Izikiɛ Tuɛ mɛni ƃóɔɔ
Tuɛ mɛni ƃóɔɔ
Gɔlɔi ŋí da kɛ̂ ma Izikiɛi a lôno é pîlaŋ Ɣâla ŋɔlóno kɛ́-nuui Izikiɛ ma. Izikiɛ è wɔ́lɔ kɛ̀ kɔ-pú laa su Babelɔŋ lɔii su a tãi díwɔlɔ Zerusâlɛŋ wòlo lai da maa tãi tí naa pôlu ma. È wɔ́lɔ kɛ̀ gwaai ŋí ma a góraŋ 586 dílɛɛ pâi Zîsɛ maa sɔlɔ ƃôi. Ŋɔworɛ̂ wooi nyii gáa gɔlɔi ŋí sui è wɔ́lɔ kɛ̀ diai kɛ̂ gɔ-pú laai su Babelɔŋ da diai díseɛɛ è kɛ̀ Zerusâlɛŋ dí mɛni ma.
Izikiɛ kɔlɔi ŋí ŋá kɔlɛ̂ɛi gîei lɔ́ɔlu-mɛi da: 1) Ɣâla è Izikiɛ tòli a gɛɛ é kɛ́ a Ɣâla-ŋɔlóno kɛ́ nuu. 2) Lia-wôo kpanaŋɔɔ tɛɛ ǹûai pɔ́ é pîlaŋ Ɣâla ŋɔmɛni-ŋa téɛɛi ma nyii kɛ̀ pâi Zerusâlɛŋ mai. 3) Worɛ̂-woo kpanaŋɔɔ é pîlaŋ m̀ɛni-ŋa téɛɛi ma pâi pâi ǹɔii-ŋûŋ-ŋai nyii-ŋai pâi ŋɔnûai mɔ̃̂lɛi é dí pɛ́lɛi. 4) Ŋ̀aa-nɛ̂nɛi nyii pâi pâi Eezuɛ-ŋai pɔ́naa Zerusâlɛŋ wóloɔɔ pôlu mai da gono-têe lɛ́lɛɛi è gɛ̀ é pîlaŋ dítinaa-tuɛ pere mai. 5) Ŋ̀âla-woo ƃóɔɔi nyii dɔɔ̂i Gɔ̂ɔ mai. 6) Izikiɛ è gíli-ŋa sìa é pîlaŋ berei mâ Ŋ̀âla-pɛrɛ Kɛ́tɛi da Eezuɛ da pâi seêi la díseêi pôlui.
Laa-laa kpanaŋɔɔ è wɔ́lɔ kɛ̀ Izikiɛ yêei. Ŋɔkili-ŋa sîai dámaa ɣele a kâa pà bɔ́ zĩ̂a su nyii a kâa ŋ̀áa lɛ̀ a mɛni kɔ̂ɔŋ maai. Izikiɛ ŋɔɣâla-woo ƃóɔɔi é wɔ́lɔ kɛ̀ a ƃîlaŋɔɔ tɔ̃yâ lìi maa fáleŋɔɔ da núu ŋɔmɔ̂leŋ ma. A kâa lòno é pîlaŋ berei mâ núu kélee ŋɔsɔnyɔ̂ŋ maa mɛ̂ni káa la ǹyaa kpîŋ ŋ̀ûai. Ǹaa pôlu ma, è lòno é pîlaŋ berei mâ kili-kɛ zu káa la naa fúlu-laa nina da lɔii nîna mɛni ma diai dílii maa fáleŋɔ̂ɔi dímɛni mai. Kpɛ́ni fêi è kɛ̀ a sâla láa-soŋ nûu, gɛ́ ƃò ŋɔ́nɔ a Ɣâla ŋɔlóno kú-nuu. È kɛ̀ a gbáaŋɔɔ Ŋ̀âla-pɛrɛ Kɛ́tɛi da maa-waa-laa mɛni ma.
M̀ɛni-ŋûŋ-ŋai gɔlɔi ŋí sui
Ɣâla è Izikiɛ tòli (1:1--3:27)
Ŋ̀orɛ̂-wooi nyii bîlaŋɔɔi Zerusâlɛŋ wólo mɛ̂ni mai (4:1--24:27)
Ɣâla ŋɔmɛni ŋáa téɛɛi nyii gáa ǹɔii-ŋûŋ-ŋai mɛni mai (25:1--32:32)
Gono-têei Ɣâla è gɛ̀ ŋɔnûai mɛ̂ni mai (33:1--37:28)
Ŋ̀âla-wooi nyii bîlaŋɔɔi Gɔ̂ɔ mai (38:1--39:29)
Zĩ̂ai bîlaŋɔɔi Ŋ̀âla-pɛrɛ Kɛ́tɛi da ǹɔii ŋɔtínaa tuɛ mai (40:1--48:35)
Currently Selected:
Izikiɛ Tuɛ mɛni ƃóɔɔ: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia