2 S 2
2
Max oc David reyalok Judá
1Max lajwi tu xin, cax max k'anlen cham David bay Jehová, max yalon axca ti':
—¿Tom chi je' in toj bay yul junok conob bay yul yet Judá? ẍi. Max tak'wi Jehová bay:
—Chi je' a toji, ẍi Cham.
Max k'anlen pax David:
—¿Baytal conobal chi je' in toji? ẍi.
—A bay Hebrón chach toji, ẍi Cham.
2Yuj tu xin, a tu' max toj David yetok eb ix yistzil cawanil, a ton Ahinoam aj Jezreel, yetok Abigail, yistzilben camom Nabal, aj Carmel. 3Cax max yion c'apaxtok eb nak ayic' yetok, yetok yetbi c'al yuninal. Max cajay eb bay yul conoblak yul yet Hebrón. 4Max lajwi yec'tok jayeb c'ual, cax max apni oc eb yicham winakil is tribual Judá cax max yaoncan oc eb David is reyalok.
Max yaben aj David tol a eb aj Jabes yul yet Galaad max mukon Saúl, 5xan max yatok juntzan eb is chekbej yuj yalon bay eb: Yak'okab Jehová is watx'c'ulal ayex, yuj tzet yetal tol watx' max e yun yin Saúl e reyal, yujtol max e muku'. 6Xajan ok ex yil Jehová yala', cax naan exc'al yuj, ac'ala' in ayin ti', xajan ok ex wila' yuj tzet yetal tol watx' max e yunej. 7Yuj tu xin, ayokab e tzalojc'ulal, c'amc'al chex xiwi, caxc'al max cam Saúl e reyal tu', palta a masanil eb anima bay Judá max in yaoc eb is reyalok, ẍitok David.
Ocnak owal xol Israel yetok Judá
8A Abner is c'ajol Ner, yajaw yayji xol eb soldado Saúl. A max iontok Is-boset, is c'ajol Saúl bay Mahanaim. 9A bay tu' max yaoc yikbej yin reyalok Galaad, Aser, Jezreel, Efraín, c'al Benjamín, a ton bay masanil conob Israel. 10A yet max chaon el yich Is-boset yoc yajawilal bay israel ay cawinak abil is k'inal, cab abil max yak' reyal tu', palta a eb is tribual Judá mayal yaoc eb David yin reyal. 11Caytu' max yun yoc David yin reyal bay Judá yin ukeb abil yetok wakeb xajaw. A yin jun tiempoal tu' a bay conob Hebrón max yak' yajawilal.
12Axa Abner xin, max el bay Mahanaim, max tojcan bay Gabaón yetok eb is soldado Is-boset. 13Axa Joab is yune' xal Sarvia, max eltok yetok eb is soldado David bay Hebrón, max chalen ba eb yetok Abner bay wajan a' aej yet Gabaón. A cab makan eb soldado tu' max ayji ec' eb bay wajan a' aej tu' jun makan bay jun pac', axa junxa makan bay jun pac'xa a'. 14Catatu' max yalon Abner bay Joab:
—Elokabtek jaywanok eb nak ach'ej yak'len owal co satak ti', ẍi.
—Yunokabi, ẍi Joab.
15Axca tu' max yun xin, lajanc'al bisil yet junjun max eltek, lajcawan eb yet Benjamín ayoc yetok Is-boset is c'ajol Saúl, lajcawan c'apax eb is chekbej David max eltek.
16Junjunc'al eb max mitx' jolom is yajc'ul tu' max jekontok eb yespada bay is tz'eyil yajc'ul tu', xan junejc'al max yun cam eb masanil. Yuj tu' xan a jun lugar ay bay yul yet Gabaón tu', max yikcan Lugar bay max oc Teklejbail. 17Lajwi tu', caw wal miman max yun yoc owal yuj eb masanil. Axa Abner yetok eb is soldado max ayc'ay eb yuj eb soldado David. 18A bay tu' ayoc eb oxwan yune' xal Sarvia, a ton Joab, Abisay c'al Asael. A Asael tu' caw wal jelan bey axca junok no tx'ucchej. 19Jun bek max toj lemnaj yintak Abner, majxac'al elcan yintak. 20A yet max yilontok Abner bay yintak, max aj yaw yaloni:
—Ma tol ach Asael ach, ẍi. Max tak'wi bay:
—Ayin toni, ẍi.
21Xan max yal Abner bay axca ti':
—Bekxa quin okteni, watx' tol a junok eb nak ach'ej ti' cha mitx'a', cax cheoncan masanil tzet yetal ibil oc yuj, ẍi bay.
Palta a Asael xin, maj yal c'ul max bek yukteni. 22Max yalon pax Abner bay Asael junelxa:
—Manchakxa quin oktej, ¿ma chochej wal chin ak' pural ach wak'on camok? Axa chi yunej ¿tzetto wal chi yun in tec'ban in ba satak oẍtak Joab? ẍi.
23Palta a Asael xin, maj yal c'ul max el yintak, axa chucon eltok Abner teal is lanza yintak tu', palanc'al low yin is c'ul Asael tu', max k'axpoj elapnok te' bay yichin. Axac'al bay tu' max ayc'ay Asael tu' cami. A masanil eb chi apni oc bay jun lugar bay max cam Asael tu' chi oc waan eb yiloni. 24Palta a Joab yetok Abisay max tojc'al eb yintak Abner. Axa wal toj c'u max apni oc eb bay jolom witz Ama, a tu' ay bay satak Gía, a ton bay chi tojcan beal tz'inan tx'otx' bay Gabaón. 25A bay tu' max wajbaj oc ba eb yet is tribual Benjamín yetok Abner, junxanej max yut ba eb masanil bay jun tzalan. 26Axa max yun xin, max awji Abner bay Joab axca ti':
—¿Tom man ok ach oc wanaj a mak'on cam anima ti'? ¿Tom c'am cha na' jabok tol asan yobc'ulal chi yitek jun ti' jiban? ¿Janic' ok al bay a soldado tol chi oc wanaj yukten yet conob? ẍi.
27Max yalon Joab axca ti':
—Ti wal yojtak Dios, matawal maj ala' tol chi oc owal maj mi on tzaklojc'al e yintak yettax k'inibalil, ẍi bay.
28Max lajwi tu' max yalon cham Joab tol chi xulay trompeta, xan max oc wanaj masanil eb soldado tzakloj yintak eb israel yin yak'on eb owal. 29Caytu' max yun bey cham Abner yetok is soldado yet jun ak'bal tu' bay yac'alil Arabá, max k'axpoj ec'tok eb bay a' Jordán c'al yec'tok eb bay Bitrón masantac'al max apni oc eb bay Mahanaim.
30Axa cham Joab xin, max bek tzakloj yintak cham Abner axa wajban oc is soldado tu', axa yet max yawten listail eb masanil, catatu' max il-layi tol ay 19 eb soldado yet David max cami, max cam c'apax Asael. 31Palta a eb is soldado David max mak' cam eb 360 eb soldado yet Benjamín, a ton eb soldado Abner.
32Yinxac'al tzunanil max ilaytok is mimanil Asael bay Belén. A bay tu' max mukayi, a ton bay mukan is mam. A cham Joab yetokc'al masanil is soldado max bey eb masanil jun ak'bal tu', ayxa ec' eb bay Hebrón max k'inibi ajok.
Currently Selected:
2 S 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989