɛ̀ɛ bɔ́, ŋwã̂ai, sɛŋ-kao kole da gôo tɛ̀ɛ bɔ̀ nyii-ŋai è tíi kɛ̀ la Bêe Ɣalai fɛli-pɛrɛi mui. 9M̀ɛni ma ŋa pâi ŋá sí-sɛŋ su karâi a gula tãi. Ŋa pâi ŋáŋwã̂ai su karâi a gbɛ̀tɛ tãi. Ŋa pâi ŋáseɣe pala-sãai siɣêi pôlu nyii-ŋai ŋá dɛ̀ɛ bɔ́ a gɛɛ é seɣe pála la é dóo m̀ai. 10Ǹyaŋ ŋa pâi gaŋ ƃôi ŋɔwɛ́li-ŋai ŋɛ́i. Núu da kélee fé pâi pɔrîi gulâi ńyêei. 11Ŋa pâi ŋɔlii nɛ̃̂ɛi, ŋɔkúu kɛ́ɛi, ŋɔɣáloŋ nina kuu kɛɛi, ŋɔfii-tɔɔ ɣele-ŋai da ŋɔtɔɔ kuu ɣele-ŋai kélee kperâi. 12Ŋa pâi ŋɔkpɔmɔ-ƃa wuru-ŋai da ŋɔfîi wurui paâi nyii a mò ǹyɛɛ, ‘Ḿbɔɔ ƃa dia. Ŋáwɛli-ŋai ƃé dí tɛ̀ɛ ḿbɔ a ŋá fela fêi.’ Berei máŋ è m̀ɛni-ŋai ƃò lai, ŋa pâi dí lɛɛ̂i naa lɔɔ-sûa-ŋa dí mìi. 13Ǹyaŋ ŋa pâi tɔ̂ŋ kpɛ̂i m̀a gúui mɛni ma a gɛ̀ Bêe-ŋai dîa gɛ́ m̀aa-ɣiri a m̀aa ɣîri-sãa lɛ́lɛɛ-ŋa, gɛ́ lì ŋɔwɛ́li-ŋai pɔ́ naa, gɛ́ nìa ḿɛni mai.”
Yâwɛɛ ŋɔwɛli kɛ́-maai ŋɔnûai mɛni mai
14Yâwɛɛ è mò ǹyɛɛ, “M̀ɛni ma, ŋa pâi ǹíi kula woo ƃôi ŋá pá la vɛ̃ɛ-kpâlaŋ su, ŋá lóno bɔ́ a ǹɛ́lɛɛ. 15Ǹyaŋ nàa ƃé ŋa pâi ŋɔkpɔmɔ kpâlaŋ tɛɛ̂i naa bɔ́. Ŋa pâi Ekɔɔ tiŋ-tiŋ kɛ̂i a kili-kɛ-maa pɛrɛ lá kpòŋ. Nàa ƃé a pâi ŋ́oo su toôi naa yɛ̂ɛ tãi è kɛ̀ la a núu-tɔɔ, da tãi è kùla la Ize lɔii sui.” 16Maa ɣêlei tí ya pâi ńdôlii a ísurɔ̂ŋ. Ífe pâi ŋɔ́nɔ ńdôlii a íbêei nyii gáa a íɣâlai. 17Ŋa pâi Bêe laa-ŋai kulâi ǹá, ǹyaŋ núu da fé pâi ŋɔ́nɔ wɔ́lɔ ǹáa-ŋai ŋí kɔ́lɔnîi.
18“M̀aa ɣêlei tí ŋa pâi ŋ́gono-têei ŋánûai yêei a gɛɛ ǹɔ́ɔ sua-ŋai, ŋɔni-ŋai, da dɔara-sãai dífe mɛni ŋánaa kɛ̀ a dia. Ŋá pâi kerâŋ, ƃóa-sɔ̂kpɔ da kɔ́kɔ mɛni kperâi ǹɔii ma. Ŋa pâi gɛ̂i dí kɛ́ lii-sêe su.
19“Ŋa pâi íkulâi a nɛnî,
Íkɛ a ŋánɛnî wɔ́lɔ-wɔlɔ da wɔlɔ-wɔlɔ.
Ŋa pâi kɛ̂i a tɔ̃yâ surɔŋ lɛ́lɛɛ.
Ŋa pâi íkɛ̂i a núu sã́a.
Ŋa pâi íwɛ̂lii a ŋánaa wɔ́lɔ-wɔlɔ da wɔlɔ-wɔlɔ, ŋá í malôŋ káa.
20Ya pâi kɛ̂i a ŋánɛnî.
Ŋa pâi íwɛ̂lii a tɔ̃yâ-pere,
gɛ̀ ní, ya pâi ńyãa Yâwɛɛ ŋ́gɔlɔnîi.”
21Yâwɛɛ è mò ǹyɛɛi, “M̀aa ɣêlei tí ŋa pâi ŋánûai Eezuɛ-ŋai díɣâla fɛli woo-ŋai mɛnîi.
Ŋá gɛ́ tuna é pú ǹɔii ma.
22Ǹɔii a pâi mii-sãa, gbɔmɔ-ƃa kpɔlɔi da ŋ̀úlɔ wuru-ŋai kɛ̂i dí kpɛtɛ dí ƃá, dí Zariɛɛ líi láa.
23Ŋa pâi ŋánûai seêi kɛ̂i ma ǹɔii su dí ƃûu ƃó naa.
Ŋa pâi Loluama malôŋ kâai,
ŋá m̀ó Loaŋmi ma, ká káa a ŋánûa,
gɛ̀ ní da pâi m̀ôi dîyɛɛ íkaa a Kúɣâla.”
Currently Selected:
Osia 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia