Abaku 3
3
Abaku ŋɔɣala-fɛii-wooi
1Ɣâla ŋɔlóno-kɛ-nuui Abaku ŋɔɣâla-fɛli-wooi ká ŋí wule-woo su.
2Óo Yâwɛɛ, ŋá m̀ɛnii mɛ́ni é pîlaŋ ítii-kpaya-kpaya-ŋai dîa.
M̀ɛni ma ḿbɛlɛ a pû a dámaa ítii-ŋai mɛni ma.
Ítii-ŋai lɛ́ góraŋ-ŋai ŋí su.
Ítii-ŋai lɛ́ ŋɔ́nɔ góraŋ ŋí su.
Ílii ŋwânai su, maloŋ-kâa é kɛ́ naa.
3Ɣâla è kùla Temaŋ-lɔii su
ǹyaŋ Ǹúui Maa Waai é kúla Paraŋ Yeei ma.
Ŋɔfólo-laai è Ɣâla-taa sîɣe é ŋ̀ele-kɔlɔŋ mɛi pɛ́lɛ,
ǹyaŋ ǹɔii láa è kɛ̀ a vɛ́ɛ a ŋɔlaa-maa tɛ̂i.
4Ŋɔfólo-laai è kɛ̀ yɛ̂ɛ kwaa ponoɔɔ,
maa kpãle kɛ́ kùla ǹyêei,
ǹyaŋ nàa ƃé è ŋɔwála-walai lòo naa.
5Kɔlɔ-fela-ŋa díkaa dúɛ pere,
saa kɛ́ ƃò bólu pere.
6À tɔɔ ǹɔii è kpɛ̃liŋ,
à kwaa kâa, ǹɔii-ŋûŋ-ŋai dí kpɛ̃liŋ.
À kɛ̀ tí, ǹyée-ŋai wɔ́lɔ-wɔlɔ kɛ̀ naai,
dí taa-taa, dí lɔ́ ǹɔii mu, ƃɛ́i a kâa tɛ̀ɛ naa a bɔlɔi.
7Ŋa Kúsaŋ-ƃelai kâa díkɛ yào a dámaa dí sua-kɔlɔ-pɛrɛ-ŋai mu mɛni kpɔ̂lu su.
Ǹûai kɛ̀ bɛ́rɛi mu Midiaŋ-lɔii sui díyao dí kpɛ̃lîŋ.
8Óo Yâwɛɛ, ílii ŋwânai káa ǹyá-lêe-ŋai dia?
Ílii ŋwânai káa ǹyá-ŋai mɛni ma?
Kpaa máŋ ílii ŋwânai yúo ma, tãi í kɛ̀ la íkɔ-kɔ-soo-ŋai pôlu, íkɔ-kɔ-keleŋ su íkɛ lì a kɔ́ kpɛ́ siai?
9Ya íkerâŋ kúla daâi,
ya ítɔ̃ai sée gerâŋ ŋá.
Ƃa ǹɔii ŋáa kɔ́lɛ a ǹyá-lêe-ŋai.
10Ǹyée-ŋai dí íkàa, dí kpɛ̃lîŋ.
Ǹyái è tɛ̀ɛ dímɛi ƃɛ́i naa siŋɔ̂ɔi,
naa-tiŋ kɛ́ kùla,
ǹyái ŋɔzikɛ-zikɛ kɛ́ tɛ̀ ɣelêi.
11Vóloi da ŋáloŋ dí kɛ̀ nɔ́ tɔɔ̂ni dítɔɔ̂i,
tãi ítɔ̃a-ŋai dí kɛ̀ fôloi la díkɛ tɛ̀ɛ,
yɛ̂ɛ ŋ̀ele-gbâna ŋɔmãla-mãlai.
12Ƃa sia ǹɔii su a lii-ŋwâna.
Ƃa sia ǹɔii-ŋûŋ-ŋai mɛi a lii-ŋwâna.
13Í lì ínûai ƃálo mɛni ma
da ǹúui í íyee lɛ̀ mai.
Í zɔnyɔ̂ŋ ƃelai ŋuŋ tuɛ ǹúui su kara
dípɛrɛi é lɛ́ɛ a gbolôŋ.
14Ítɔ̂a-ŋai dí gɔ́-kuluƃai ƃɔ́ ŋɔpôlu-ƃelai sáma
diai da pà yɛ̂ɛ fãa kɛ́tɛ a gɛɛ díkutaa-tâai,
díkɛ lii-nɛ̃ɛ kulâi, kpɛ́ni fêi,
dí kɛ́ gâai da pâi gôlo-ƃelai lúwanîi nyii ŋai kɛ̀ loo-pere su.
15Ƃa sia yúo su a íkɔ-kɔ-soo-ŋai
vile kɛ́ tɔ̀ɔ.
16Ŋa díŋ mɛ̀ni, ḿaa kɛ́ kpɛ̃liŋ,
díŋ è gɛ̀ ńagbɔ é kɛ́ soo-soo,
ŋ́gao kɛ́ sàa ŋ́gbonôi,
záza kɛ́ ńdòo.
Ŋá pâi ḿɛi saâi ŋá tãi maa kpɛ́ŋ
tãi mɛni-kpɔ̂lu a pâi lâai la diai dîa da ŋ̀wɛ̂lii dí kúsu karai.
17Berei máŋ fîi-wurii fé pâi poâi lai,
kpaa máŋ kpɔmɔ-kpalaŋ é ƃá,
mii-sɛŋ fa lɛ̂lɛ gbâlaŋ ŋá,
m̀ála-ŋai dífe pâi lɛ̂ɛ díkoraŋ su,
ǹyaŋ daa-tûlɛ díkoraŋ-ŋai dí lɛ́ɛ a vólo,
18berei máŋ è kɛ̀ tí lai, ŋa pâi lii-nɛ̃ɛ kulâi, Yâwɛɛ sârai,
ŋá lii nɛ̃ɛ kúla Ŋáɣâlai mɛni ma nyii gáa a ŋáƃalo nuui.
19Ŋ̀wála-wâla kélee Yâwɛɛ ƃa ŋáwala-walai.
A ŋ́gɔɔ kɛ́ yɛ̂ɛ lóma kɔɔ,
é gɛ́ ŋá pili kwaa kôya-koya-ŋa mɛi.
Currently Selected:
Abaku 3: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia