Esd 3
3
Xkiyejaa' wo' chik i artaal loq'oomb'al reh i Dios
1Noq wuquub' chik poh kisutinik chaloq i aj Israel wilkeeb' chik pan kitinamiit chi kiju'junaal, chu'nchel i tinamit xkimol wo' chik kiib' Jerusaleem. 2Eh re' i Jesúa i rak'uun i Josadac, eh taqe i k'amal kib'eeh aj tiij taqe i kik'uliil, eh i Zorobabel rak'uun i Salatiel, taqe i ma' tokoom ta ruuk' xtohq'ik kiyejaam i ru artaal i qaDios i hoj, hoj aj Israel. Reh chi xkik'at i mayijimaj chikop chinaah, je' rukab' i ruq'or i k'uhb'aal ye'ooj ree Moisés raj kamanoom i Dios. 3Eh xkiyejaa' i artaal aha' naq wilik pampeet ruum kiyo'jik kuum i tinamit wilkeeb' wach ak'al, xkik'at i mayijimaj chikop chinaah i artaal re' re', rajlaal wahq'eq, rajlaal xq'eq, ye'b'al ruloq'il i QaJaaw Dios. 4Eh xkian ninq'iij reh kok' perpat, je' wo' rukab' i tz'ihb'amaj rehtaliil reh i t'iosinik chuwach i Dios, reh chi xiko'ljik. Eh rajlaal wo' q'iij inkiq'asaj chi mayiij i k'atoj chikop, je' rukab' i kanamaj rub'aan, eh paruq'ijil wo' xkian. 5Eh kiq'asaj wo' hoq i k'atoj chikop chi kimayiij i re' i okrinaq taqe chi ye'arik eqal eqal inki q'aasaj, je' wo' hoq i mayiij reh i ak' poh, je' wo' hoq i k'atoj mayiij reh i nimaq wach ninq'iij loq'oomb'al reh i QaJaaw Dios, je' wo' i mayiij xan chalik pankik'ux ruye'ariik. 6Eh pank'amb'al rub'eeh i ruwuuq poh xkitoq'aa' ruye'ariik i k'atoj chikop chi kimayiij loq'oomb'al reh i QaJaaw Dios atoob' ta komajaa' inkitoq'aa' ruyejeb'jiik i rupaat i Dios. 7Eh kitoj wo' taqe i aj tz'aqool, je' wo' taqe i aj sehk, xkiyeew wo' kiwa' kihaa', kaseite i aj Tiro, i aj Sidón, reh chi naa kik'amam chaloq i holohaq chee' chakaltee' wilik ar Líbano. Reh chi xkik'am chaloq Jope nah palaw, je' rukab' i xye'arik q'ab' keh ruum Ciro kireey i aj Persia.
Re' noq xtohq'ik wo' chik rukorb'eesjiik chi korik i rupaat i Dios
8Eh parukab' poh reh i rukab' haab' kik'uliik iloq parupaat i Dios Jerusaleem i aj Israel noq xi elik cho Babilonia re' i Zorobabel rak'uun i Salariel, re' Jesúa rak'uun i Josadac re' taqe i k'amal kib'eeh aj tiij, taqe i aj Levíta taqe i xi sutinik chaloq xi okik chi ruyejeb'jiik i rupaat i Dios. Eh re' taqe i aj Levíta ik'inaq taqe juninaq haab' xkikanaa' chi rilariik i kamanik re' re'. 9Re' taqe i xi k'amwik kib'eeh i xiyej-anik reh i rupaat i Dios je' wili kib'ihnaal: Jesúa ruch'ihil taqe rak'uun, re' taqe ma' tokoom ta ruuk', re' Cadmiel rak'uun Jodavias re' taqe i rak'uun, re' Henadad, re' taqe rak'uun, re' taqe ma' tokoom ta ruuk'. Chu'nchel i re' aj Levíta taqe.
10Eh noq xkikoj raa' i rupaat i QaJaaw Dios taqe i aj tz'aqool, re' taqe i k'amal kib'eeh aj tiij xkikoj chikiij i kiso' inkikoj parukamaj Dios, eh wilik kituun pan kiq'ab'. Eh re' taqe i aj Levíta i riih taqe Asaf xkiq'ojej i kipulato q'ooj chi loq'oomb'al reh i QaJaaw Dios. Xkian wo' hoq je' rukab' i ruq'orom kahnoq i David wihinaq chi reyil Israel. 11Wilik taqe i xkian kitz'uuy chi loq'oomb'al reh i QaJaaw Dios, eh chi, je' wili i xkiq'or: Qat'iosej taq i rotob'il i QaJaaw Dios ruum re' reh q'e' atoob', eh juneliik i ruketelaaj qawach i hoj, hoj aj Israel, inki taqe. Eh chu'nchel i tinamit suq kik'ux k'erlik kichii' chulooq'jiik Dios ruum k'ahchi' rukojariik chee raa' i rupaat i QaJaaw Dios. 12Eh ma' k'isiin taqe i k'amal kib'eeh aj tiij re' ruuk' taqe i aj Levíta mama' winaq chik taqe i k'amal kib'eeh i ju'jun chi patineel xi ilwik reh i rupaat i Dios xwihik cho pampeet noq xkilow chi k'ahchi' rokiik i raa' i rupaat i Dios xak'erik chik kichii' chi oq'ik. Eh ma' k'isiin wo' taqe i k'erik kichii' ruum i rusuqkiil kik'ux. 13Eh chi najt i nib'irjik chee oq'ik inki a'n xa re' la' ma' xkireq ta chi riij i tinamit awach taqe i k'erik kichii' ruum i rusuqkiil kik'ux, eh awach i oq'ik inki a'n.
Currently Selected:
Esd 3: POK
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.