Kɔlɔnikɔ Maa-ŋuŋ 11
11
Dí Deeƃé lɛ̀ a Eezuɛ-ŋai díkâloŋ
(Samia Veerɛi 5:1-10)
1Naa pôlu ma, Eezuɛ-ƃelai kélee dí lì Deeƃé pɔ́-naa tãi è kɛ̀ la Iburɔŋ. Dí mò ma dîyɛɛi, “Kwa kâa-ni kúkaa a núu-suu tɔnɔ. 2Kú gɔ́lɔŋ tãi Sɔ̂ɔ è kɛ̀ la a kúkâloŋ, yá ƃé yà kâa tɔ̀ɔ kúkɔ-kuluƃa-ŋai láa túɛ ka dîa-ni kákɛ kúlɔii maa kɔ̃ɔ. Kú gɔ́lɔŋ a gɛ́ɛ Íɣâlai Yâwɛɛ è wɔ́lɔ góno tèe íyêei a gɛ́ɛ ya pâi kɛ̂i a ŋɔnûai láa túɛ-nuu.” 3Eezuɛ nuu-pɔlɔ-ŋai dí pà Gâloŋ Deeƃé pɔ́ Iburɔŋ, è kpanaŋ-woo kɛ́ díyêei Yâwɛɛ ŋɛ́i-tuɛ. Dí nâa wúlɔ pú ŋ̀ûa dí gɛ̀ a díkâloŋ yɛ̂ɛ berei Yâwɛɛ è wɔ́lɔ góno tèe la Samia sarâi.
4Naa kɛ́ɛ tíi, Deeƃé da Eezuɛ kɔ kɔ́-ƃelai dí lì dí kɔ́ pɛ́lɛ Zerusâlɛŋ taa-leei ma. Zerusâlɛŋ láa ƃé kɛ̀ a Zɛbu. Naa ƃé Zɛbu-ŋai kɛ̀ ǹɔii tí sui díseɛɛ è kɛ̀ naa. 5Nya ƃe Zɛbusa-ŋai dí mò Gâloŋ Deeƃé ma dîyɛɛi, “Ífa pɔ̂ri serîi daai ŋí su.” Kɛ́lɛ Deeƃé è Zãiyɔŋ Yeei ŋɔkili tɔɔ maa kwaai ma sòŋ dí nàa láa sèe a Deeƃé ŋɔtaa-lêei. 6Gɛ́ɛ tí, Deeƃé è mò ŋɔkɔ́ kɔ́-ƃelai dîa ǹyɛɛi, “Ǹúui pâi tɔɔ̂i gɔ́-kuluƃa-ŋai túɛ dí kɔ́ pɛ́lɛ Zɛbu-ƃelai diai ǹyaa ƃé pâi kɛ̂i a ŋákɔ-kuluƃa-ŋai mɛi-nuu kɛ́tɛi.” Nya ƃe Zɛruia ǹóŋ Zoa è kɛ̀ a m̀aa-ŋuŋ é lí é pɛ́lɛ ǹûai ŋí dîa. M̀ɛni ma dí nâa gɛ̀ a ǹúu kɛ́tɛi. 7Deeƃé è lì é sée daai su. M̀ɛnii ŋí ƃé gɛ̀ díkɛ daai ŋí láa sèe a “Deeƃé Ŋɔtaa-lêei.” 8È daai ŋí tɔ̀ɔ é siɣe ƃɛ́i dí gbotoloi láa fɛ̂ɛ naa a pɔ̂rɔi é seri ziɣãŋ ma. Zoa è daai ŋí m̀éla kpéli tɔ̀ɔ ŋɔ́nɔ pôlu. 9Deeƃé ŋɔwála-wala-laai su è kɛ̀ nɔ́ kpanâni gɛ̀ li tuɛ pere, kpɛ́ni fêi, ŋ̀wála-wala kélee Yâwɛɛi è kɛ̀ bôlu.
Deeƃé ŋɔkɔ-kuluƃa-ŋai
(Samia Veerɛi 23:8-39)
10Diai ŋí ƃé kɛ̀ a Deeƃé ŋɔkɔ-kûluƃa-ŋai láa túɛ-ƃelai. Ǹûai ŋí da Eezuɛ-ƃelai kélee ƃé wɔ́lɔ tɔ̀ɔ bôlu a gɛ́ɛ pɔri é kɛ́ mì é ǹɔii kélee sóŋ yɛ̂ɛ berei Yâwɛɛ è wɔ́lɔ mò la é pîlaŋ Eezuɛ mai dí gɛ́ ŋɔkâloŋ-laai su é kpanâŋ.
11M̀aa-ŋuŋ ƃé kɛ̀ a Zasobeaŋ. È kɛ̀ a Asimɔŋ suui su nuu. Ǹalôŋ ŋí ƃé kɛ̀ a “Gɔ-kuluƃa wála-wâla ǹuu-kpulu Saaƃai” wála-wâla-ŋai láa túɛ-nuui.#11:11 Gɔlɔ pɔlɔi da su (lí Samia Veerɛi 23:8) “Ǹúu Saaƃai.” Iibulu “Ǹúu buu Saaƃai.” È kɔ̀ kpakolo ŋuŋ saaƃa pɔ́ a ŋɔƃóa-sɔkpɔi é gélee páa kɔ́ tɔnɔ su. Ǹúu saaƃai ŋí ƃé kɛ̀ a Deeƃé ŋɔkɔ-kuluƃa wála-wala-ŋai. 12Ǹúu saaƃa wála-walaai veerɛi ƃé kɛ̀ a Ilieza. Ilieza ŋí ǹâŋ láa ƃé kɛ̀ a Dolo. Dolo è kùla Ao ŋɔsuui su. 13Ǹalôŋ ŋí da Deeƃé ƃé kɔ̀ Felesia-ŋai pɔ́ Pa-Damiŋ. Dí gɔi ŋí kɔ́ bale kpalaŋ ŋá. Eezuɛ kɔkuluƃa-ŋai dí pú Felesia-ŋai yêei gwaai ŋí ma. 14Kɛ́lɛ Deeƃé da Ilieza dí lɛ̀ɛ dítɔɔ̂i bale kpalaŋ sâmai. Dí lɛ̀ɛ naa é lɛ́ɛ la zu dí Felesia-ŋai yée mɛi ɣále. M̀aa ɣelei tí Yâwɛɛ è tɔɔ dípôlu dí ǹûai yée mɛi ɣále.
15Ɣele tɔnɔ ta, gɔ-kuluƃa saaƃa wála-wala-ŋai ŋí dí sìɣe dí lí Deeƃé pɔ́-naa Adulaŋ Kɔni-woloi kɔlɛ. Ǹúu saaƃai ŋí dí kùla Deeƃé ŋɔkɔ-kuluƃa wála-wala buu-saaƃai sáma. M̀aa tãi tí yée mu, Felesia-ŋai dí pà dí díƃûu pú Lefiaŋ tiŋ-tiŋ su. 16Tãi ŋí yée mu, Deeƃé è kɛ̀ ŋɔloo kwaai ma. Felesia-ŋai dia máŋ díkɛ̀ Bɛpeleɣɛ̃ɛ. 17Kpele wɛ̂li è Deeƃé sòŋ a ŋánaa. Nya ƃe è mò ǹyɛɛi, “Núu da fêi kɛ̀ naa é yá kɔ́ɔ ǹya-loai su Bɛpeleɣɛ̃ɛ siɣaŋ kɔlɛ é dɛɛ ḿbɔ ŋá gbele.” 18Gɔ-kûluƃa saaƃai ŋí kɛ̀ gɔlɛ ma dí dí mu-sìɣe dí lí ƃɛ́i Felesia-ŋai díkɛ̀ naai dí tɛ́ɛ dísama a wála-wala-laa dí ǹyái kɔ́ɔ dí pá la Deeƃé pɔ́. Kɛ́lɛ vé gbele ni. È bù Yâwɛɛ mì a sâla sɛŋ, 19é m̀ó ǹyɛɛi, “Ɣâla fé m̀ɛni a dɔnɔ kpîŋ a gɛ́ɛ ŋá nyíŋi kɛ́. Ŋa ǹyai ŋí kpêle, a pâi kɛ̂i yɛ̂ɛ ǹûai ŋãa kpeleɛɛ nyii-ŋai dífulu-laai kɔ̀lɛ a gɛ́ɛ dí ǹyái ŋí kɔ́ɔi.” Deeƃé fé ǹyái ŋí kpele ní, kpɛ́ni fêi, ǹúu saaƃai ŋí dí dífulu-laai sèe a sɛ́ɣɛ dí lí dí pá pôlu. Bere sîi ŋí ƃé “Ǹúu wála-wala saaƃai” ŋí dí díwala-wala-laai lɛ̀ la.
20Zoa ǹêɣe Abisai ƃé kɛ̀ a ǹúu-buu saaƃai láa túɛ-nuu. Ǹalôŋ ŋí ǹyaa tɔnɔ è núu ŋ̀uŋ saaƃai (300) pàa kɔ́ tɔnɔ su. M̀ɛnii ŋí ƃé gɛ̀ díkɛ ƃaa kɛ́-maa támaa tɛ̀ɛ bɔ́ naa yɛ̂ɛ gɔ-kuluƃa wála-wala saaƃai. 21È kɛ̀ a nuu buu saaƃai láa tuɛ nuui. Ŋɔƃaa kɛ́-maai è kɛ̀ nɔ́ yɛ̂ɛ gɔ-kuluƃa saaƃa wála-wala-ŋai, berei máŋ vé kɛ́ ní la a dítai.
22Zeoiada ǹóŋ Benaiya è kɛ̀ a gɔ-kuluƃa wála-walai dɔnɔ. È lii-kpêle mɛni támaa kɛ̀. Zeoiada è kula Kazei ŋɔsuui su. Môa-ƃela wála-wala feerɛi pàa. Kɔ́lɛ ɣele tɔnɔ da è lɔ̀ lóa kɛ́tɛ tɔnɔ su é yala-sulu tɔnɔ paa naa. 23Benaiya ŋí è wɔ́lɔ Ize naloŋ tɔnɔ pàa a gbɔ́ɔi kpala. Ǹaloŋ ŋí ŋɔmu sîɣe è kɛ̀ a kɔ́ɔ ƃɔ̂rɔnii lɔ́ɔlu mɛi-feerɛ da gbura. Kpála kɛ́tɛ maa pɔlɔ-pɔlɔɔ tɔnɔ è kɛ̀ ǹyêei. Da Benaiya díkɛɛ kɔ̂i, Benaiya è gbálai lòkwa ǹyêei a wuru gbua kɛ́tɛ tɔnɔ é gula ǹyêei. Benaiya è ǹalôŋ kpɔ́ɔi kpalai sìɣe é baa la. 24Benaiya ŋɔƃaa kɛ́-maai è kɛ̀ a nɔ́ yɛ̂ɛ gɔ-kuluƃa saaƃa wála-wala-ŋai dɔnɔi. 25Ǹalôŋ ŋí ŋɔƃaa kɛ́-maai è kɛ̀ a gɛ́tɛ ǹúu wála-wala buu saaƃai sáma. Kɛ́lɛ ŋɔwála-wala laai fé kɛ̀ ní a zeriɛ́ɛ gɔ-kuluƃa saaƃa wála-wala-ŋai díwɔ̂i pɔ́. Ǹalôŋ ŋí ƃé Deeƃé è wɔ́lɔ dɔ̀ɔ ŋɔkɔ-kuluƃa-ŋai kɛ̀ m̀ɛi kâai láa-tuɛ.
26-47Diai ŋí ƃé kɛ̀ a gɔ-kûluƃa tɔɔ̂i kpanaŋɔɔ-ŋai:
Zoa ǹêɣe Asaɛ
Bɛpeleɣɛ̃ɛ nuui Dolo ǹóŋ Ɛɛanaŋ,
Aro nuui Samɔ
Pele nuui Ɛlɛzi
Tekoa nuui Ikesi ǹóŋ Ira
Anatɔ nuui Abiezɛ
Usa nuui Sibeka
Ao nuui Ilai
Netofa nuui Maarai
Netofa nuui Baana ǹóŋ Ɛlɛ
Libai kùla Gibea, Bɛŋsima ŋɔlɔii-kpîniŋ sui ǹóŋ Itai,
Piratɔŋ nuui Benaiya
Urai nyíi kùla Gaasi tiŋ-tiŋ sui
Aba nuui Abiɛ
Bauruŋ nuui Azimavɛ
Saabɔŋ nuui Ɛɛliaba
Gisɔŋ nuui Asɛŋ
Sagee kùla Arai ǹóŋ Zonetaŋ
Ara nuui Saka ǹóŋ Aiaŋ
Ɔɔ ǹóŋ Ilifaa
Mekɛra nuui Ɛfɛ
Pelɔŋ nuui Aiza,
Kamɛɛ nuui Ɛzilo
Ɛziba ǹóŋ Naara
Netaŋ ǹêɣe Zoɛɛ Aguri ǹóŋ Miba,
Amɔŋ nuui Zɛlɛ
Bɛro nuui Naarai nyíi kɛ̀ a Zɛrua ǹóŋ Zoa ŋɔkeŋe-la kɔli-kalaŋ siɣe-nuui
Itilai-ƃelai Ira da Galɛ
Ita nuui Yuraya
Alai ǹóŋ Zaba
Lubiŋ ŋɔsuui su-nuui Siza ǹóŋ Adina, nya ƃé kɛ̀ a Lubiŋ ŋɔsuui su-ƃelai láa túɛ-nuui é pɛ́lɛ ǹúu buu-saaƃai kɛ̀ bôlui
Maaka ǹóŋ Anaŋ
Mitaŋ nuui Zosafa
Asitɛla nuui Uzia
Aloɛ nuui Otaŋ ǹônii-sinaai sáma da Zɛiɛ
Simili nyíi kùla Tizi ǹônii-sinaai Zediɛɛ da Zoaa
Maava nuui Ilaɛɛ
Ɛɛnaaŋ ǹônii-sinaai Zeliba da Zosavia
Môa nuui Itima
Eliɛ Mizoba nuai Ilaɛ
Obɛ da Zaasiɛ.
Currently Selected:
Kɔlɔnikɔ Maa-ŋuŋ 11: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia