Jer 51
51
Yayc'aybal Babilonia
1Chi yalon Jehová axca ti': Ok watek axca wal jun miman owal cak'ek' yin Babilonia, c'al yin eb caldeo, ok ak'lay lajwok ay eb yuj.
2Axca wal chi yun xulay el ixim trigo yuj cak'ek', caywal tu' ok utlay Babilonia yuj eb ajc'ul; c'amxa junok mactxel ok cajay can bay is tx'otx'al yuj eb. A wal yet ok apnok oc jun c'ual yet ok lajwok ay eb, yalxac'al bay ok tit eb ajc'ul yak'on owal yin eb.
3Watx'nejokab eb julwajwom is julbal. Yaokab oc eb makil txamc'ulej. C'amokab yabenc'ulal eb yin eb ach'ej bay Babilonia; lajwokokab ay is soldado yin junelnej.
4Ok ayc'ay eb caldeo bay ok yasjoktok eb, ok camay eb yulak calleal is conobal.
5Caxc'al mi a Israel c'al Judá yelxac'al max oc mul eb ayin, palta c'amtoc'al chi wiel eb yin in c'ul ayin Jehová, Yajaw in yin Masanil, is Diosal in eb, tol asanxanej in ocok.
6Elanek aj bay Babilonia ti', yet watx' c'am chex cam yuj is mul. A ton wal is yorail yet chin paktzen bay axca wal is mojalil.
7Max in k'anbalnej Babilonia yuj waon oc yowal in c'ul yiban masanil nacionlak. A Babilonia ti', lajan max yun yayji ec' yul in k'ab axca wal jun copa tol oro bay max wak' uc'wok an masanil yulyibank'inal. A yet max yuq'uen masanil nacionlak jun vino tu' cax max oybi sat eb yuj.
8Palta yinxac'al aymanil max coc'ax ay Babilonia ti'. Ok'anek yuj, iektek ambal; ok jila' tatol okto anchajok, ẍi Jehová.
9A eb tx'ok nacional cajan bay tu' chi aloni: Mayal jaoc ambal yin Babilonia, palta c'amxa chi anchaji. Canokabi. Junjun onc'al, tonek bay co conobal, yujtol a is mul jun conob ti' mayal ajapnok bay satcan, chi ajtac'al apnok bay xolak asun, ẍi eb.
10Chi yal eb aj Israel c'al eb aj Judá: Lanan paktzen Jehová yuj tzet max on utlayi. Tonek, jalek el bay Sión tzet yetal mayal yun Cham co Diosal, ẍi eb.
11Max ak'lay yun eb reyal Media yuj Jehová, yujtol nabilxa yuj, tol ok yak' lajwok Babilonia. Caywal tu' ok yun pakon ba Cham yuj tzet max utlay is templo yuj eb. Chi al-lay bay eb soldado: Watx'nejek e julbal. Aek oc e makbal julbalej.
12Iek aj bandera yin e toj e yak'on owal bay murallail Babilonia, ẍi. Watx'okab wal chi yun yoc oyan eb soldado yin conob. Ocokab wal is taynemal. Jelanc'al che yut e ba bay che yebaj el e ba yet che yak'on ayc'ay eb soldado chi eltek yak'on owal e yin, yujtol lanan yunen tzet nabil yuj Jehová yuneni, yin eb cajyom bay Babilonia.
13A wal ayex ti', ex aj Babilonia, nanlak mimek aej cajan ex, xan caw wal mimek beyom ex. Mayal jayoc c'ual e lajwi ay yin junelnej.
14A Jehová, Cham Yajaw yin Masanil, mayal yak' is ti': Toxac'al ok nojil yul e nación ti' yuj eb ajc'ul, axca wal no chapulín; ok el yaw eb yuj ex yak'on ayc'ay eb, ẍi Cham.
Bit yin aloj watx' k'anej bay Dios
(Jer 10.12-16)
15A Jehová max watx'nen tx'otx' tx'otx' ti' yetok is yipalil; yetok is jelanilal max watx'nej yulyibank'inal ti'; yetok is yajnabalil max jenbantok satcan.
16A Cham chi aloni, chi nilili bil c'u, cax chi tit nab. Chi yiaj wan asun bay is lajubal tx'otx' tx'otx' ti'. A' chi ak'on aj jopnaj rayo bay xol yaxnab; a' chi ion eltek cak'ek' bay wajan ec' yuj.
17A wal eb anima, yelxac'al c'am jabok is nabal eb, tol chi q'uixwi aj eb yuj juntzan yechelej chi watx'nej. A juntzan yechelej tu', c'am yiquisal; toc'al chi yak' c'aytok ba eb anima yin.
18A juntzan tzet yetal tu', c'am jabok yelapnok. Moj tol buchbejal yayji. A yet ok jay c'ual, ok yak' lajwok ay Jehová.
19Caw wal q'uexan yel is Diosal Jacob, a' max watx'nen masanil tzet yetal ay. A' max sic'on el Israel yin yoccan is conobok. A Jehová, Yajaw yin Masanil, axca tu' yoc is bi.
A Babilonia mitx'k'ab Jehová yayji
20Max yalon Jehová: A Babilonia axca wal in mak'bal yayji ocok, in mitx'k'ab yin owal. A yuj, max wak' lajwok ay nacionlak. A yetok, max wak' lajwok ay eb ay yikbej.
21A yetok, max wak'on lajwok ay no chej yetokc'al eb ayoc yiban chej tu', c'al yetok carruaje.
22Max wak' lajwok ay eb winak, eb ix ix, eb icham, eb ach'ej, yetokc'al eb ix k'opoj.
23Max wak' c'apax lajwok ay eb ilom calnel, yetok no calnel. Max wak' c'apax lajwok eb mulnajwom, yetok no buey. Max wak' c'apax lajwok eb gobernador, yetokc'al eb ayoc yikbej.
Yailal yiban Babilonia
24Ayin wal caw Jehová in chi wala': Ayex ok e yil in paktzen bay Babilonia, c'al bay eb caldeo axca wal is mojalil yobtakil max yun eb bay Sión.
25Ayin wal caw Jehová in chi wala': Ayin Jehová in ti' ajc'ul in yin Babilonia; a jun tu', lajan axca junok miman witz chi ak'on lajwok masanil sat tx'otx' tx'otx'. A yetok wipalil ok in tenic' bulnajok, axa tojcan bulnaj bay pac'an; xan a Babilonia tu', lajanxac'al ok yuncan axca junok witz tz'anaktok.
26Ayin wal caw Jehová in chi wala': C'amxa junok ch'en ch'en xol is pojilal okto k'anlay yet ok watx'nelay aj junokxa na. Tz'ininixac'al ok yuncan conob Babilonia yin junelnej.
27Iek aj tx'oxbanilal owal yin Babilonia. Xuek trompeta yet chi jayoc masanil nacionlak yak'on owal yin. Ajokab wan eb aj Ararat, eb aj Mini, c'al yetok eb aj Askenaz yak'on owal yin. Aek oc junok general chi ikban owal. Tokokab no chej yin owal, axca wal chapulín manxa jantakok is bisil.
28Watx'nejokab ba nacionlak yet chi oc yin owal. Titokab eb reyal Media, yetokc'al eb gobernador c'al eb mimek yikbej, yetok masanil anima ay yul makbej, ẍi Jehová.
29A tx'otx' tx'otx' ti', ok bilajok; ok tzicobtanelayok, yujtol ok yi ba tzet yetal nabil yuj Jehová. A yet ok occan Babilonia yin tz'inanil, c'amxa mac ok cajay bay.
30A eb soldado yet Babilonia, c'amxa tzet ok yal eb. Toxac'al ok can eb yulak is cuartel, c'amxa yip eb, lajanxac'al ok yuncan eb; axca eb ix ix. Axa ok yilontek eb, lananxa yayc'ay is conob, lananxa yak'lay tz'a masanil nalak.
31Txololixac'al ok yun jay eb chekbej yalon bay reyal Babilonia tol lanan yayc'ay is conob tu' yin junelnej.
32A eb ajc'ul ok oc eb makon bay chi k'axpoj ec' eb anima yul a'. Ok ak'lay tz'a cuartel-lak, xan ok oc eb soldado yin xiwc'ulalil.
33A Jehová, Cham Yajaw yin Masanil, is Diosal Israel, chi alon axca ti': A eb aj Babilonia, lajan wal eb axca trigo watx'xa yayji ay yul junok tec'bal, toxa wal chi apni oc tiempo tec'layi, ẍi Cham.
34-35A eb aj Jerusalén, c'al eb aj conob Sión, chi yal eb axca ti': A Nabucodonosor reyal Babilonia, coc'xac'al max on yuttok, q'uisisixac'al max yutcan co conob, axcaxac'al junok plato c'amxa tzet ay yul. Max on turlay aytok yuj axca junok no miman no' ay bay yulak a' mar. Max yak' wal noj c'ul yuj masanil tzet yetal ay ayon, axa tzet yetal majxa yochej c'ul, toxac'al max k'okcan elok. ¡Tojlanejokab el Babilonia axca wal is mojalil max on yutej! ¡Tojlanejokab el eb caldeo, yuj eb anima max mak' cam eb co xol! ẍi eb.
Albenal bay eb aj Jerusalén
36Chi yal Jehová bay eb aj Jerusalén axca ti': Ayin ok in oc yin beyc'ulal yin tojolal, ayin wal ok in paktzej bay eb ajc'ul oc e yin. Takinxac'al ok wutcan aj masanil a' najab c'al nuk'lak aej ay bay Babilonia.
37Toxac'al ok aj can bulan is pojilal; asanxanej no ok ok cajay bay tu', c'amxa mactxel okto cajayok. Toxac'al ok xiwaj eb anima c'al buchwaj eb yin.
38Ok awjok eb aj Babilonia axca no coj, ok el c'apax yaw eb axca no yune' coj.
39Ayin wal caw Jehová in chi wala': Yak'ban chi k'aẍnaj aj eb yuj tzalojc'ulal, ok in watx'nej junok loj bay eb, ok wak' uc'wok an eb, ok el yaw eb yuj tzalojc'ulal. Lajwi tu' ok wayaj eb yin junelnej, cax c'amxa yechel ok el wayan eb.
40Ok wiontok eb bay ok mak'lay cam eb, axca chi yun yilaytok no yune' calnel, no chiwo, c'al no icham calnel bay chi mak'lay camok, ẍi Cham.
Yayc'aybal Babilonia
41A wal Babilonia tol binajbil yulyibank'inal ti', ok ayc'ayok. Toxac'al ok xiwaj juntzan nacionlak yet ok yilon oc eb.
42Axca wal tol a a' mar ok tok secnaj yiban Babilonia, ok mukaytok yuj a'.
43A wal is conoblak, tz'ininixac'al ok yuncantok, takin tx'otx'xac'al ok yuncanok, c'amxa mactxel ok cajay bay tu', tamwal ayto mactxel ok ec'ok.
44Max yal Jehová: Ok wawal oc yailal yiban Bel is diosal Babilonia. Ok wak' wal xayej el tzet yetal mayal turaytok, majxac'al ul il-lay yuj juntzanxa nación, ok ayc'ay is murallail Babilonia.
45Ex in conob, elanek bay tu', colek e ba bay yowal in c'ul chi jayoc yiban.
46Manchak ex oc il, manchak ex xiw yuj masanil k'anej chi ec' bay tu'. Tx'ok tx'okc'al tzet chi binaj yet junjun abil, asanxanej yaxc'ayinakil chi binaji, ayxac'al oc eb yajaw yin owal.
47Caywal tu' ok yun jay c'ual waon oc yailal yiban juntzan is diosal Babilonia. Masanil nación tu' ok el q'uixwil, cax toxac'al ok nojcan el yuj mimanil eb camnak.
48Ayin wal caw Jehová in chi wala': A satcan c'al yulyibank'inal ti', yetokc'al masanil tzet yetal ay bay, caw wal ok tzalojbok ajok yet ok ayc'ay Babilonia, yet ok tit bay norte mac ok ak'on lajwok ayok.
49Ok ayc'ay Babilonia yuj jantakxa anima max yak' cam bay Israel, c'al yuj jantakxa anima max yak' cam bay yulyibank'inal, ẍi Cham.
K'anej max al-lay bay eb israel ayic' bay Babilonia
50Chi yal Jehová bay eb aj Israel ayic' bay Babilonia: A mac ex ok ex elcan xol camich ok uj tu', elanek ajok. C'amxa chex cancan bay tu'. Caxc'al najat aycan e tx'otx'al, palta aek wal oc e nabal win ayin Jehová in ti'; naek c'apaxtek Jerusalén.
51Palta ayex ti' che yala': Caw wal chon q'uixwi yet chi jaben tzet chi yal eb jin. Q'uixawtak onxac'al chi jabej, yujtol a eb tx'ok conobal mayal octok eb bay is makbej templo, toltax max octok eb yul cuartolak asan Dios ay yet, quex chi.
52Palta ayin Jehová in chi wala': Ok jay wal jun c'ual cax ok waon wal oc yailal yiban is diosal eb aj Babilonia, c'al bay masanil yul is makbej; toxac'al ok el yaw eb ok yasjoktok.
53Ayin wal caw Jehová in chi wala': Caxc'al chi ajtok Babilonia bay satcan, tol can chi yut watx'nen aj is murallail, ok watok eb ajc'ul bay tu', yet ok ak'lay lajwok ay eb, ẍi Cham.
Yayc'aybal Babilonia
54Ok ablaytac'al yel aw bay Babilonia, ok ablay lajwi ay masanil tzet yetal bay conobal eb caldeo.
55A wal Jehová ok ak'on lajwok ay Babilonia, ok lajwok ay is maynejbail. A eb ajc'ul, ok bil eb axca wal a' aej, caw wal ok bil yayc'ay eb yiban jun conob tu'.
56Chi yal Jehová: Ok jayoc eb ul yak'on lajwok ay Babilonia, ok michchaj masanil is soldado, cax ok mak'lay k'aj is julbal eb. Yujtol ayin Jehová, Dios in toni, tol chin paktzej bay junjun axca wal is mojalil.
57Ayin Rey in, Jehová, Yajaw in yin Masanil, axca tu' in bi, chi waloni: Axca tol ok wak' wal uc'wok an eb yajaw yayji bay Babilonia, eb aj nabal, yetok eb gobernador, yetok eb mimek yikbej, c'al eb soldado, cax ok tit wayan eb yin junelnej. Manxa ok el wayan eb, quin chi.
58Ayin wal caw Jehová, Yajaw in yin Masanil, chi wala' tol a jun is murallail Babilonia tol caw wal pim yayji, ok uchchajtok yin junelnej, yetok is mimek puertail ok tz'atok. Caw wal nabac'al max mulnaj juntzan nacionlak yin; a jantak mulnajil bay max c'unbi eb, toc'al ok tz'atok, ẍi Jehová.
Ilayokabtok k'anej Jeremías bay Babilonia
59A yet is can abil yoc Sedequías yin reyal bay Judá, max yal Jeremías is chekbej Dios, k'anej bay Seraías is c'ajol Nerías, yitxiquin Maasías. Ajun Seraías tu' yetok Sedequías yet max toj eb bay Babilonia, a' ayoc yikban eb iktzom. 60A Jeremías max junanej oc masanil tzet yetal maxax al-layi, tol t'inan ok jay yiban conob Babilonia, cax max tz'ibencan yul junok un. 61Max yalon cham bay Seraías: A yet ok ach apnok bay Babilonia, caw wal ok cam wal elon awten aj masanil juntzan k'anej ti'. 62Cax ok alon axca ti': Mamin Jehová ach max ala' tol ok och lajwok jun conob ti', tol c'amxa anima ok meltzojtek cajay bay, tamwal no no', tol ok cancan yin tz'inanil oj yin junelnej, cachi. 63A yet chi lajwi wal awten aj juntzan k'anej ti', cha c'alban oc junok ch'en ch'en yin tx'an un ti' cax cha bekon aytok yul a' Éufrates, 64cax chaloni: Cay wal ti' ok yun yayc'ay Babilonia, c'amxa yechel ok aj wan junelxa, yuj jantak yailal ok jayoc yiban yuj Jehová, cachi, ẍi Jeremías.
A cayti' chi lajwican is k'anej cham Jeremías.
Currently Selected:
Jer 51: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989