Tɛsɛlôniɛŋ Veerɛi 3
3
Ɣâla-fɛliɛ ŋɔwooi taa-taa mɛni ma
1Gbɛɛ ŋái, ŋánûa, ka Ɣâla fɛli kúmɛni ma a gɛ́ɛ Kúnuu-namui ŋɔwooi é táa-taa a maa félaa ŋɔfólo-laai maa é tɛ́, yɛ̂ɛ berei è kɛ̀ la kásamâi. 2A gɛɛ ŋɔ́nɔ ku kúla ŋ̀wana-lɔ̂ɔ-ƃelai da sɔnyɔ̂ŋ-ƃelai yêei. Kpɛ́ni fêi, laa-la fe núu kélee yêei. 3Kɛ́lɛ, Kúnuu-namui sã́âi; a pâi kákponôi kpananîi é kámɛi káa zɔnyɔ̂ŋ-nuui yêei. 4Laa-la káa kúyêei Kúnuu-namui kponôi kámaa-mɛni ma a gɛ́ɛ mɛnii ku nɛ̀ káa a gɛ́ɛ ka gɛ́i, kákaa gɛ̂i, ǹyaŋ ka pâi kɛ̂i nɔ́ gɛ̂i. 5Kúnuu-namui é kálii-ŋai tenîŋ tɔ́ɔ Ɣâla ŋɔwɛli kɛ́-maai ma da Kôrai ŋɔlii-kpelei.
Pɔ̂ɔ è lòno diai dîa dífa tíi kɛ̀i
6Mɛni ma, ŋánûa, kwa m̀ôi káa Kúnuu-namui Zîsɛ Kôrai láai su a gɛ́ɛ ká kasu kula káƃarâŋ-nuu kélee ma nyíi va tíi kɛ̀, va tela pìlaŋ mɛni-ŋai pôlu ku nɛ̀ kâai. 7Kpɛ́ni fêi, kákelee ká gɔ́lɔŋ berei fɛ̂ɛ ka kúpɔkɔŋ lai; kúfe kɛ́ ni a nyɛ̃-nyɛ̃ŋ-ƃela tãi ku kɛ̀ la kásamâi. 8Kúfe núu da kélee ŋɔmii-sɛŋ mii ni nyíi kúfe vela-fei kɛ́ ni, kɛ́lɛ, ku tíi kɛ̀ a kpini da fólo a gbanaŋɔɔ a gɛ́ɛ kúfe kátɔnɔ kpîŋ kpàaŋ. 9È kɛ̀ a sɛŋ a gɛ́ɛ ku mii-sɛŋ mii káyêei kúfe vela-fei kɛ̀, kɛ́lɛ, ku mii-sãai fela-fei kɛ̀ a gɛ́ɛ kúmɛni-kɔɔŋ-maa tɛ́ɛ kápɔ kútûa-perei su ka kúpɔkɔŋ. 10Kpɛ́ni fêi, tãi ku kɛ̀ la máŋ kásamâi, ku mɛnii ŋí ƃò kâa: À kɛ̀ núu da a wàla tíi kɛ́ ve ǹáa mii. 11Kpɛ́ni fêi, kwa mɛnîi a gɛ́ɛ nyɛ̃-nyɛ̃ŋ-ƃela da-ni díkaa kásama dí ƃo nɔ́ a mɛni-kɔri-ƃela, dífa ŋ̀wɛli dí tíi kɛ́. 12Núu-sii-ŋai ti kwa mò dîa ku dília-woo ƃo Kúnuu-namui Zîsɛ Kôrai kponôi a gɛ́ɛ dí dímɛi saa dí díkpîŋ-tíi kɛ́ dífulu-laai mɛni ma. 13Ŋánûa, káfii fe kpɛ̀ɛ mɛni lɛ́lɛɛ kɛ́ɛ ma.
14À kɛ̀ núu da kélee fe faa ni a gɛ́ɛ é ǹyée see mɛni-ŋai mu ku mò gɔlɔi ŋí sui, maa-nuui é lɛ́ɛ kákili ŋá, ka dîa-ni káfe nɛ̃ɛ. Ka gɛ́ ti a gɛ́ɛ maa-nuui e ŋumɛ. 15Káfe gáa a kákpɔara-nuu, kɛ́lɛ, ka nia-woo ƃó yɛ̂ɛ káƃarâŋ-nuu.
Ǹûai
16Kúnuu-namui nyíi lii-sêe káa ǹyêei ǹyaa kpîŋ é lii-sêe tɛɛ kápɔ a tãi kélee pere-sii kélee su. Kúnuu-namui é kɛ́ kákelee kákɔlɛ.
17Ńyãa Pɔ̂ɔ, ńyãa ƃe ǹaa-ti-maai ŋí pɔ̃yɛ a ŋ́gbîŋ-yee. Nyíŋi ƃa ŋákɔlɔ-ŋai kélee lɛ̀; ŋákɔlɔ-pɔ̃yɛ-perei ká ŋí. 18Kúnuu-namui Zîsɛ Kôrai ŋɔƃɛlɛ-sêei é kɛ́ kákelee káyêei.
Currently Selected:
Tɛsɛlôniɛŋ Veerɛi 3: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia