Kɔlɔnikɔ Maa-ŋuŋ 29
29
Zama-sãai dí dɛ̀ɛ Ŋ̀âla-pɛrɛ Kɛ́tɛi tɔɔ mɛni mai
1Gâloŋ Deeƃé è mò ǹûai kélee dîa ǹyɛɛi, “Ŋálôloŋ Saloma nyíi Ɣâla a zìɣe zu díi ŋí kɛ́ mɛni mai, gáa a lôloŋ vé táre ní. Díi ŋí kɛ́tɛi m̀ɛni ma. Bɛ́rɛ kɛ́tɛi ŋí fé núu-kpune m̀ɛni ma. Kɛ́lɛ gáa Yâwɛɛ Ɣâla m̀ɛni ma. 2M̀ɛni ma, ŋa zãai kélee ŋá tɛ́ gîe ma Ŋáɣâlai ŋɔpɛ́rɛi tɔɔ mɛni ma-gôoi, gáne-ŋai, m̀ara-ŋai, gɔli-ŋai, da ŋ̀úru-kpono-ŋai kélee ŋá tɛ gîe ma. Ŋa gɔni sɔ̃ɔ kpanaŋɔɔ-ŋa, kɔni fóloɔɔ-ŋa da gɔni koleŋ sii támaa. 3É kúla zãai pôlu ŋá ŋ̀áa tɛ̀ ma bɛ́rɛ maa-waai tɔɔ mɛni mai, ŋa ŋ́go tée a gɛ́ɛ ŋá ŋágôoi da ŋákanei da tɛɛ Ŋ̀âla-pɛrɛi Kɛ́tɛi tɔɔ mɛni ma a gɛ́ɛ ŋá ŋáwɛli kɛ́-maai lɛ́ ńyêei Ɣâla Ŋɔpɛ́rɛi mɛni ma. 4Ŋá ŋágôo ǹɛ́lɛɛ-ŋai ŋɔpãŋ wála ŋ̀uŋ feerɛ pôlu buu saaƃa (230,000) da káne pãŋ wála ŋ̀uŋ lɔ́ɔlu pôlu buu feerɛ káo náaŋ (524,000) tɛ̀ɛ a gɛ́ɛ 5ǹyɛrɛ kɛ́-ƃelai dí gôoi da gáne sãai kpɛtɛ a dia bɛ́rɛi mɛni ma. M̀ɛni ma, gbɛɛ ƃé naa gbîŋ kpɛtɛɛ̂i a gɛ́ɛ é sama-sãa tɛɛ Yâwɛɛ Ŋɔpɛ́rɛi tɔɔ mɛni mai?”
6Nya ƃe ǹúu-suu-ŋai, ǹûai laa-tuɛ-ƃelai da gɔ-kuluƃa-ŋai mɛi-ƃelai da ǹúu-kpaya-kpayai kɛ̀ gâlôŋ ŋɔsãai mɛi dîa máŋ dí dísama-sãai tɛɛ. 7Dí zãâi ŋí tɛ̀ɛ Ŋ̀âla-pɛrɛ Kɛ́tɛi tɔɔ mɛ̂ni ma: gôo pãŋ wála ŋ̀uŋ saaƃa pôlu buu lɔ́ɔlu mɛi saaƃa (380,000), káne pãŋ wála ŋ̀uŋ lɔ́ɔlu mɛi feerɛ pôlu buu lɔ́ɔlu mɛi da (760,000) da ƃara pãŋ meeyɔŋ tɔnɔ, wála ŋuŋ-saaƃa pôlu buu lɔ́ɔlu (1,350,000) da kɔli pãŋ meeyɔŋ lɔ́ɔlu-mɛi feerɛ, wála ŋ̀uŋ lɔ́ɔlu (7,500,000). 8Diai kélee kɔni-sɔ̃ɔ kpanaŋɔɔ è kɛ̀ díyeêi dí dɛɛ Yâwɛɛ ŋɔpɛ́rɛi tɔɔ mɛni ma. Dí zãâi ŋí kélee tɛ̀ɛ Gɛsɔŋ ŋɔsuui su ǹúui Zeiɛ pɔ́ a gɛ́ɛ é dímɛi káa. 9Mɛni m̀a ǹûai kélee líi è ǹɛ̃ɛ, kpɛ́ni fêi, dí zama-sãai ŋí tɛ̀ɛ Yâwɛɛ pɔ́ é kula dílii su. Gâloŋ Deeƃé ǹyaa máŋ kpîŋ ǹíi é ǹɛɛ kpɔ́ a zu-kɛ́tɛ.
Deeƃé è Yâwɛɛ láa ma tɛ
10Deeƃé è Yâwɛɛ láa ma tɛ̀ ǹûai kélee ŋɛ́i-tuɛ ǹyɛɛi, “Lûwa káa yâ, óo Yâwɛɛ yáai íkaa a kúnâŋ Zeeka Ŋɔɣâlai wɔ́lɔ-wɔlɔ da wɔ́lɔ-wɔlɔi. 11Óo Yâwɛɛ, íkɛ̂tɛi, íwala-walaa, ífolo-laai kɛ̀ ƃo ǹaa. Íkâloŋ-laai su kɛ́tɛi. Zãai kélee gáa ŋ̀elei su da ǹɔii mai díkaa a ípɔɔ. Óo Yâwɛɛ, yá ƃé ímaa tɛɛ̂i a zãai kélee kpɔ́ mɛi. 12Tɔɔ-laa da ƃaa kɛ́-maa da kùla íyêei, ǹyaŋ yá ƃé yâ tíi kɛ́ a dîa. Yá ƃé wála-wala káa íyêei nyíi yâ dɛ̀ɛ sɛŋ kélee pɔ́i. 13M̀ɛni ma, Kúɣâlai, kwa sɛɣɛ fêi tɛɛ̂i ípɔ kúkɛ ílaa ma tɛ̂ ífolo-laai mɛni ma.
14“Kɛ́lɛ gbɛ̂ɛ ƃa ńyãa a gɛ́ɛ kwa ŋánûai kú sama-sãa kɛ́ɛ ŋí tɛɛ ípɔi? Yá ƃé sɛŋ kélee è kùla íyêei. Íkpɔɔi sãai tá nɔ́ ká ŋí kwa dɛ̀ɛ ípɔi. 15Kúkaa a ŋɔ̃ya-ŋa, kúkɛ tɛɛ-tɛ̀ɛ nɔ́ yɛ̂ɛ berei kúnâŋ ni dí wɔ́lɔ kɛ̀ gɛ̂i lai. Kúkɛ-ɣeniɛi è kɛ̀ nɔ́ yɛ̂ɛ ninîŋ, kúkɛ̂i fé ma. 16Óo Yâwɛɛ Kúɣâlai, zãa támaai ŋí kwa ŋá tɛ ma a gɛ́ɛ kú pɛrɛ tɔɔ la ílaa maa waai maa tɛ́ mɛni mai gélee è kùla íyêei ǹyaŋ gélee káa a ípɔɔ. 17Ŋáɣâlai, ŋá gɔ́lɔŋ a gɛ́ɛ yâ núu líi su kâa ǹyaŋ ílii a ǹɛ̃ɛ diai da tùa a teniŋ ƃó perei dímɛni ma. Ǹyaŋ ŋá zãai ŋí kélee tɛɛ a teniŋ ƃo pere é kúla ńii su. Ŋa ŋɔ́nɔ berei káa ínûai díkaa ƃɛ́i da sama-sãa tɛɛ̂i la ípɔ gɛ́ kùla dílii su a lii-nɛ̃ɛ perei. 18Óo Yâwɛɛ, yáai íkaa a kúnâŋ Eberaɣɛ̃ɛ, Aise da Zeeka Díɣâlai, ye gili-ŋa-sia sii ŋí lɛ́ɛ ínûai kíli ŋá í gɛ́ dí ƃò a teniŋ ƃo-ƃela ímɛni ma. 19Ǹɛɛ naa nóŋ Saloma kíli é kɛ́ a dɔɔ́ yâ, é íwoo mɛni, é ítɔ̂ŋ-ŋai mɛi káa é díŋaa-see kɛ́ a gɛ́ɛ é bɛ́rɛi tɔ́ɔ nyíi ŋa dɔɔ-sãa kélee ŋá tɛ́ mai.”
20Nya ƃe Deeƃé è mò ǹûai kélee dîa ǹyɛɛi, “Ká lûwa too dínâŋ ni Díɣâlai Yâwɛɛ ma.” Ǹyaŋ díkelee dí gɛ̀ tí. Dí díŋuŋ ma pîlaŋ dí Yâwɛɛ fɛli dí ƃaa kɛ́-maa tɛɛ gâloŋ pɔ́ máŋ.
21Dí sâla kùla Yâwɛɛ ma a ŋ̀elei tí. Bôlu ma ŋ̀elei, dí kéreŋ sala kula Yâwɛɛ ma a niŋa-sirɛ wála tɔnɔ, ƃála-sirɛ wála tɔnɔ, ƃála-lonii wála tɔnɔ da kpele-sɛŋ sama-sãa. Dí zâla ŋí kùla Eezuɛ-ƃelai kélee mɛni ma a zu-kɛ́tɛ. 22Dí dílaa m̀ii dí díkpele Yâwɛɛ ŋɛ́i-tuɛ a maa ɣelei ti a lii-nɛ̃ɛ su-kɛ́tɛ.
Nya ƃe dí naa Saloma kɛ̀ a kâloŋ a tãi veerɛ ɣelei. Dí wúlɔ pú ŋ̀ûa Yâwɛɛ láai su, dí Zadɔ lɛ́ a zâla láa-soŋ-nuui. 23Saloma è lɛ̀ɛ ǹâŋ Deeƃé pɔ́ɔ ŋá a kâloŋ é see gâloŋ see-sɛŋ ŋá yɛ̂ɛ berei Yâwɛɛ è ǹɛ lai. Ŋɔkâloŋ-laai è ƃûu ƃò Eezuɛ-ŋai díkɛ ƃaa kɛ́-maa tɛɛ bɔ́. 24Ǹúu-laa túɛ-ƃelai kélee da Gâloŋ Deeƃé ǹônii-sinaai dí díyee sèe Gâloŋ Saloma ŋɔkâloŋ-laai mu. 25Yâwɛɛ è Saloma mu-wiɛ kpɔ́ Eezuɛ-ŋai kélee ŋɛ́i. È ŋɔ́nɔ wála-wala tɛ̀ɛ bɔ́ ŋɔkâloŋ-laai su nyíi da fé tá kɛ́ ní Eezuɛ kaloŋ da ma nyii-ŋai kâloŋ-laa kɛ̀ dúɛ-perei.
Gâloŋ Deeƃé è sàa
26Zɛse ǹóŋ Deeƃé è wɔ́lɔ kɛ̀ Eezuɛ lɔii gwaa kélee mɛi a kâloŋ. 27È gɛ̀ Eezuɛ mɛi a kâloŋ a kóraŋ buu-náaŋ. È góraŋ ŋí ǹɔ́ɔlu mɛi feerɛ kɛ̀ Iburɔŋ taa-leei su, é buu-saaƃa káo-saaƃa kɛ́ Zerusâlɛŋ taa-leei su. 28È pɔlɔ a ŋ̀ánaa é lɛ́ɛ pâi saâi. È kɛ̀ kpɔ́ a dɔɔ́ a zu-kɛ́tɛ Ƃaa kɛ́-maa támaa è kɛ̀ ƃò m̀a. Ǹóŋ Saloma è lɛ̀ɛ bɔ́ɔ ŋá a kâloŋ. 29M̀ɛni-ŋai kélee Gâloŋ Deeƃé è wɔ́lɔ gɛi, bɔ̃yɛ̂ɛi Ɣâla ŋɔlóno kɛ́-ƃelai Samia, Netɔŋ da Gâa dímɛni pɔlɔ kɔlɔ-ŋai su. 30M̀ɛni pɔlɔ-ŋai ŋí ƃa m̀ɛni-ŋai è wɔ́lɔ tɛ̀ɛ zu gɛ́ɛ kɛ̀ a kâloŋ da mɛni-ŋai wɔ́lɔ kɛ̀ a ǹɔii-ŋûŋ-ŋai ŋɔkâloŋ-laa koraŋ-ŋai sui.
Currently Selected:
Kɔlɔnikɔ Maa-ŋuŋ 29: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia