1 Co 4
4
Is mulnajil eb chekbej Jesucristo
1Yuj tu' manak jin che yaoc e nabal yujtol yak'omalc'al ch'an serbil Cristo jayji on. A jopiso, asan tol chi jak' cuylay cuybej Dios, juntzan ak'bil co cuy on yuj. 2A mac chi ak'lay junok opiso yunej, yowalil tol chi yikej mulnaj bay jun mac chi ak'on yopiso tu'. 3Palta ayin ti', c'am chin oc il jabok, ta ayex chin e beyc'ulnej yin wopiso ti'. Caxc'al tol tx'ok juntzanokxa mac chin beyc'ulneni, palta c'am jabok chin na'. Toltax in, maj je' in beyc'ulnen in ba yin wopiso ti'. 4Ta ay junok in paltail, man wojtakok, palta maj je' waloni tol c'am jabok in paltail, yujtol asan Cham Jajawil chi je' in is beyc'ulneni. 5Yuj tu xin, c'am chi je' e beyc'ulnen junok mactxel tinani'. Jechbanejek ato yet ok jay Cham Jajawil, yujtol a Cham ok tx'oxon el masanil tzet yetal. Axca junok tzet yetal eban el xol k'ekk'inal, axa chi oc jopnaj sakk'inal yin, cax masanilxac'al chi txecloj elok, cayton tu' ok yun txecloj el masanil tzet yetal yet tu'. A Cham Jajawil ok ak'on txecloj el tzetak yetal ay yin co nabal co masanil. Catatu' ok al-lay watx' k'anej yin junjun yuj Dios, atac'ala' co mulnajil junjun on.
6Ex wuẍtak, ex wanab, max waltek ayex tzet wayji, c'al tzet yayji Apolos, yuj e watx'ilok. Yujtol ayon ti' tx'oxbanilc'al jayji on ayex, yet watx' chi nachaj el e yuj tol c'am chex ec' yiban e yalon yintak tzet chi yal tx'an Un Tz'ibbilcanok, yet watx' c'am junok mac che yi can, yuj e yintaknen el junok xa. 7C'am junok on chi je' jion can co ba, yujtol lajanc'al jelapnok co masanil. Tzanc'al tzet chi je' juj, a Dios chi ak'on ayon. Yuj tu', c'am chi je' jion can co ba yuj. C'am chi je' jaloni, tol jet yul jet, yujtol a Dios chi ak'on ayon.
8A pax ayex ti' xin, ¿ma tz'akanxa ayex che na'? ¿Ma mayal e cha' masanil is tzetak yetal Dios tinani' e naoni? Tekan yajaw exxa e naon tinani'. Palta ayon ti', c'am on chon oc yajawilal e yetok. Yelok wali yajaw exxa, chi mi jak' c'apax yajawilal e yetok. 9A chi wut in naoni, tol max tx'oxk'abnej el Dios, tol a ayon chekbej Cristo on ti', yintakilxa jayji. Axca junok mac ayxa oc yul k'ab camich, yuj mak'lay camok, axca tu' jayji on. Axa eb jet animail ti xin, c'al eb ángel, toc'al chi matz'li eb, cax chi c'ayaj c'ul eb yuj tzetbil jili. 10Axca wal tol c'am jabok co nabal yul sat eb jet animail, yujtol ayoc co nabal yin Cristo. Palta ayex ti', caw jelan exxa pax yin yet Cristo e naoni. Jojtak, tol mayonto tec'anok. A pax ayex ti xin, axca tol caw tec'an exxa. Ayon ti', intaknebil on elok, palta ayex ti', caw miman e yelapnok. 11Toltax tinani', ay bay caw chi jil wajil, c'al takintial, c'al maj pichilejal. Ay bay chon mak'layi, cax c'am c'apax jatut on. 12Caw chon c'unbi yin jilon co mulnajil. Caw wal chon buchlayi, palta a watx'c'ulal Dios chi co k'an on yiban eb chon buchwan tu'. Ay bay caw chi yak' eb ajc'ulal jin on, palta chic'al techaj juj. 13Ay bay chi yal eb co k'umal on, caw yob chi yal eb jin sic'libil, palta ac'ala' yinc'al mansoc'ulalil chi jut jalon yabix eb on. Axca wal k'alem bay yulyibank'inal ti' jayji on yul sat eb. Toltax tinani', axca tzet c'am yelapnok yul sat eb jet animail caytu' jayji on.
14Man yujok wion el e q'uixwil, xan chin tz'ibejtok juntzan ti' ayex, palta tol chi waloc yul e jolom axca bay junok wuninal tol caw chin camel yin, caytu' e yayji tinani'. 15Caxc'al mi ay lajonebok mil e cuyomal yin yet Cristo, palta junnej axca tol e mam yayji. Ayin ti', axca tol e mam in, yujtol ayin babel max wal k'anejal yet colbanilej ayex, xan max e yaoc e c'ul yin Cristo Jesús. 16Yuj tu xin, chin oc tean e yin, tol che beybalnej in beybal.
17Yuj jun ti', xan chin chektok Timoteo ti' ayex. A Timoteo ti', axca tol in c'ajol yul sat Cham Jajawil. Caw ay in camc'ulalil yin, yikemc'al chi yut ba. A ok tok jekon e na', cax ok e naontek tzetbil yili in beybal yuj ayxa oc Cristo yin in c'ul. Axcac'al chi wut in cuyon eb creyente bay junjun iglesia, caytu' ok ex yut cuyon c'apaxok. 18Ay ab jaywan chi yiaj can ba e xol, yujtol a naoni tol manxa ok ex tok wila'. 19Palta a chi wut in naoni tol toxa chex toj wila', ta axca tu' chi el yin c'ul Cham Jajawil. Catatu' ok wiloni, ta yel ay tzet chi je' yuj eb, ma xin, toc'al chi yal eb. 20Yujtol man yujok chon ec'xac'al yiban jaloni, xan chi txecloj elok tol ayonxa oc yul k'ab Dios. Palta tatol ayoc yipalil Cham jetok, tita' tol yel ayonxa oc yul k'ab Cham. 21A tinani xin, ¿tzet chi yochej e c'ul chi toj wun e xol tu'? ¿Chi mi e yochej chex toj wak' cuenta yuj e yobtakil? ¿Ma che yochej, chi toj in tx'oxil in camc'ulal e nan e xol, cax manso chi wut in ba ayex?
Currently Selected:
1 Co 4: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989