Am 1
1
Yailal yin juntzan nacionlak ay cawilal conob Israel
1A ton juntzan k'anej ti' max yal Amós, jun ilom wacax aj conob Tecoa. Cab abil yalantok jun miman quixcab, max yaloncan el Dios juntzan k'anej ti' yin conob Israel, yet ayoc Uzías yin reyalil bay Judá, axa Jeroboam, c'ajol Joás, ayoc yin reyal bay Israel.
2Max yalon Amós: Axca bil mak'waj c'u, caytu' chi yun yoc nuk' Jehová tac'al bay jolom witz Sión bay Jerusalén. Masanil is lobal no no' chi etaxtok, cax chi takaj an ac'un bay jolom witz Carmelo.
Siria
3Axca wal ti' yalon Jehová: A wal eb cajyom bay Damasco, caw wal xiwil yobtakil max yun eb, xan yowalil ok waoc yailal eb, yujtol yelxac'al max etax eb aj Galaad yuj eb, axca wal tec'lay trigo.
4Yuj tu' xan ok waoc k'ak'al yatut eb reyal yinatil Hazael. A jun k'ak'ej tu' ok ak'on lajwok cuartel-lak cham Benhadad.
5Yowalil ok in mak' poj masanil puertalak bay conob Damasco. Cax ok wak'on c'ayil masanil eb cajyom bay jobeal Avén, c'al eb yajaw bay Bet-edén, xan ok ilaytok eb sirio yin mosejal bay Kir, ẍi Jehová.
Filistea
6Axca wal ti' yalon Jehová Cham Yajaw: A wal eb aj Gaza, caw wal xiwil yobtakil max yun eb, xan yowalil ok waoc yailal eb, yujtol max yitok eb juntzan conob masanil, cax max txonontok eb bay Edom yin mosejal.
7Yuj tu xin, xan ok waoc k'ak'al is murallail Gaza tu'. A jun k'ak'ej tu' ok ak'on lajwok ay cuartel-lak eb.
8Ok wak' lajwok ay eb cajyom bay Asdod, yetok mac ayoc yajawil bay Ascalón. Yetok wal masanil wipalil ok in tok lemnaj yin Ecrón, cax c'amxa junok eb filisteo tol man ok camok, ẍi Jehová Cham Yajaw.
Tiro
9Axca wal ti' yalon Jehová: A wal eb aj Tiro, caw wal xiwil yobtakil max yun eb, xan yowalil ok waoc yailal eb. Max ya wal oc eb jun conobal anima yin mosejal bay Edom, c'amxa jabok max natek is trato yin amigoal.
10Yuj tu' xan ok waoc k'ak'al murallail Tiro. A jun k'ak'ej tu' ok ak'on lajwok ay cuartel-lak eb, ẍi Cham.
Edom
11Axca wal ti' yalon Jehová: A wal eb aj Edom tu', caw wal xiwil yobtakil max yun eb, xan yowalil ok waoc yailal eb. Tol max yuktej eb eb yican, a ton eb israel, yin mak'on cam eb yin c'amxac'al yabenc'ulal, cax bekanxac'al c'ul eb yunen yetok yowal c'ul. Majxa toj c'ayc'ulal yowal c'ul eb tu' yuj.
12Yuj tu' xan ok waoc k'ak'al conob Temán. A jun k'ak'ej tu' ok ak'on lajwok ay cuartel-lak eb aj Bozra, ẍi Jehová.
Amón
13Axca wal ti' yalon Jehová: A wal eb aj Amón, caw wal xiwil yobtakil max yun eb, xan yowalil ok waoc yailal eb. A yuj yion eb janic'okxa tx'otx', xan max jak eb is mimanil eb ix yobix cajan bay Galaad.
14Yuj tu' xan ok waoc is k'ak'al muralla bay Rabá. A jun k'ak'ej tu', ok ak'on lajwok ay cuartel-lak eb. Ok el aw yuj owal. A owal tu', axcaxac'al owal cak'ek' ow ok yunej.
15Axa reyal eb, ok tokcan preso bay tx'ok conobal, yetok is soldado tol mimanbil, ẍi Jehová.
Currently Selected:
Am 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989