1 S 2
2
Is txaj xal Ana
1Max txajli c'apax xal Ana axca ti':
Mamin Jehová, yetok wal masanil in c'ul chin tzaloj en, tol ach max ak' wip. Ayxa tzet chi je' walon yin eb ajc'ul oc win, yujtol ach max ach colwaj win; yuj wal tu', xan caw wal chin tzaloj tinani'.
2Ach Jehová, asanxanej ach ocok. C'am mac lajan axca ach, ach ti'. C'am junokxa chi je' yuj on colon axca ach co Diosal ach ti'.
3C'amxa mac chi je' maynen ba, c'am mac chi je' yion aj can ba, yujtol a Jehová yojtak masanil; a Cham chon beyc'ulnen junjun on.
4A Jehová chi uchontok is julbal eb tol ay is may yayji ocok, a chi ion aj can eb yaynakil chi yut ba.
5A mactxel caw wal ay is lobej yet yalantok, axa tinani' chi say mulnaj ba yuj lowi. A mac max yab yail wajil, a tinani' c'amxa wajil chi yak'a'. A ix ix c'amtac'a yune', a tinani' ayxa ukwan yune' ix chi yila'. Axa pax ix xiwil unin max yila', a tinani' c'amxa yune' chi jayi.
6A Jehová chi ion el co k'inal, ac'ala' Cham chi ak'on paxok. A Jehová chon aon aytok bay mukbanil camnak, ac'ala' Cham chon ionpax ajtek.
7A Jehová chi ak'on co beyomal, c'al co mebilal; chon beklay ay yuj, ma chon yiaj can.
8A Jehová chi ion aj can eb meba' bay sat tx'otx', cax chi sic'on aj wan Cham eb k'anom limosna xol k'alem, yet chi ay chotan eb xol eb mimek yajaw cax chi oc eb yin mimek opiso. A Jehová max watx'nen yichbanil yulyibank'inal ti', cax max watx'nen ay tx'otx' tx'otx' yiban yich tu'.
9A Jehová chi taynen eb yikem bayc'al chi ec'jabi; axa eb anima caw wal yob, chi cancan eb xol k'ekk'inal. C'am mac chi uj yuj yuj is yipalil yul yet.
10A Cham chi ak'on coc'axtok eb ajc'ul oc yin; atac'al bay satcan chi mak'wajtek c'u yiban eb. A Jehová chi beyc'ulnen el yulyibank'inal ti' masanil. A Cham chi ak'on yipalil cham rey tol sic'bil el yuj, cax chi ilay can yuj Jehová, ẍi xal.
11A yet tu' max meltzoj cham Elcana bay yatut bay Ramá, axa pax nak yaliẍ unin xin, max can nak yetok cham sacerdote Elí yin yak'wi serbil bay Jehová.
Is yobtakil eb is c'ajol cham Elí
12A eb is c'ajol cham Elí tu', caw wal yob is beybal eb, c'am yelapnok Jehová yul sat eb, 13tamwal is leyalil yin tzet yetal tol yet eb sacerdote. A yet lanan yak'on eb anima xajanbal, cax chi apni oc junok is chekbej eb sacerdote tu' yetok junok miman tenedor. 14A yet ipanto taj no' yul xij, ma yul is netal tu' cax chi jekon aytok eb ch'en tenedor tu'. A jantak no' chi ajtek yuj eb nak tu', chi yiontok eb bay eb sacerdote tu'. Caytu' max yut eb yin xajanbal masanil eb yet conob bay Silo tu'. 15Ac'ala' caytu' max yut eb no' xajanbal yet c'amto chi ak'lay tz'a seboal no', cax chi apni oc jun is chekbej eb sacerdote tu'. Chi yalon bay mac chi ak'on xajanbal tu': Ak' janic'ok no' chibej ayin, tol ok in bol no' bay cham sacerdote, yujtol man ok cha' cham no' tajnakxa ayach, palta a no' yaxto, ẍi jun chekbej tu'. 16Ta chi tak'wi eb anima tu', chi yalon eb: Babel ok tz'a seboal no' bay altar, catatu' chi je' eontok jantak chi yochej a c'ul, ta ẍi, cax chi tak'wi jun chekbej tu': C'amak, yowalil ok ak' no' ayin wal tinani', ta c'amak, ok in tok'ic' no' ayach, ẍi jun chekbej tu'. 17Yuj tu xin, a eb cawan sacerdote tu', caw wal xiwil is mul eb max yaoc yul sat Jehová, axca tol c'am yelapnok ofrenda chi ak'lay bay Cham tu' yul sat eb.
18Axa pax nak yaliẍ Samuel xin, ayoc is pichil nak axca yet eb sacerdote tu', yujtol ayxa oc nak yin mulnajil satak Jehová. 19A yet chi betic' cham Elcana yetok Ana is yistzil, yin yak'on xajanbal bay Jehová yin junjun abil bay Silo tu', cax chi yiontok xal junjun is jokan pichil nak yaliẍ Samuel tu', watx'nebilxa yuj. 20Max yalon cham Elí watx' k'anej yiban cham Elcana, c'al yiban xal Ana, max yalon axca ti': Yak'okab Jehová tz'akil onenal bay Ana ti', yet chi oc q'uexelok nak unin k'anbil yuj, tol max yak' bay Jehová ti', ẍi cham. Max lajwi tu', axa meltzoj eb bay yatut tu'. 21Axa Jehová, ayc'al oc yak'on is watx'c'ulal bay xal Ana; oxwan winak unin max yila', yetok cawan ix unin. Axa pax nak Samuel xin, watx'c'al ch'ibaj nak bay cajlobal Jehová.
22A cham Elí, caw wal icham winakxa yet tu'; palta max yojtaknej elok tzet chi utlay eb conob Israel yuj eb is c'ajol; toltax chi bet eb nak way yetok eb ix ix chi taynen ti' mantiado bay chi co chalej co ba yetok Jehová. 23Yuj wal tu xin, max yal cham Elí bay eb is c'ajol tu': Masanil wal eb anima chi alon oc yin in sat e yobtakil che yunej. ¿Tzet yuj xan axca tu' che yunej? 24C'amak ex in c'ajol, caw wal yob tzet chi yal eb conob Jehová yin tzet che yun ti'. 25Ta ay junok mac ay tzet chi yut junok yet animail, chito je' colwaj Dios yetok jun mac chi oc is mul tu'; palta ta ay junok mac chi yaoc is mul bay Jehová, a jun tu' c'amxa mac chi coloni, ẍi cham Elí. Palta c'am wal jabok yelapnok tzet max yal cham mamej tu' bay eb nak, yujtol a Jehová mayal na' tol ok c'aylay el eb yuj.
26Axa pax nak yaliẍ Samuel xin, yelc'ulal chi ch'ib nak, caw wal max cha' c'ul Jehová tzet chi yun nak. Ac'ala' eb conob, ay c'apax tzalojc'ulal eb yin nak.
27A yet jun tiempoal tu', max apni oc jun is chekbej Dios bay cham Elí, max yaloni: Axca ti' yalon Jehová: Yet ayic' eb echmam bay Egipto yin yak'on serbil eb reyal Egipto tu', caw wal watx' max yun in tx'oxon in ba bay eb. 28A bay xol masanil is tribual israel, a tu' max ex in sic'can el ayex sacerdote ex ti', yet che yak' tz'a no' xajanbal yiban waltar, c'al e yak'on tz'a incienso, cax che yaon oc e pichil yet e sacerdoteal, yuj e k'anlen e yab in satak. Cax max wak'on bay eb e yichmam, tol ay yalon yet eb yin no xajanbal chi ak'lay tz'a yet chin ilay aj can yuj eb e yet israelal. 29¿Tzet yuj xan tol c'am yelapnok yul a sat juntzan xajanbal c'al ofrenda chin chek yak' eb e yet conob bay in cajlobal? ¿Tzet yuj xan xajanxac'al chel eb nak a c'ajol tu' in satak, cax bekanxac'al a c'ul ak'on bak'echbok eb nak yuj is watx'ilal xajanbal chi yak' in conob ayin? 30Caxc'al ayin Jehová Diosal in israel max wala', tol ach yetok eb enatil chach mulnajc'al bay in cajlobal, axa tinani' chi wala', tol manxa axcaok tu' ok yunej, yujtol a mac ay welapnok yul sat; a eb tu' ay yelapnok yul in sat, axa mac c'am welapnok yul sat xin, c'am c'apax yelapnok yul in sat. Ayin Jehová in chi wal jun ti'. 31Lanan jay c'ual in c'ayon el eb a c'ajol, c'al is c'ajol eb ecan, c'amxa junok enatil ok ichambok. 32Caw wal cusc'ulal c'al chichonc'ulal ok onej yet ok elon watx'il ok wun yin eb e yet israelal, palta caw wal c'amxa junok enatil ok yil icham winakil. 33Palta a mac okto can yin enatil yilon waltar, toxac'al ok cus c'ul yin tzet ok yila', axa masanil juntzanxa enatil xin, ok cam eb yet tec'anto eb. 34Junnej c'ual ok yun cam eb nak a c'ajol cawanil, a ton Ofni c'al Finees. Catatu' ok eloni tol ok yun tzet max wal ti'. 35Ok waoc junxa sacerdote tol chi cha in c'ul, cax tol chi yikej tzet chi wala', c'al wak'on najatilbok yopiso eb is yinatil, c'al waon oc yopiso yetok jun rey tol ayin ok in sic'can elok. 36Yuj tu xin, masanil mactxel tol maxto iquisbi can ec' yin enatil, ok jay eb, c'al yay jajan eb bay satak jun sacerdote tu', yet chi ul k'an junok is tumin, ma junok is pan, cax chi tewi yuj jabok yopiso yin sacerdoteal, asan yuj yec' tiempo yuj, ẍi Jehová, ẍi is chekbej tu' bay cham Elí.
Currently Selected:
1 S 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989