Kɔleŋtiɛŋ Maa-ŋuŋ 15
15
Kôrai ŋɔmu-siɣe saa-yêei
1Ŋánûa, ŋ́gaa nâa Duŋ Lɛ́lɛɛi toôi kákili ŋá, nyíi ŋá mò kâai, nyíi máŋ ka zɔlɔ ƃô kákaa zui. 2A káƃàlo, à kɛ̀ kà ŋ̀óoi sòŋ a gbanaŋɔɔ nyíi ŋá mò kâai-kɛ́lɛ, fɛ̂ɛ kálaa-lai à kɛ̀ nɔ́ kpɛni-kpɛni.
3Kpɛ́ni fêi ŋá mɛnii tɛ̀ɛ kápɔ a maa-ŋuŋ, nyíi ńyãa máŋ ŋá zɔlɔ ƃôi, a gɛ́ɛ Kôrai e sàa kúsɔnyɔ̂ŋ mɛni ma yɛ̂ɛ berei Ŋ̀âla-kɔlɔi a mò lai, 4a gɛ́ɛ dí ǹoo, a gɛ́ɛ Ɣâla e mù siɣe saa yêei a ŋele-kuui zaaƃa-ɣelei yɛ̂ɛ berei Ŋ̀âla-kɔlɔi a mò lai, 5a gɛ́ɛ ŋɔ́nɔ è kùla Sîfa ŋɛi, nâa pôlu ma e kúla ǹúu puu kao feerɛi ŋɛi. 6Nàa pôlu ma è kùla ŋɔnûa tɛ̂ɛi ŋuŋ lɔ́ɔlu ma ŋɛi a tãi tɔnɔ, nyíi-ŋai dama-ɣele káa niî ɣele mai, kɛ́lɛ, da-ni da saa. 7Nàa pôlu ma, è kùla Zĩi ŋɛi, nâa pôlu ma e kúla zia-ƃelai kélee ŋɛi. 8Nyíŋi kélee pôlu ma, ńyãai kɛ̀ yɛ̂ɛ da lóŋ maa-sɔlɔ ƃô a bomai, è kùla ŋ́ɛi máŋ. 9Kpɛ́ni fêi, ŋ́guro têi zia-ƃelai sama ǹyaŋ ḿaa fe nɛ̃ɛ ni a gɛ́ɛ dí ńdoli a sia-nuu, kpɛ́ni fêi, ŋá mɛni ŋánaa kɛ̀ a Ɣâla-toli-kpɔŋ. 10Kɛ́lɛ, Ɣâla ŋɔƃɛlɛ-sêei su, ŋ́gaa yɛ̂ɛ berei ŋ́gaa lai, ǹyaŋ ŋɔƃɛlɛ-sêei gáa ḿɛni mai ve kɛ́ ni kpɛni-kpɛni. Kɛ́lɛ, ŋá tíi támaa kɛ̀ e tɛ́ɛ díkelee dîa, berei máŋ la ńyãa fe gɛ níi, kɛ́lɛ, Ɣâla ŋɔƃɛlɛ-sêei ƃe gɛ, nyíi gáa ḿbôlui. 11À nɛ̀ɛ ma é kɛ́ a ńyãa, kpaa máŋ é kɛ́ a dia, bere ƃé kwa Ɣâla-woo ƃò la, ǹyaŋ bere ƃé ka lâa la.
Kú mu-siɣeɛ saa yêei
12Ǹyaŋ à kɛ̀ Kôrai maa-mɛni ƃóɔi a gɛ́ɛ e mu siɣe saa yêei, gɛ̀ ní, a pɔ̂ri kɛ̂i leŋ kata-ni ká m̀ó a gɛ́ɛ mu-siɣe saa-yeei-mɛni fe naa? 13Kɛ́lɛ, à kɛ̀ mu-siɣe saa-yeei-mɛni fe naa, gɛ̀ ní Kôrai fe m̀u siɣe ni saa yêei; 14à kɛ̀ Kôrai fe m̀u siɣe ni saa yêei, gɛ̀ ní Kúɣâla-woo ƃóɔi káa nɔ́ kpɛni-kpɛni, ǹyaŋ kálaa-lai káa nɔ́ kpɛ́ni-kpɛni. 15Gɛ̀ ní kúkaa lɛ́ɛ kɛ̂i a Ɣâla láa, kpɛ́ni fêi, ku m̀o a gɛ́ɛ e Kôrai mu siɣe saa yêei, nyíi ve m̀u siɣe ni saa yêei, à kɛ̀ gáa a tɔ̃yâ a gɛ́ɛ saa-nuu fa m̀u siɣe saa yêei. 16À kɛ̀ saa-ƃela dífe pâi dímu siɣêi saa yêei, gɛ̀ ní Kôrai fe m̀u siɣe ni saa yêei. 17À kɛ̀ Kôrai fe m̀u siɣe ni saa yêei, gɛ̀ ní kálaa-lai káa nɔ́ kpɛni-kpɛni, gɛ̀ ní kákaa nɔ́ niî kásɔnyɔ̂ŋ su. 18Gɛ̀ ní diai máŋ da wɔ́lɔ saa Kôrai kponôi, dísaâi. 19À kɛ̀ vulu-laai ŋí su nɔ́ ƃe kili-kɛ-zu káa naa kúyêei kúai kúkaa Kôrai kponôi, gɛ̀ ní kúmalôŋ káa nûa dîa e tɛ́ɛ núu kélee ma.
20Kɛ́lɛ, tɔ̃yâ ma Kôrai e mu siɣe saa yêei. Gáa a ǹuui maa-ŋuŋ e mu siɣe saa yêei diai da saai dísama. 21Kpɛ́ni fêi, berei nɔ́ saa e pa la núu tɔnɔ sârai, bere nɔ́ ƃe mu-siɣe saa-yeei è pà la máŋ núu tɔnɔ sârai. 22Berei núu kélee a sâa la Adaŋ sârai, bere nɔ́ ƃe máŋ núu kélee a pâi fulu-laa sɔlɔ ƃôi la Kôrai kponôi. 23Kɛ́lɛ, núu kélee ŋɔtãi a pâi tɛi-tɛi: Kôrai ƃa ǹúui maa-ŋuŋ e m̀u siɣe saa yeei, ǹyaŋ tãi à pà lai, diai díkaa a Kôrai pɔ́ɔi da pâi dímu siɣêi saa yêei. 24Gɛ̀ ní gbɛɛ ŋá a nâa pá, tãi a ǹúu mɛi-ƃelai su kàra la da ŋwála-wala-ƃelai, e Ɣâla ŋɔkâloŋ-laai tɛ́ɛ Ɣâla Nàŋ-nuui pɔi. 25Kpɛ́ni fêi, fɛ̂ɛ e kɛ́ ǹɔii mɛi é lɛ́ɛ la zu e ŋɔkpɔara-ƃelai pu gɔ́ɔ mu. 26Gbɔara-nuui gbɛɛ ŋái gáa su-kara mɛni mai, ǹyaa ƃa saa. 27“Ɣâla e sɛŋ kélee pu gɔ́ɔ mu.” Kɛ́lɛ, à kɛ̀ m̀ôɔi a gɛ́ɛ “Ɣâla e sɛŋ kélee pu Kôrai kɔ́ɔ mu,” zu ponoɔi a gɛ́ɛ Ɣâla kpîŋ fe Kôrai kɔ́ɔ mu, nyíi sɛŋ kélee pu Kôrai kɔ́ɔ mui. 28Tãi sɛŋ kélee a kɛ̂ la Kôrai mui, gɛ̀ ní Nòŋ-nuui ǹyaa kpîŋ a pâi kɛ̂i máŋ Ɣâla mu nyíi sɛŋ kélee pu ǹyaa Kôrai gɔ́ɔ mu a gɛ́ɛ Ɣâla e kɛ́ a sɛŋ kélee núu kélee mɛni mai.
29À wàla kɛ́ ti, gɛ̀ ní zu-kulai ƃa le a gɛ́ɛ dí núu batâi kɛ́ zaa-ƃelai pɔ́ɔ ŋá? À kɛ̀ saa-ƃela dífa dímu siɣe saa yêei, gɛ̀ ní lé mɛni ƃe da núu batâi kɛ̀ la dípɔɔ ŋái? 30Le-mɛni ƃe ŋ́gaa la saa-wolo lá a tãi kéleei? 31Ŋánûa, nii-laai gáa ńyêei kámɛni ma kúkɛ̀-zu-tɔnɔɔi sârai Kúnuu-namui Zîsɛ Kôrai kponôi, a ŋ́gɛ ŋá tɔ́ɔ saa ŋɛi tuɛ a tãi kélee! 32Le ƃe ŋa pɔ̂ri zɔlɔ ƃôi, à kɛ̀ núu-kpune lóno-woo su, ŋá kɔ̀ sua-ŋa pɔ Ɛfesɛ? À kɛ̀ núu fa mu siɣe saa yêei, gɛ̀ ní, “Kwaa kúlaa mii ku kúkpele, kpɛ́ni fêi, kwa tínaa saâi.” 33Káfe nɛ̀ɛ naa núu é kápɛlɛ: “Kánuu nyɔ́mɔɔ-ŋa kà kɛ̀ kákîe-ni pôlu kátûa-pere-lɛ̂lɛi su a kâra.” 34Ka pá pôlu ŋɔ́nɔ kákili-ŋa-sia lɛ́lɛɛ-ŋai su, káfe ŋɔ́nɔ sɔnyɔ̂ŋ kɛ̀. Kpɛ́ni fêi, Ɣâla maa-tarei fe ǹúui da-ni yêei. Ŋa nyíŋi ƃôi a gɛ́ɛ ŋa káŋumɛ.
Mu-siɣe saa yêei kponoi kɛ́-pere
35Kɛ́lɛ, núu da a pâi mare-kɛ̂ɛ kɛ̂i, ǹyɛɛi, “Saa-ƃela da dímu siɣe-pêre kɛ̀ léŋ saa yêei? Le-kpono-sii ƃe da pâi pâi lai?” 36Íƃoo-nuui! Zɛŋ ya zii va ŋɔnɔ pa pôlu fulu-laa su fɛ̂ɛ é sáa. 37Zí-sɛŋ ya zii ve a zí-sɛŋ pâi kɛ̂i gbono kpîŋ, kɛ́lɛ, gáa nɔ́ a zí-sɛŋ-gao, tãi da a kɛ̂ a mɔlɔŋ, kpaa máŋ é kɛ́ a sí-sɛŋ-kao da kpɛni. 38Kɛ́lɛ, Ɣâla a díkpono kɛ́ dîa yɛ̂ɛ berei a ŋ̀wɛ̂lii lai, a sí-sɛŋ-kao-sii kélee kpono kɛ́ dîa tɛi-tɛi. 39Kpɛ́ni fêi, kpono kélee fe pɔ̂ri ni, kɛ́lɛ, da káa naa nuu-kpune mɛni ma, da kɛ́ ƃo naa sua-ŋa mɛni ma, da kɛ́ ƃo naa ŋɔni-ŋa mɛni ma, da kɛ́ ƃo naa nyɛ̃ɛ-ŋa mɛni ma. 40Ɣelêi-pere-sãa díkaa naa, lɔii ma-pere-sãa dí ƃo naa; kɛ́lɛ, ŋ̀elei-pere-sãai dífolo-laai káa a dee, ǹɔii ma-pere-sãai dífolo-laai kɛ́ ƃo a dee. 41Voloi ŋɔfólo-laai káa a dee, ŋ̀áloŋ ŋɔfólo-laai kɛ́ ƃo a dee, bɛmɛlɛŋ-kao-ŋai díwɔ̂-folo-laai kɛ́ ƃo a dee; pɛmɛlɛŋ-kao tɔnɔ ŋɔfólo-laai káa a dee m̀arâŋ ma.
42Bere nɔ́ ƃe gáa la a mu-siɣe saa-yeei. Zɛŋ da zii, gáa a saa-sɛŋ. Zɛŋ a mu siɣe saa yêei ve a saa-sɛŋ. 43Da zí ƃaa-kula-maa su, é mu siɣe folo-laa su. Da zí fii-kpɛɛ-laa su, é mu siɣe wála-wala-laa su. 44Da zí a ŋ̀éniɛi ŋí su-kponoi é mu siɣe a Ŋ̀âla-taa-kponoi. À kɛ̀ ŋ̀éniɛi ŋí su-kpono káa naa, gɛ̀ ní Ɣâla-taa-kpono káa naa máŋ. 45Mɛni ma bɔ̃yɛɛ̂i “Ǹúui maa-ŋuŋ da kɛ̂ ma Adaŋ è kɛ̀ a mɔ̂leŋ nyíi fulu-laa è kɛ̀ ǹyêei”. Kɛ́lɛ, Adaŋ gbɛɛ ŋái è kɛ̀ a fulu-laa tɛɛ-mɔleŋ. 46Kɛ́lɛ. Ŋ̀âla-taa-kponoi fe kɛ́ ni ma a maa-ŋuŋ fɛ̂ɛ ŋ̀éniɛi ŋí su-kponoi, nàa pôlu ma Ŋ̀âla-taa-kponoi. 47Ǹúui maa-ŋuŋ è kùla ǹɔii su, dí gbɛtɛ a pɔ́rɔ; ǹúui veerɛi è kùla Ɣâla-taa. 48Yɛ̂ɛ berei è kɛ̀ la a ǹúui dí gbɛ̀tɛ a pɔ̂rɔi, bere nɔ́ ƃe gáa la a diai dí díkpɛ̀tɛ a pɔ̂rɔi; yɛ̂ɛ berei ŋɔ́nɔ è kɛ̀ la a ǹúui kùla Ɣâla-taai, bere nɔ́ ƃe gáa la a diai dí kùla Ɣâla-taai. 49Yɛ̂ɛ berei ǹúui dí gbɛ̀tɛ a pɔ̂rɔi ku ŋɔpɔɔkɔ̂ŋ sɔlɔ ƃô lai, bere nɔ́ ƃe máŋ ǹúui kùla Ɣâla-taai kwa pâi ŋɔpɔɔkɔ̂ŋ sɔlɔ ƃôi la. 50Ŋa nyíŋi ƃôi kâa, ŋánûa, núu-kpune fa pɔ̂ri Ŋ̀âla-taa kâloŋ-laai maa sɔlɔ ƃôi, kpaa máŋ diai da sâai dí diai maa sɔlɔ ƃó dífa sâai.
51Ka káwoli tɔ́ɔ! Ŋa loo-mɛ̂ni ƃôi kâa. Kúkelee kúfe pâi saâi, kɛ́lɛ, kúkelee kúmaa a pâi fálenîi 52a maa félaa núu ŋɛi toôi ma, da dúrii gbɛɛ ŋái fɛ́ɛ-tãi. Kpɛ́ni fêi dúrii wóo a pâi tɛ̂i, zaa-ƃelai dí dímu siɣe dífa ŋɔ́nɔ saa, ǹyaŋ kúkelee kúmaa a pâi fálenîi. 53Kpɛ́ni fêi, gbonoi nyíi pâi saâi a pâi kɛ̂i a gbonoi nyíi ve pâi saâi, gbonoi nyíi ŋɔfúlu-laai koyâŋ káa mai a pâi kɛ̂i a gbonoi nyíi ŋɔfúlu-laai koyâŋ fe mai. 54Gbonoi nyíi pâi saâi à kɛ̀ yɛ̂ɛ gbonoi nyíi ve pâi saâi, da gbonoi nyíi ŋɔfúlu-laai koyâŋ káa mai à kɛ̀ yɛ̂ɛ gbonoi nyíi ŋɔfúlu-laa koyâŋ fe mai, gɛ̀ ní mɛni-ŋai ŋí bɔ̃yɛɛ̂i a pâi kɛ̂i:
“Yee-tɛɛ-maa a saa kpele.”
55“Óo saa, íyee-tɛɛ-mai kɔɔ?
Óo saa, íƃoôŋ kɔɔ?”
56Saa ŋɔƃóŋ ƃa sɔnyɔ̂ŋ, sɔnyɔ̂ŋ ǹyaŋ ŋɔwála-walai ƃa dɔ̂ŋ. 57Kɛ́lɛ, sɛɣɛi-fei é tɛ́ɛ Ɣâla pɔ nyíi nyee-tɛɛ-mai tɛ̂ɛ kúpɔ Kúnuu-namui Zîsɛ Kôrai sârai.
58Mɛni ma, ŋáwɛli-kɛ-maa-ƃelai, ka fɔlɔ-fɔlɔ, káfe síɣe kátɔɔ̂i. Ka Kúnuu-namui ŋɔtíi kɛ́ nɔ́ a tãi kélee. Ka gɔ́lɔŋ a gɛ́ɛ kátii fe kpɛni-kpɛni Kúnuu-namui kponôi.
Currently Selected:
Kɔleŋtiɛŋ Maa-ŋuŋ 15: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia