Samia Veerɛi 1
1
Deeƃé è Sɔ̂ɔ saa tûŋ mɛ̀ni
1Deeƃé kɛ́ɛ a Amɛlɛka-ŋai yée mɛi ɣálei, è lène pôlu Zikila é gɛ́ naa a fólo feerɛ. 2Ŋ̀ele kûui zaaƃa ɣelei kɔ́ kɔ́-nuu tɔnɔ è kùla Sɔ̂ɔ ŋɔƃûui su é pá bɔ́ naa ŋɔseɣei fála-falaa, pɔ̂rɔ siáa ŋ̀uŋ ma, é pîlaŋ ŋ̀úme ŋá ŋɛ́i-tuɛ. 3È m̀arê kɛ̀ ǹyɛɛ m̀ai, “Mí ƃé í kùla naai?” Ǹalôŋ ǹyɛɛ m̀ai,
“Ŋá kùla Eezuɛ-ŋai díƃûui su ŋá pú.”
4Deeƃé ǹyɛɛ m̀ai, “Naa káa léŋ?”
Ǹyɛɛ mai, “Ǹûai daâ pú gɔ́i yêei. Dí gɔ́ kɔ́-ƃelai dámaa ŋwàna dí da-ŋa paa. Dí Sɔ̂ɔ pàa máŋ da ǹóŋ Zonetaŋ.”
5Deeƃé ǹyɛɛ ǹalôŋ mai, “Í gɔ̀lɔŋ léŋ a gɛ́ɛ Sɔ̂ɔ da ǹóŋ dí lɛ̀ɛ gɔ́i su?”
6Ǹalôŋ ǹyɛɛ m̀ai, “Ŋá sèri nɔ́ Giboa Yeei ma ŋá Sɔ̂ɔ káa diɣîŋɔɔ ŋɔsɔ̀lai ma. Gɔ́ kɔ́ keleŋ-ŋai da zoo sia-ƃelai lɛɣɛ́ɛ la. 7Gɛ́ɛ a tínaŋ a ŋ́gaai, è ńdòli ńyɛɛ mai, ‘Ŋ́gaa ƃɛ́.’ 8Ǹyɛɛ ḿâi, ‘Gbɛ̂ɛ ƃa yá?’ Ńyɛɛ mà, ‘Ŋ́gaa a Amaleka nuu.’ 9È mò ḿâ ǹyɛɛi, ‘Lɛɣɛ a ńyãa í ḿbaa ḿî, kpɛ́ni fêi, ŋa mɛni sôli kâai, ŋ́gɛ saa.’ 10Ŋá pà ŋá tɔ́ɔ gɔlɛ ŋá bàa, kpɛ́ni fêi, ŋá kɛ̀ a gɔ́lɔŋɔɔ a gɛ́ɛ vé pâi ƃâloi. Ŋá m̀ɔrɔi kùla ŋ̀ûa, ŋá ǹyée kɔŋ lá-kɔlii kúla ǹyée ma ŋá pá la. Ǹyaa ká ŋí.”
11Deeƃé è ŋɔseɣei kùla gɔŋ ma é vála-fala. Ǹyée mu sinaai dia-ni máŋ dí díwɔ̂-ŋai kɛ̀ tí. 12Dí malôŋ see ƃò, dí wɔ́lɔ, dí suŋ siɣe Sɔ̂ɔ da ǹóŋ Zonetaŋ mɛni ma da Yâwɛɛ ŋɔnûai dí dípàa gɔ́i sui é lɛ́ɛ la zu ɣele-wûlii é kɛ́.
13Deeƃé è ŋɔ́nɔ ǹalôŋ marê kɛ̀ pà a duŋ ǹyɛɛ m̀ai, “Í kùla mí?”
Ǹalôŋ ǹyɛɛ m̀ai, “Ŋ́gaa a Amalɛka-nuu ǹóŋ. Kɛ́lɛ ńzeɛɛ káa kálɔii su ƃɛ́.”
14Deeƃé ǹyɛɛ m̀ai, “Lé ƃé gɛ̀ yao fé kɛ́ ní íkponôi í kɛ́ Yâwɛɛ ŋɔnúu maa waai su karâi?” 15Nya ƃe Deeƃé è ǹyaŋkpai dɔnɔ tòli ǹyɛɛ m̀ai, “Ye lí a ǹalôŋ ŋí í baa.” È lì é bàa. 16Deeƃé ǹyɛɛ m̀ai, “Íŋãa mɛni é kɛ́ íkpîŋ íŋûa. Yá kpîŋ í dɔ̃yâi ƃò a gɛ́ɛ yaâ Yâwɛɛ ŋɔnúu maa waai páa.”
Deeƃé è wɔ̀lɔ Sɔ̂ɔ da Zonetaŋ mɛni ma
17Nya ƃe Deeƃé è zamaŋ-wule kpɛ̀tɛ Sɔ̂ɔ da ǹóŋ Zonetaŋ mɛni ma. 18È mò a gɛ́ɛ dí ŋ̀ulei lɛ́ Zuda-ƃelai dîa. Ŋ̀ulei ŋí láa ƃa Gelâŋ-wulei. Ŋ̀ulei ŋí pɔ̃yɛ̂ɛi Zasa kɔlɔ su. È mò ǹyɛɛ,
19“Óo Eezuɛ, da ínuu láa túɛ-ƃelai páa ǹyée-ŋai tôŋ su.
Íkɔ-kuluƃa-ŋai da toôi.
20Káfe mò Gâa taai su
kpaa máŋ ká duŋ táa-tàa Asikɛlɔŋ pere lee-ŋai su.
Káfe ǹɛɛ naa Felesia-ŋai nɛnyaai dí lii-nɛ̃ɛ kula m̀ɛnii ŋí su,
kpaa máŋ ká ǹɛɛ naa dîai dífe a Ɣâla-ƃelai dí píli ɣelêi a dí koi-nɛ̃ɛ pere.
21“Lúu da tuna fé pâi ŋɔ́nɔ pûi Giboa yee-ŋai dîa
kpaa máŋ sí-sãa dí kpɛtɛ dîa,
kpɛ́ni fêi, naa ƃé dí ŋ̀wála-wala-ƃelai díkpala ŋá-ɣale kɔli-kalaŋ maa liƃi naa,
dífe ŋɔ́nɔ wúlɔ sia ni Sɔ̂ɔ ŋɔkpála ŋá-ɣale kɔli-kalaŋ ma.
22Mɛɛ è kɛ̀ Zonetaŋ ŋɔtɔ̃ai sṹa lá. A kâa kɔ-kuluƃa da ƃòŋ la va ƃàlo.
Ŋɛi maloŋ kâa fé kɛ́ ní Sɔ̂ɔ yêei.
È ŋɔkpɔara-ƃelai su tee-tee a ŋɔƃóa-sɔkpɔi.
23“Sɔ̂ɔ da Zonetaŋ dí kɛ̀ a díkîe-ni wɛ́liɛɛ,
wɛli-kɛ́-maa kɛ́ ƃò díyêei.
Dífe kɛ́ ní a díŋaa kɔlɛɛ dífulu-laai su da dísaa pôlu ma.
Díkɔɔ ma è kɛ̀ a vélaa é tɛ́ɛ kuɛ ma, díwála-walaa é tɛ́ɛ yala-sulu ma.
24“Káai a Eezuɛ nɛyãai ka wɔ́lɔ Sɔ̂ɔ mɛni ma.
Nya ƃe pà kápɔ a zeɣe kpɔ̂lu lɛ́lɛɛi ŋí
da gôo yɔlɔ-ŋai.
25“Kúkɔ-kuluƃa-ŋai da lɛɛ kɔ̂i
Zonetaŋ poma a lâani ǹyéei tôŋ su.
26“Ńii toɔɔ̂i pôlu ímɛni ma ńeɣê Zonetaŋ.
Ímaa mɛni è ńii làa.
Ŋ̀wɛli kɛ́-maai kɛ̀ íyêei ḿɛni mai
è kɛ̀ a gbanaŋɔɔ é tɛ́ɛ nɛnî da ŋɔsurɔ̂ŋ díloai wɛli kɛ́-maai ma.
27“Kúkɔ-kuluƃa líi-kpeleɛɛ-ŋai da saa.
Kɛ̂i da kélee fé ŋɔ́nɔ gɔ́-kɔ́-sãai dîa.”
Currently Selected:
Samia Veerɛi 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia