Sofonías 3
3
Aju il cybincha aj Jerusalén ex aju colpibl cye
1Bec'bil twitz tnam Jerusalén, aju tnam tc'i' txi tbi'n, ttz'ilsan tib tu'n tbinchben mya ba'n ex in yajlan cyi'j mastl xjal ate' tuj. 2Minti' xi tbi'n tk'ajk'ajel twi Kman, minti' cub tuj twitz tu'n t-xi cawin, minti' oc ke' tc'u'j ti'j Kman ex minti' aj meltz'aj tuc'il Tdios. 3Ic cyten ke nejenel ate' tuj ic tza'n ke balun in che tzanun; ic cyten ke jwes ate' tuj ic tza'n ke xo'j, te konic'an minti' in cyaj cyk'o'n tbakil cychi' te juntl k'ij. 4Minti' tajben cyyol keju nno'c cyk'on cyib t-sanjel Dios ate' cyxol, ax in che oc meltz'aj cyi'j cyuc'il; ke pal ate' cyxol in baj cytz'ilsa'n tja Dios ex mya tuj tumel in ajben tley Kman cyu'n. 5Ax ta' Kman tuj tnam; tz'aklxixte ex minti' in tbincha'n mya ba'n. Teyle te junjun prim in xi tbincha'n cyi'j xjal ex mlay tz'el ti'j. Atzun ke xjal mya ba'n minti' in tzaj cych'ixwi ti'j cybinchben.
6Chi Kman in tma'n: O che cub nxitune ke nasyon, o che cub nxitune ke ja ma' cywa'l te cycolbil cyib, ke cay ate' cyuj o che oc wu'ne ic tza'n jun lugar minti' xjal tuj, mi jun xjal in bet cyuj. Ma che baj xitj ke cytanmi, minti' jun xjal najl cyuj. 7Cub nximane cyja': Kape jacu che xob aj Jerusalén nwitze, ex kape jacu cub tuj cywitz tu'n cyxi ncawine tu'ntzun mi'n tcub nxitune aju tnam jatum najlke, ic tza'n cycastiw ma cub nk'o'ne. Atzun cye oc tilil cyu'n tu'n cybinchante tcyakil txcaj mya ba'n. 8Tu'ntzun jlu, che ayone wi'je tuj k'ij oc cyoque tuj xjel wu'ne. Akine Dios in chin k'mante jlu: Ma cub nximane tu'n cyoc nchmo'ne ke nasyon ex ke cawbil tu'n tcub nk'o'ne cycastiw tuc'il nimxix nk'oje. Tcyakil twitz tx'otx' cnajel tu'n nk'oje mer ic tza'n k'ak'.
9Tuj tk'ijlalil tzul, wu'ne cch'expetel cyyolin ke nasyon tu'n cyyolin tuj tumelxix, tu'ntzun ntzaj na'ne cyu'n cycyakil xjal ex tu'n cyajben weye mojl cyyol. 10Taj jlajxi ke nima tuj Etiopía, jatum cysputun cyib ke xjal etzan wu'ne, che tzajel cubsal nwitze ex ctzajel cyi'n oyaj te weye. 11Akeye xjal etzan wu'ne, tuj tk'ijlalil tzul mlay tzajtl cych'ixwiye ti'j cybinchbene tej tjaw cyi'n cyibe wi'je, porque che elex wi'ne cyxole keju nno'c cyk'o'n cyib te ma'xix ex in jaw cyniman cyib, ex mlaytl jaw cyniman cyibe juntl maj twi' ju witz xjan etzan wu'ne. 12Che cyjel nk'o'ne cyxole ke xjal mans ex ch'in cynabl, ex c'oquel ke' cyc'u'j wi'je. 13Keju che cyjel ank'in cyxol aj Israel mlay cybinchatl aju mya tz'aklxix, mlay che nic'an yol ex mlaytl che sbun. Che wa'l ex che ojlal ex mi a'l jun c'oquel xobtzan cye.
Bitz te tzalajbil ti'j Jerusalén
14Che bitzane akeye aj Sión. Cyk'onx tk'ajk'ajel cywi'ye te tzalajbil akeye aj Israel. Che tzalajxe akeye aj Jerusalén, che tzalajxe tu'n tcyakil cyanmiye.
15Ma tz'el ti'n Kman aju sentens tcub cyibaje ex ma che ex tlajo'n ke aj k'oj cyi'je. Ate Kman at cyxole, aju rey cye aj Israel; mlay che xobtle twitz ju mya ba'n.
16Tuj tk'ijlalil tzul cxel k'met cye aj Jerusalén cyja': Mi'n che xobe akeye aj Sión, ex mi'n che cub numje.
17Ate Kman at cyxole aju Cydiose at nimxix tipumal, ex che cletele tu'n. Ctzalajel Kman cyi'je. Cbel txule' tuc'il tc'ujlalil, ctzalajel cyi'je tuc'il bitz,
18ic tza'n tuj jun nink'ij.
Chi Kman in tma'n:
Akine chin clolte cyeye tuj ju mya ba'n in xobtzante cyeye, ex tuj ju ch'ixbil tcub cyibaje.
19Tuj tk'ijlalil tzul cbel nk'o'ne cycastiw keju in che yajlante cyeye. Wu'ne che cletel ke cox ex che tzajel nchmo'ne keju o che el tzpet, che jawil nnimsa'ne ex c'elel wi'ne ju ic'bil cyeye cyu'n xjal; ke xjal tuj tcyakil twitz tx'otx' che yolil ba'n cyi'je.
20Tuj tk'ijlalil tzul che tzajel wi'ne ex che oquel nchmo'ne, che tele juntl maj wu'ne tuj txubtxaj; wu'ne che jawil nimsa'ne ex cycyakil xjal twitz tx'otx' che yolil ba'n cyi'je. Akine Dios ma chin k'mante jlu.
Currently Selected:
Sofonías 3: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993