Est 2
2
A Ester max sic'lay oc yin reinail
1A yet mayal ec' janic'ok tiempoal, max sicbi ay yowal c'ul cham rey tu'. Max nalaytek xal Vasti yuj, yuj tzet max yun xal, c'al yuj ley mayal al-lay el yin xal. 2Axa eb cham yajaw bay yul is makbej max alon axca ti':
—Yowalil chi saylaytek eb ix k'opoj caw wal watx' yili bay cham rey. 3Sic'okab cham rey junok is chekbej bay junjun departamento yul is makbej, yet chi ilaytek masanil eb ix k'opojtak ix watx' yili, chi jayoc eb ix bay yatut cham rey bay Susa ti', cax chi occan eb ix yul k'ab cham Hegai, cham chi taynen eb xal yistzil cham rey, yet chi watx'nelay aj yili eb ix. 4A junok ix k'opoj tol ok cha' wal c'ul cham rey, a ton ix tu' ok oc yin reinail is q'uexelok xal Vasti. A jun nabalej tu' max cha' wal c'ul cham, xan max chek cham yun axca tu'.
5A bay conob Susa bay cajan cham rey, a tu' cajan jun winak tol israel, chi yik Mardoqueo is c'ajol Jair, titnak yin is yinatil Simei. A Simei tu' titnak c'apax yin is yinatil Cis yin is tribual Benjamín. 6Ajun c'apax Mardoqueo yetok eb ibiltek yuj rey Nabucodonosor bay Jerusalén, max jaycan oc eb bay Babilonia, junnej max yun jaycan eb yetok Jeconías is reyal Judá. 7A Mardoqueo tu', ay jun cutz'in is yican ayic' yetok, a ton ix Hadasa, chi yal elapnok Ester, meba'xac'al ix. Axa Mardoqueo tu' max iloncan ch'ib axca wal tol yet, yujtol camnakxa is mam c'al is txutx; caw wal watx' yili sat c'al is mimanil jun k'opoj tu'. 8Axa yet max eltok jun ley tu', xiwilxa eb ix k'opoj ix max wajnaj oc bay conob Susa bay is yatut cham rey, cax max alay oc eb ix is taynej cham Hegai, a ton cham chi taynenc'alta' eb xal yistzil cham rey. Ayoc ix Ester xol eb ix tu'. 9A ix Ester tu' caw wal watx' ix max yil oc cham Hegai tu', xan caw wal watx' c'ul cham yin ix. Yuj tu xin, yin aymanil max chek cham watx'nelay aj yili ix, c'al yak'lay is lobej ix caw wal watx'. Max alay oc ukwan eb ix chekbej cham rey caw wal watx' yin yak'on serbil ix, cax max alaytok eb ix yetok ix Ester bay jun cuarto caw wal watx' bay cajan ec' eb xal yistzil cham rey tu'.
10A ix Ester tu' c'am jabok tzet max yal yuj tzet inatilej ma tzet conobal, yujtol a Mardoqueo max cam yalon bay tol c'amc'al jabok tzet chi yala'. 11Junjunc'al c'u chi ec' Mardoqueo bay satak nail bay ayic' eb ix ix tu', yuj yabeni ta watx' c'ul ix Ester c'al yuj tzetbil wal chi yun yil-lay ix.
12Masanil juntzan eb ix k'opoj tu' jun wal abil chi watx'nelay aj yili eb. Yin babelal chi bonlay is mimanil eb ix yetok aceite yet mirra, yet wakeb xajaw. Axa yin wakebxa xajaw xin, chi bonlay eb ix yetok perfume c'al yetok crema axcac'alta' juntzan chi k'an eb ix ix. A yet chi lajwi jun abil yin watx'nelay eb ix tu xin, yin junjunal chi yun tx'oxon ba eb ix satak cham rey Asuero. 13Axca ton tu' max yun tojc'al junjun eb ix satak cham rey. A yet chi eltok eb ix bay nail bay ayic' eb ix ix tu', chic'al je' yiontok eb ix tzet chi yochej c'ul. 14Chi toj eb ix bay is palacio cham rey yet yayc'ualil, axa yet junxa k'inibalil xin, axa yec'tok eb ix bay junxa nail eb xal is cab yistzil cham rey, bay ayoc cham Saasgaz yilomalok yuj cham. C'amxa chi toj eb ix satak cham rey, asan ta ay junok ix caw wal max cha c'ul cham xin. A jun ix tu', chi awtelay is bi, catatu' chi toji.
15Axa max yun xin, a yet max oc yiban ix Ester is cutz'in Abihail, is yican Mardoqueo, toj bay cham rey, asan tzet yetal max yal cham Hegai, is taynemal eb ix ix max yitok. Caw wal watx' ix Ester yul sat masanil eb chi iloni. 16A yet lajonebxa xajaw, a jun xajaw tu' chi yik Tebet, yet ukebxa abil yoc cham Asuero yin reyal, max ilaytok ix Ester bay is palacio cham yet chi oc ix satak. 17Yelxac'al max camc'ulnelay ix Ester yuj cham rey, c'am junokxa ix ay is camc'ulal cham yin axca is camc'ulal yin ix Ester tu'. Miman is watx'c'ulal yin yintakc'al juntzanxa eb ix k'opoj ix max ayji ec' yetok cham, xan max alay oc jun corona yin is jolom, axa yoccan yin reinail is q'uexelok xal Vasti. 18Yin aymanil max watx'nej cham jun miman loj yuj yilay aj can xal Ester. A yin jun tu' max yawten masanil eb yajaw ayoc yin opiso yetok yul is makbej. Max yion aytek tojlabal c'al xiwil tzet max pojic' xol conob ay yul is makbej tu'. Axca tu' max yut tx'oxon el ba is watx'c'ulalil cham rey.
Max yiltek Mardoqueo juntzan ajc'ul yin cham rey
19A yet juntzan c'ual yet max wajlay juntzanxa eb ix k'opoj, a tu' chotan ay cham Mardoqueo bay puertail is palacio cham rey. 20C'am jabok max yal xal Ester yuj tzet conobal c'al tzet inatilejal, axca wal max yun yalon cham Mardoqueo bay, yujtol ay wal oc yin c'ul xal yiken tzet chi yala', axcac'al yet ayic' xal yetok bay yatut. 21A yet chotan ay cham Mardoqueo tu' bay puertail is despacho cham rey tu', max yaben k'anjab cawan taynemal puertail despacho tu', a ton Bigtán c'al Teres, tol caw wal ow eb yin cham; chi yochej eb chi mak'camok. 22A yet max yaben Mardoqueo juntzan k'anej tu' max yalon bay Ester, axa xal max alon bay cham rey yuj Mardoqueo tu'. 23A jun k'anej tu' max ablay wal sic'libil ta yel, axa yet max abchaj tol yel toni, a eb cawan chekbej cham rey tu' max aj locan eb yuj yak'lay cam eb. A tzet max uj tu' max chek cham rey tz'ibelaycan yul tx'an un bay chi tz'ibelay is yabixal jun nación tu'.
Currently Selected:
Est 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989